پرەزيدەنت الدىمەن «U.S. International Development Finance» كورپوراتسياسىنىڭ (DFC) اتقارۋشى ديرەكتورى بەن بلەكتى قابىلدادى.
بەدەلدى حالىقارالىق قارجى ينستيتۋتى باسشىسىمەن كەزدەسۋدە ينۆەستيتسيالىق ىنتىماقتاستىقتى كەڭەيتۋ جانە بىرلەسكەن جوبالاردى جۇزەگە اسىرۋ كەلەشەگى تالقىلاندى.
مەملەكەت باسشىسى كورپوراتسيانى قازاقستاننىڭ ورنىقتى دامۋداعى ماڭىزدى سەرىكتەسى دەپ اتاپ, ەكونوميكانىڭ ءتۇرلى سەكتورىنداعى ىقپالداستىقتى تەرەڭدەتۋگە ءازىر ەكەنىن راستادى.
بەن بلەك پرەزيدەنت دونالد ترامپ پەن ونىڭ اكىمشىلىگى قازاقستانمەن تىعىز ءارى ءوزارا ءتيىمدى ىنتىماقتاستىقتى نىعايتۋعا باسا ءمان بەرەتىنىن ايتتى. وسى ورايدا ول ايماقتىق جانە وڭىرارالىق ساۋدانى كەڭەيتۋدە ستراتەگيالىق ماڭىزعا يە تاۋ-كەن ءوندىرىسى, كولىك-ترانزيت ينفراقۇرىلىمى سالالارىندا بىرلەسكەن جوبالاردى جۇزەگە اسىرۋدىڭ مۇمكىندىگى مول ەكەنىنە نازار اۋداردى.
* * *
ودان سوڭ مەملەكەت باسشىسى قاسىم-جومارت توقاەۆ Boeing كومپانياسىنىڭ اتقارۋشى ۆيتسە-پرەزيدەنتى دجەفف شوككيدى قابىلدادى.
اۆياتسيا, قورعانىس جانە عارىش تەحنيكالارىن شىعاراتىن «Boeing» ترانسۇلتتىق كورپوراتسياسىنىڭ باسشىلىعىمەن كەزدەسۋدە پرەزيدەنت وتاندىق «Air Astana», «SسAT» جانە «Vietjet Qazaqstan» كومپانيالارى ەلىمىزدەگى اۆياتسيا سالاسىن دامىتۋدا ەرەكشە ماڭىزعا يە ورتاق جوبالاردى ودان ءارى ىلگەرىلەتۋگە مۇددەلى ەكەنىن اتاپ ءوتتى.
بۇل رەتتە قاسىم-جومارت توقاەۆ «Air Astana» مەن «Boeing» اراسىندا ۇشاق جەتكىزۋ بويىنشا كەلىسىمگە قول قويىلعانىن قۇپتادى. بيىل جىل سوڭىنا دەيىن قۇراما شتاتتارعا تىكەلەي اۋە قاتىناسىن اشۋ ماقساتىندا «Boeing 787 Dreamliner» ۇشاقتارى ەلىمىزگە جەتكىزىلەدى دەپ جوسپارلانىپ وتىر. بۇدان بولەك, «SCAT» اۋە كومپانياسى قوسىمشا «Boeing» ۇشاقتارىن ساتىپ الماق. سونداي-اق امەريكالىق كورپوراتسيامەن سەرىكتەستىك نەگىزىندە شىمكەنت اۋەجايىندا العاشقى تەحنيكالىق قىزمەت كورسەتۋ جانە جوندەۋ ورتالىعىن اشۋ مۇمكىندىگى قاراستىرىلىپ جاتىر.
دجەفف شوككي كومپانيانىڭ تسيفرلاندىرۋ سالاسىنداعى جوسپارىمەن ءبولىسىپ, قازاقستاننىڭ كولىك-ترانزيت الەۋەتىنە جوعارى باعا بەردى. ونىڭ ايتۋىنشا, اۋەمەن جۇك تاسىمالداۋ باعىتىندا ناتيجەلى ىقپالداستىق ورناتۋعا مۇمكىندىك مول.
سونىمەن قاتار كەزدەسۋ بارىسىندا اۆياتسيا سالاسىنا مامان دايارلاۋ جانە ەلىمىزدەگى جۇك تاسىمالداۋشى ۇشاقتار پاركىن دامىتۋ كەلەشەگى تالقىلاندى.
* * *
پرەزيدەنت Ashmore Group حالىقارالىق ينۆەستيتسيالىق كومپانياسىنىڭ باس ديرەكتورى مارك كۋمبستى قابىلدادى. ولار ءوزارا ءتيىمدى بىرلەسكەن جوبالاردى ىسكە اسىرۋ ماسەلەلەرىن تالقىلادى.
پرەزيدەنت قاسىم-جومارت توقاەۆقا «Ashmore Healthcare International» كومپانياسى مەن «سامۇرىق-قازىنا ينۆەست» جشس-نىڭ بىرلەسىپ, قازاقستاندا حالىقارالىق كلينيكا سالۋ جوسپارى جونىندە مالىمەت بەرىلدى. بۇل باستاماعا الەمدىك دەڭگەيدەگى مەديتسينا وپەراتورى – «Mount Sinai Health System» كومپانياسىن تارتۋ كوزدەلگەن.
مەملەكەت باسشىسى ۇكىمەتتىڭ اتالعان ماڭىزدى جوباعا جان-جاقتى قولداۋ كورسەتۋگە دايىن ەكەنىن ايتتى.
مارك كۋمبس قازاقستان ەكونوميكاسىنىڭ ستراتەگيالىق سەكتورلارىندا ىنتىماقتاستىق ورناتۋ ءۇشىن زور الەۋەت بار ەكەنىنە نازار اۋداردى. سونىمەن قاتار ەكونوميكانىڭ باسىمدىققا يە جانە جوعارى تەحنولوگيالى سالالارىن دامىتۋعا باعىتتالعان اشىق ينۆەستيتسيالىق سەرىكتەستىك باعدارلاماسى اياسىنداعى ىقپالداستىق كەلەشەگى جايىندا پىكىر ءبولىستى.
* * *
قاسىم-جومارت توقاەۆ «Mars» كومپانياسىنىڭ باس اتقارۋشى ديرەكتورى پول ۆايراۋحتى قابىلدادى.
پرەزيدەنت قازاقستاننىڭ اۋىل شارۋاشىلىعى مينيسترلىگى مەن «Mars» كومپانياسى اراسىندا جالپى سوماسى 180 ملن دوللارعا جۋىقتايتىن ينۆەستيتسيالىق كەلىسىمگە قول قويىلعانىن قۇپتادى.
مەملەكەت باسشىسىنىڭ پىكىرىنشە, بۇل ۋاعدالاستىق ماڭىزدى ستراتەگيالىق سەرىكتەستىكتىڭ باستاۋى سانالادى جانە قازاقستان مەن اقش اراسىنداعى ىنتىماقتاستىقتىڭ دەڭگەيى جوعارى ەكەنىن كورسەتەدى.
جوبا اياسىندا «Mars» كومپانياسى الاتاۋ قالاسىندا ءۇي جانۋارلارىنا ارنالعان ازىق وندىرەتىن زاۋىت سالادى. ءوندىرىس ورنى اگروونەركاسىپ شيكىزاتىن تەرەڭ وڭدەۋگە جانە قوسىلعان قۇنى جوعارى تاۋار وندىرۋگە سەپتىگىن تيگىزەدى.
پول ۆايراۋح ءوزارا ءتيىمدى ينۆەستيتسيالىق كەلىسىمدى جۇزەگە اسىرۋعا قولداۋ كورسەتكەنى ءۇشىن قاسىم-جومارت توقاەۆقا العىس ايتتى. ول اتالعان باستاما «Mars» كومپانياسىنىڭ وندىرىستىك الەۋەتىن كەڭەيتۋگە جانە ورتالىق ازيا مەن كورشىلەس ايماقتار نارىعىنا ءونىم شىعارۋ كولەمىن ارتتىرۋعا مۇمكىندىك بەرەتىنىن جەتكىزدى.
