ايزا مامبەكوۆا: مەملەكەت ءۇشىن بىرتۇتاستىق – ەڭ باستى قۇندىلىق
مانەرلەپ سىرعاناۋشى, 2013 جىلعى قازاقستان چەمپيونى, 2017-2018 جىلدارى ازيا جانە وليمپيادا ويىندارىنىڭ قاتىسۋشىسى ايزا مامبەكوۆا ەل بولاشاعى ءۇشىن بىرلىك پەن تۇراقتىلىقتىڭ ماڭىزىن اتاپ ءوتتى.
«مۇز ايدىنىندا ءار قوزعالىس دالدىككە, سەنىمگە جانە ىشكى تارتىپكە نەگىزدەلەدى. سول سياقتى, ەلىمىزدىڭ اتا زاڭىنىڭ كىرىسپەسىندە ۇلتتىق قۇندىلىقتارىمىزدىڭ مىزعىماس نەگىزى ناقتى ايقىندالدى. مانەرلەپ سىرعاناۋدا تەپە-تەڭدىك باستى قاعيدا بولسا, مەملەكەت ءۇشىن بىرتۇتاستىق پەن اۋماقتىق تۇتاستىق – ەڭ ماڭىزدى قۇندىلىق.
سپورتتا جەڭىس تەك جەكە شەبەرلىكپەن ەمەس, ەلدىڭ قولداۋىمەن كەلەدى. ەلدىڭ تۇراقتىلىعى مەن قاۋىپسىزدىگى دە ءار ازاماتتىڭ بىرلىگى مەن سەنىمىنە بايلانىستى. ءبىز تاريحىمىزدى قۇرمەتتەپ, بولاشاعىمىزدى بىرگە قالىپتاستىرامىز», دەدى سپورتشى.
مادينا سادۋاقاسوۆا: كونستيتۋتسيا مازمۇنى جاڭارىپ, بەرىك قۇقىقتىق نەگىز قالانۋدا
قازاقستاندىق ءانشى مادينا سادۋاقاسوۆا جاڭا كونستيتۋتسيا جوباسىنىڭ جاريالانۋىنا قاتىستى پىكىر ءبىلدىردى.
«جاڭا كونستيتۋتسيانىڭ جوباسى جاريالاندى. جاڭا اتا زاڭىمىز قولدانىستاعى باپتاردىڭ باسىم بولىگىنە تۇزەتۋ ەنگىزۋ قاجەتتىلىگى جاڭا رەداكتسيا قابىلداۋدى زاڭدى ەتتى. سونىڭ ناتيجەسىندە كونستيتۋتسيا مازمۇنى جاڭارىپ, ەل بولاشاعىنا بەرىك قۇقىقتىق نەگىز قالانۋدا.
قازىرگى كۇردەلى كەزەڭدە ىشكى تۇراقتىلىقتى ساقتاپ, جۇيەلى رەفورمالاردى جۇزەگە اسىرۋ – مەملەكەتتىڭ باستى جەتىستىگى», دەدى ول.
نۇرعيسا ادىلەت ۇلى: ەل بولاشاعى ءۇشىن ءار داۋىس ماڭىزدى
اۋىر اتلەتيكادان 2024 جىلعى الەم چەمپيونى, 2022 جىلعى الەم چەمپيوناتىنىڭ كۇمىس جۇلدەگەرى جانە ازيا چەمپيونى نۇرعيسا ادىلەت ۇلى 15 ناۋرىزدا وتەتىن رەسپۋبليكالىق رەفەرەندۋمنىڭ ساياسي ماڭىزىن اتاپ ءوتتى.
«15 ناۋرىز – ەلىمىز ءۇشىن ساياسي ماڭىزدى وقيعا. رەفەرەندۋم تەك داۋىس بەرۋ عانا ەمەس – ازاماتتىق جاۋاپكەرشىلىك, ەل تاعدىرىنا بەيجاي قاراماۋ. ەل بولاشاعى ءۇشىن ءار داۋىس ماڭىزدى. جارقىن بولاشاق ءۇشىن داۋىس بەرۋگە شاقىرامىن», دەدى چەمپيون.
شاعبان ەرلان: كونستيتۋتسيالىق رەفەرەندۋم – بولاشاعىمىز ءۇشىن جاسالاتىن ەڭ ماڭىزدى قادام
الەم چەمپيونى, كيكبوكسەر شاعبان ەرلان دا رەفەرەندۋمنىڭ ەل ءۇشىن ماڭىزدى كەزەڭ ەكەنىن جەتكىزدى.
ء«بىز ءۇشىن كيكبوكسينگتە ءار ءسات تاعدىردى شەشەدى. ءاربىر سوققى, ءاربىر ءادىس جەكپە-جەك جەڭىمپازىن انىقتاپ كەتۋى مۇمكىن. سول سەكىلدى قازىر ءبىزدىڭ ەلىمىز ءۇشىن تاعدىر شەشتى كەزەڭ كەلە جاتىر.
اتا زاڭىمىزدىڭ باسىم بولىگىنە وزگەرىستەر ەنگەلى تۇر. ومىردە جانە سپورتتا ءاربىر سەكۋند ماڭىزدى. ءبىز شارشى الاڭعا شىققاندا تەك كۇشىمىزگە ەمەس, ناقتى جوسپار مەن دۇرىس شەشىمگە سەنەمىز. ءبىر ءسات كەشىگۋ مەن بوساڭسۋ جەڭىلىسكە اكەلۋى مۇمكىن. وتانىمىزدىڭ تاعدىرى دا رينگتەگى ايقاس سياقتى. مۇندا سىرتتان باقىلاپ تۇرۋعا بولمايدى. كونستيتۋتسيالىق رەفەرەندۋم ءبىزدىڭ ورتاق بولاشاعىمىز ءۇشىن جاسالاتىن ەڭ ماڭىزدى قادام. 15 ناۋرىزدا ەلىمىزدىڭ بولاشاعىنا حالىق بولىپ جۇمىلايىق. ەلىمىزدىڭ بولاشاعى ءبىزدىڭ قولىمىزدا», دەدى سپورتشى.
ايتا كەتەيىك, رەفەرەندۋم 15 ناۋرىز كۇنى وتەدى. قوعام قايراتكەرلەرى مەن سپورتشىلار ەل ازاماتتارىن بەلسەندىلىك تانىتىپ, ماڭىزدى ساياسي ناۋقانعا قاتىسۋعا شاقىرىپ وتىر.
