فوتو: قازاقستان حوككەي فەدەراتسياسى
مەملەكەت باسشىسى قازاقستاندىق كلۋبتىڭ cەنساتسيالىق جەتىستىگى وتاندىق سپورتتاعى ايتۋلى ۋاقيعا ەكەنىن اتاپ ءوتتى.
قاسىم-جومارت توقاەۆ جوعارى شەبەرلىك دەڭگەيى مەن جەڭىسكە دەگەن ىنتا-جىگەرىن پاش ەتىپ, اقتىق سىندا حوككەيدىڭ وتانى سانالاتىن كانادالىقتاردان باسىم تۇسكەن ورەندەرىمىزگە ريزاشىلىعىن جەتكىزدى.
پرەزيدەنت جاس حوككەيشىلەردىڭ تاباندى تۇردە جاتتىعىپ, كۇش-قايراتتارىن شىڭداپ, بۇدان دا بيىك اسۋلاردى باعىندىرۋىنا تىلەكتەستىك ءبىلدىردى.
كۆەبەك قالاسىندا وتكەن حالىقارالىق Quebec International Pee-Wee Hockey Tournament دوداسىندا الەمنىڭ 16 ەلىنەن كەلگەن 120 ازۋلى ۇجىمنىڭ اراسىنان AA Elite ديۆيزيونىندا Astana Team كومانداسى التىن تۇعىردان كورىنىپ, ەل مەرەيىن ۇستەم ەتتى. ايتا كەتەرلىگى, قۇراما ساپىندا ەلوردالىق «استانا», «يۋنوست» جانە «تايگەرس» كلۋبتارىمەن قاتار, شىعىستىڭ «تورپەدو» مەكتەبىنىڭ تاربيەلەنۋشىلەرى دە ونەر كورسەتىپ, ورتاق جەڭىسكە ۇلەس قوستى.
