فوتو: gov.kz
ءىس-شارا «اق تاس» بازالىق ستانتسياسىندا ۇيىمداستىرىلدى. فەستيۆال اياسىندا قاتىسۋشىلار تاۋعا كوتەرىلدى. ءار كۋرورتتىڭ بىرىڭعاي فورماسىن كيگەن كوماندالار مارش اۋەنىمەن «اق تاس» الاڭىندا ساپ تۇزەپ, حالىقارالىق ىنتىماقتاستىقتىڭ ايقىن كورىنىسىن پاش ەتتى.
«قازاقستان, وزبەكستان جانە رەسەي ەلدەرىن بىرىكتىرگەن ءىس-شارانى ۇيىمداستىرعان جاندارعا العىس ايتامىن. جاستار – بولاشاقتىڭ كەپىلى, ىنتىماقتاستىق پەن دوستىقتىڭ التىن كوپىرى. وزدەرىڭىز بىلەتىندەي, تاۋ كلاستەرى مەن الماتى قالاسى – ءبىزدىڭ ۇلتتىق بايلىعىمىز, ماقتانىشىمىز. سىزدەردىڭ ەلدەرىڭىزدە دە تاۋ ءتۋريزمىنىڭ قارقىندى دامىپ كەلە جاتقانىن جاقسى بىلەمىز. بىرلەسكەن كۇش-جىگەردىڭ ارقاسىندا بۇدان دا بيىك بەلەستەردى باعىندىرامىز دەپ سەنەمىن», دەدى الماتى قالاسى اكىمىنىڭ ورىنباسارى ولجاس سماعۇلوۆ.
اكىم ورىنباسارىنىڭ ايتۋىنشا, Oi-Qaragai تاۋ كۋرورتىندا باس قوسۋ – وتاندىق كاسىپكەرلەردىڭ باستاماسىمەن جۇزەگە اسقان بىرەگەي جوبا, تاۋ كلاستەرىن دامىتۋداعى ۇلگىلى نىسان سانالادى.
الماتى تاۋ كلاستەرىنىڭ الەۋەتى جوعارى: حالىقارالىق ماماندار پىكىرى ءبىر ارنادا توعىستى
«الماتى قالاسى تاۋعا جاقىن قاشىقتىقتا ورنالاسقان. مۇنداي مۇمكىندىك الەمدە ساناۋلى عانا قالالاردا بار. ال ەۋرازيالىق تاۋ كۋرورتتارى اليانسىنىڭ ءۇشىنشى فەستيۆالىن قازاقستاندا بىردەن ەكى كۋرورت قابىلداپ وتىر – Oi-Qaragai جانە شىمبۇلاق كۋرورتى. بۇل – ءبىزدىڭ ۇلكەن ارتىقشىلىعىمىز, ءارى قاراي دا وسى باعىتتى جۇيەلى تۇردە دامىتامىز», دەدى ولجاس سماعۇلوۆ.
Shymbulak تاۋ كۋرورتىنىڭ باس ديرەكتورى رينات ءابدىراحمانوۆ قالاداعى تاۋ كۋرورتى نىساندارىن جاھاندىق كۋرورتتار كارتاسىندا ءوز ورنىن الۋى ءۇشىن اتقارىلىپ جاتقان جۇمىس بارىسىن جوعارى باعالادى.
«الماتىنىڭ اسقار تاۋلارىندا مىقتىلار جينالادى. تاۋلار مىقتىلاردى بىرىكتىرەدى. ءبىز – جاڭا جۇمىس ورىندارىن اشىپ, ينۆەستيتسيا تارتىپ, ەڭ باستىسى, ەۋرازيا كەڭىستىگىندە تۋريزم مادەنيەتىن قالىپتاستىرىپ جۇرگەن جاندارمىز. ءبىزدىڭ ماقساتىمىز – ەۋرازيانىڭ تاۋ كۋرورتتارى جاھاندىق كۋرورتتار كارتاسىندا ءوز ورنىن الۋى, الەمگە تانىلۋى. ارينە, باسەكەلەستىك بار ەكەنىن تۇسىنەمىز. الايدا, ىنتىماقتاستىق, تاجىريبە الماسۋ, تەحنولوگيا الماسۋ ءبىزدى بىرلىككە باستايدى», دەدى Shymbulak تاۋ كۋرورتىنىڭ باس ديرەكتورى رينات ءابدىراحمانوۆ.
سپيكەرلەر الماتى تاۋ كلاستەرىن دامىتۋدىڭ ستراتەگيالىق ماڭىزىن اتاپ ءوتىپ, ينفراقۇرىلىمدى جاڭعىرتۋ, قىزمەت كورسەتۋ ساپاسىن حالىقارالىق ستاندارتتارعا سايكەستەندىرۋ جانە وڭىرارالىق سەرىكتەستىكتى نىعايتۋ قاجەتتىگىن جەتكىزدى. سونىمەن قاتار, تاۋ ءتۋريزمىن ءتورت ماۋسىم بويى دامىتۋ, ينۆەستيتسيالىق جوبالاردى ىسكە اسىرۋ جانە ەكولوگيالىق تۇراقتىلىقتى ساقتاۋ ماسەلەلەرى دە قوزعالدى.
فەستيۆال مەن فورۋم – تاجىريبە الماسۋعا, جاڭا باستامالاردى تالقىلاۋعا جانە ەۋرازيا كەڭىستىگىندەگى تاۋ كۋرورتتارىنىڭ ىنتىماقتاستىعىن كۇشەيتۋگە ارنالعان ماڭىزدى الاڭ. ەۋرازيالىق تاۋ كۋرورتتارى اليانسىنىڭ باس حاتشىسى اندرەي كۋكۋشكيننىڭ ايتۋىنشا, بۇل شارا ايماقتىڭ تۋريستىك الەۋەتىن ارتتىرىپ, حالىقارالىق دەڭگەيدەگى بەدەلىن نىعايتۋعا ىقپال ەتەدى.
«بيىل ءۇشىنشى رەت ۇيىمداستىرىلىپ وتىرعان ەۋرازيالىق تاۋ كۋرورتتارى اليانسىنىڭ فەستيۆالىنە 5 ەل مەن 6 كۋرورت قاتىسىپ جاتىر. بۇگىن وسى جەردە بارلىق كۋرورتتىڭ وكىلدەرى مەن باسشىلارى جينالدى. ءار كۋرورتتان سپورتتىق كوماندالار كەلدى. ءبىر اپتاعا جوسپارلانعان باعدارلاما وتە اۋقىمدى.
تاۋ ءتۋريزمىن دامىتۋعا ارنالعان فورۋمنان باستايمىز. فورۋمدا قازاقستاننىڭ تۋريستىك سالاسى ءۇشىن ەڭ وزەكتى تاقىرىپ – تاۋ ءتۋريزمىن دامىتۋ جانە الماتى تاۋ كلاستەرىن قۇرۋ ماسەلەسى تالقىلانادى. مۇندا وسى باعىتتا كاسىبي تۇرعىدا پىكىر الماسۋعا نيەتتى ماماندار جينالدى. ولار كلاستەردى قالاي ءتيىمدى قۇرۋعا بولاتىنىن, جۇمىستى قالاي جۇيەلى ۇيىمداستىرۋ كەرەك ەكەنىن تالقىلايدى. بۇل باستاما تۋريستەر مەن تاۋ كۋرورتتارىنا كەلۋشىلەرگە عانا ەمەس, جەرگىلىكتى تۇرعىندارعا دا پايداسىن تيگىزۋى ءتيىس. جەرگىلىكتى حالىق جۇمىسقا ورنالاسۋ مۇمكىندىگىنە يە بولادى, ال شاعىن جانە ورتا بيزنەس وكىلدەرى مەيرامحانا, كافە, قوناقۇي سياقتى نىساندار اشۋعا مۇمكىندىك الادى», دەدى اندرەي كۋكۋشكين.
سونداي-اق, ەۋرازيالىق تاۋ كۋرورتتارى اليانسىنىڭ باس حاتشىسى ەۋروپا ەلدەرىنىڭ ءوز تابيعي مۇمكىندىكتەرىن ءتيىمدى پايدالانىپ, تۋريزم ارقىلى ايتارلىقتاي تابىس تاۋىپ وتىرعانىن ايتتى. ەۋروپادا تۋريزم سالاسى ىشكى جالپى ءونىمنىڭ – 10%-ى. ءتىپتى كورشىلەس ازەربايجاننىڭ وزىندە ءتۋريزمنىڭ ءىجو-دەگى ۇلەسى شامامەن 11%-عا جەتكەن. سوندىقتان قازاقستان دا الەۋەتتى ءتيىمدى پايدالانۋى قاجەت ەكەنىن ايتتى.
«وسى ماقساتتا ءارتۇرلى ەلدەن كاسىبي مامانداردى شاقىرىپ, ولاردىڭ تاجىريبەسىن الماسۋعا مۇمكىندىك جاساپ وتىرمىز. كوپتەگەن مەملەكەتتە تاۋ كلاستەرلەرى الدەقاشان تابىستى جۇمىس ىستەپ, حالىققا پايدا اكەلىپ جاتىر. ءبىزدىڭ اليانسقا مۇشە شەتەلدىك ارىپتەستەرىمىز دە وزدەرىنىڭ وزىق تاجىريبەلەرىن ورتاعا سالادى. بۇگىنگى فورۋم وسى باعىتتا وتەدى.
ەرتەڭنەن باستاپ اۋقىمدى سپورتتىق باعدارلاما باستالادى. تاۋ كۋرورتتارى جاتتىقتىرۋشىلارى اراسىندا تاۋ شاڭعىسى پاندەرى بويىنشا تمد ەلدەرىنىڭ اشىق چەمپيوناتىن وتكىزەمىز. جارىستىڭ ءبىرىنشى كۇنى «شىمبۇلاق» كۋرورتىندا, ەكىنشى كۇنى «ويقاراعاي» كۋرورتىندا وتەدى. قاتىسۋشىلار جوعارى دەڭگەيدە شەبەرلىكتەرىن كورسەتەدى», دەدى اندرەي كۋكۋشكين.
الماتى تاۋلارىنا تۋريست تارتۋدى تاۋلىگىنە 5 ەسەگە كوبەيتۋ كوزدەلىپ وتىر
ۇيىمداستىرۋشىلار الداعى ۋاقىتتا قاۋىپسىزدىك, بەتكەيلەردى دايىنداۋ جانە تاۋ كۋرورتتارىنىڭ باسقا دا باعىتتارى بويىنشا تاجىريبە الماسۋ جوسپارلانىپ وتىرعانىن جەتكىزدى.
