فوتو: اشىق دەرەككوز
وسى ترانسفورماتسيانىڭ جارقىن مىسالى – 2022 جىلى اتىراۋدا ىسكە قوسىلعان KPI زاۋىتى. جىلدىق قۋاتى 500 مىڭ توننا پوليپروپيلەن وندىرۋگە ەسەپتەلگەن بۇل كەشەن ەلدەگى العاشقى ينتەگراتسيالانعان گاز-حيميا جوباسى.
«ىسكە قوسىلعاننان بەرى كاسىپورىن 800 مىڭ توننادان استام ءونىم وندىرسە, سونىڭ 375 مىڭ تونناسى تەك 2025 جىلدىڭ ۇلەسىنە تيەسىلى. قازىرگى تاڭدا زاۋىت ىشكى نارىقتاعى پوليپروپيلەنگە دەگەن سۇرانىستىڭ 83 پايىزىن قامتاماسىز ەتىپ وتىر. ناتيجەسىندە يمپورتقا تاۋەلدىلىك ايتارلىقتاي قىسقاردى», دەپ حابارلادى ەنەرگەتيكا مينيسترلىگىنىڭ ءباسپاسوز قىزمەتى.
2021 جىلى شىمكەنتتە جىلىنا 57 مىڭ توننا مەتيل-ترەت-بۋتيل ەفيرىن (متبە) وندىرەتىن كاسىپورىن پايدالانۋعا بەرىلدى. بۇل جوبا ىشكى نارىق قاجەتتىلىگىن وتەپ قانا قويماي, ەكسپورت كولەمىن ارتتىرۋعا دا مۇمكىندىك بەردى.
قازاقستاندا مۇناي-گاز حيمياسى ونىمدەرىنىڭ ءوندىرىسى 12%-عا ارتقان
سالا دامۋى ءىرى ينۆەستيتسيالىق باستامالار ارقىلى جالعاسىپ كەلەدى جانە ولار ەنەرگەتيكا مينيسترلىگىنىڭ ەرەكشە باقىلاۋىندا.
«قازىر جىلىنا 1,25 ملن توننا پوليەتيلەن وندىرەتىن زاۋىتتىڭ قۇرىلىسى قارقىندى ءجۇرىپ جاتىر. جوبانى 2029 جىلى ىسكە قوسۋ جوسپارلانعان. بۇل – ستراتەگيالىق ماڭىزى زور نىسان. سەبەبى بۇگىندە ەلدەگى پوليەتيلەنگە دەگەن سۇرانىس تولىقتاي يمپورت ەسەبىنەن جابىلىپ وتىر», دەلىنگەن حابارلامادا.
سونىمەن قاتار 2027 جىلى جىلدىق قۋاتى 100 مىڭ توننا الكيلات وندىرەتىن زاۋىتتى ىسكە قوسۋ كوزدەلگەن. قۇرىلىس جۇمىستارى بەلسەندى جۇرگىزىلىپ جاتىر.
جوبالاۋ كەزەڭىندە تاعى ەكى ءىرى ءوندىرىس بار: 800 مىڭ توننا كارباميد شىعاراتىن كەشەن جانە 340 مىڭ تونناعا دەيىن بۋتاديەن وندىرەتىن جوبا. بۇل نىسانداردى 2029 جىلى پايدالانۋعا بەرۋ جوسپارلانعان.
پوليپروپيلەن مەن پوليەتيلەن – زاماناۋي ەكونوميكانىڭ نەگىزگى ماتەريالدارى. ولارسىز مىڭداعان كۇندەلىكتى جانە وندىرىستىك ءونىمدى ەلەستەتۋ مۇمكىن ەمەس.
پوليپروپيلەن – ازىق-ت ۇلىككە ارنالعان تەرموتوزىمدى قاپتامالار, مەديتسيناداعى ءبىر رەتتىك شپريتستەر مەن ماسكالار, اۆتوكولىك بولشەكتەرى, قۇرىلىس سالاسىنداعى بەرىك ەلەمەنتتەر مەن ىستىق سۋ قۇبىرلارى وندىرىسىندە قولدانىلادى.
پوليەتيلەن – يكەمدى قاپتامالار مەن پلەنكالار, تۇرمىستىق حيمياعا ارنالعان قاتتى كونتەينەرلەر, كابەل وقشاۋلاعىشتارى, گاز جانە سۋ قۇبىرلارى ءۇشىن ۇزاقمەرزىمدى ماتەريال رەتىندە كەڭىنەن پايدالانىلادى.
وتاندىق پوليمەر ءوندىرىسىن دامىتۋ ىشكى نارىقتى قامتىپ قانا قويماي, جەرگىلىكتى گرانۋلا نەگىزىندە دايىن ءونىم شىعاراتىن جۇزدەگەن شاعىن جانە ورتا كاسىپورىندارعا بەرىك شيكىزات بازاسىن قالىپتاستىرۋعا مۇمكىندىك بەرەدى.
سالانى كەشەندى دامىتۋ ماقساتىندا ەنەرگەتيكا مينيسترلىگى 2024 جىلدىڭ قازان ايىندا 2030 جىلعا دەيىنگى مۇناي-گاز حيميا ونەركاسىبىن دامىتۋ جونىندەگى جول كارتاسىن بەكىتتى.
بۇدان بولەك, قازىرگى ۋاقىتتا «مۇناي-گاز حيميا ونەركاسىبى تۋرالى» ارنايى زاڭ جوباسى ازىرلەنىپ جاتىر. بۇل قۇجات وندىرىستەردى شيكىزاتپەن تۇراقتى قامتاماسىز ەتۋ مەحانيزمدەرىن زاڭنامالىق دەڭگەيدە بەكىتۋگە, جاڭا باعىتتاردىڭ پايدا بولۋىنا, قازاقستاندا تولىققاندى مۇناي-گاز حيميا كلاستەرىن قالىپتاستىرۋعا نەگىز بولماق.
جالپى العاندا, قولعا الىنعان جوبالار ەلدىڭ يندۋستريالىق دامۋىنا جاڭا سەرپىن بەرىپ, قازاقستاندى مۇناي-گاز حيمياسى سالاسىندا وڭىرلىك وندىرىستىك حابقا اينالدىرۋعا باعىتتالعان.
