بالا كوپتىك ەتپەيدى, بىراق باقشا جەتپەيدى

ايتايىن دەگەنىم... بۇگىندە ەلىمىزدە “بالاپان” باع­دارلاماسى جۇمىس ىستەپ جاتىر. ءبىر­اق ول پروبلەمانى ءبىر دەستە شەشىپ تاستاي المايتىنى تۇسىنىكتى. وسى رەت­تە قازاقستاننىڭ وزگە قالا­لا­رىن­داعىداي, سەمەيدە دە بالاباق­شا­لار قاجەتتىگى تۋىنداپ تۇر. اتا-انالارعا ءبارىبىر, ءتىلى ورىسشا ما, قازاقشا ما, تاڭداپ جاتۋعا شاما جوق, ايتەۋىر بالالارىن بالاباق­شا­عا ىلىندىرسە بولعانى. مىنە, ەكى جىلدان بەرى سابيلەردى بالاباقشاعا بەرۋ ءۇشىن كەزەككە جازاتىن قالالىق ءبىلىم بولىمىندە ارنايى جۇمىس ۇيىمداستىرىلۋدا. قازىردىڭ وزىندە وندا ءتىزىم بويىنشا بالاباقشاعا بارۋى ءتيىس 5000-نان استام بالا كە­زەكتە تۇر. ءتىپتى وتكەن جىلى بالا­باقشالارعا ورنالاستىرىلعان 600 بالانى ەسەپكە الماعاننىڭ وزىندە, ءدال قازىرگە دەيىن تۋعان سابيلەردى تۋا سالىسىمەن كەزەككە جازىپ قويىپتى. باسقا امال جوق. بىلتىر 2-4 جاس ارالىعىنداعى 500-دەي با­لانىڭ عانا بالاباقشاعا ورنالاسۋ مۇمكىندىگى بولدى. جۇزدەپ ەمەس, مىڭداپ جازىلعان كەزەككە قاراپ, جاعداي ەگەر وسى كۇيدە قالسا, بالا­لاردىڭ كوپشىلىگى بالاباقشانىڭ نە ەكەنىن بىلمەي ءوسۋى مۇمكىن. شىنىنا كەلگەندە, سەمەيدەگى كوپتەگەن بالاباقشالار وڭتايلان­دى­رۋ كەزىندە ساتىلىپ, جەكەشە­لەن­دىرى­لىپ كەتكەن. قازىر ول جەرلەردە شاعىن جانە ورتا بيزنەس نىسان­دارى, ءتۇرلى مەكەمەلەر ورنالاسقان. سوندىقتان دا جاڭا عيماراتتار سالىنسا, بۇل جاقتا پەداگوگ كادرلار جەتكىلىكتى. وتكەن جىلدىڭ تامىز ايىندا “يۋنوست” كەنتىندە 320 ورىندىق جاڭا بالاباقشا اشىلدى. ازىرشە بۇل تەڭىزگە تامعان تامشى ىسپەتتەس. سەمەيلىكتەر وزدەرىنىڭ الەۋمەتتىك جاعدايلارىنا سايكەس, بالالارىن اقشاسىن ازداۋ تولەيتىن مەم­لە­كەت­تىك بالاباقشالارعا ورنالاستىر­عى­سى كەلەدى. قالا بويىنشا مۇنداي بالاباقشا سانى – 12. جەكەمەن­شىكتە 3 بالاباقشا بار, بىراق وندا اقى 19-25 مىڭ تەڭگە كولەمىندە. قالالىق ءبىلىم ءبولىمى ماماندارى­نىڭ حابارلاۋىنشا, بالاباقشا­لارعا ورنالاستىرۋ ءۇشىن قازىر ارنايى كوميسسيا جۇمىس ىستەپ جاتقان كورىنەدى. قالاي دەسەك تە, سەمەيدە بالاباقشالار مەن بوبەكجايلار سانى ارتسا, نۇر ۇستىنە نۇر بولار ەدى. ويتكەنى, وسى كەزدە بىرەۋ تاربيەشى جالداپ, ال بىرەۋلەر بالالارىن اتا-اپالارىنا نەمەسە تانىستارىنا تاسىپ اۋرە بولىپ جۇرگەنى راس. راۋشان نۇعمانبەكوۆا, سەمەي.