ايماق باسشىسى كونستيتۋتسيالىق رەفورمانىڭ ماڭىزدىلىعىنا توقتالىپ, جالپىحالىقتىق رەفەرەندۋمنىڭ ەل بولاشاعى ءۇشىن ايرىقشا مانگە يە ەكەنىن اتاپ ءوتتى.
«كونستيتۋتسيالىق رەفورما جونىندەگى جالپىحالىقتىق تالقىلاۋلار جارتى جىلعا جۋىق ۋاقىت ءارتۇرلى الاڭداردا ءوتتى. بۇل – قوعامنىڭ ساياسي بەلسەندىلىگى مەن ازاماتتىق جاۋاپكەرشىلىگىنىڭ ايقىن كورىنىسى. ەل تاعدىرىنا قاتىستى ماڭىزدى شەشىمدەردى حالىقتىڭ تىكەلەي داۋىس بەرۋىنە ۇسىنۋ – دەموكراتيانىڭ شىنايى ءارى مىزعىماس قاعيداتى. جاڭا كونستيتۋتسيا جوباسىندا مەملەكەتىمىزدىڭ ىرگەلى نەگىزدەرى, باستى قۇندىلىقتارى مەن دۇنيەتانىمدىق ۇستانىمدارى جۇيەلەنىپ, زاماناۋي تالاپتارعا ساي جاڭعىرتىلدى. جالپىحالىقتىق رەفەرەندۋم تاۋەلسىز قازاقستاننىڭ الداعى دامۋ كەزەڭىن ايقىنداپ, ەل تاريحىندا جاڭا بەلەستىڭ باستالۋىنا نەگىز بولادى دەپ سەنەمىز. پرەزيدەنتىمىزدىڭ باستاماسىمەن ەلىمىزدە كەيىنگى جىلدارى قولعا الىنعان ساياسي رەفورمالاردى جۇزەگە اسىرۋدا سىر ءوڭىرى بەرەكە-بىرلىكتىڭ, تاتۋ تىرلىكتىڭ ۇلگىسىن كورسەتىپ كەلەدى. ۇلتىمىزدىڭ تاريحىنا التىن ارىپپەن جازىلاتىن الداعى ماڭىزدى ساياسي كەزەڭدە سىر جۇرتشىلىعى ەلىمىزدىڭ شىنايى پاتريوتى رەتىندە ازاماتتىق ۇستانىمدارىن ءبىلدىرىپ, جاڭا كونستيتۋتسيانىڭ جوباسىن قولدايدى دەپ سەنەمىز. بارشاڭىزدى وسى ىسكە جوعارى جاۋاپكەرشىلىكپەن بەلسەندى اتسالىسۋعا شاقىرامىن», دەدى وبلىس اكىمى.
جيىندا كونستيتۋتسيالىق رەفورمانىڭ قۇقىقتىق نەگىزدەرى, «زاڭ مەن ءتارتىپ» قاعيداتىنىڭ ۇستەمدىگى باعىتىندا وبلىس پروكۋرورى ريزابەك وجاروۆ بايانداما جاسادى. قازاقستاننىڭ ەڭبەك سىڭىرگەن قايراتكەرى, ساياسي عىلىمدار دوكتورى, پروفەسسور, قازاقستان رەسپۋبليكاسى سەناتورلار كەڭەسىنىڭ مۇشەسى مۇرات باقتيار ۇلى كونستيتۋتسيانىڭ جاڭا جوباسى جايلى پىكىر ءبىلدىرىپ, كەيبىر ماسەلەلەرگە توقتالا كەتتى.
«ەل ىشىندە جۇرگەسىن «نەگە كونستيتۋتسيانى وزگەرتە بەرەدى؟» دەگەن ساۋالدى قۇلاعىمىز شالىپ قالىپ جاتىر. زامان وزگەرىپ, قوعامنىڭ سۇرانىسى جاڭا ساتىعا كوتەرىلگەن سايىن وسىنداي وزگەرىستەردىڭ بولىپ تۇراتىنى – زاڭدىلىق. مىسالى, فرانتسيا مەملەكەتى قازىرگى كونستيتۋتسياسىن 1958 جىلى قابىلداعان. وسى جىلدار ىشىندە وعان 24 مارتە وزگەرىس ەنگىزىلىپتى. رەسەيدە, ورتا ازياداعى بۇرىنعى وداق قۇرامىنداعى مەملەكەتتەر دە وسى جولدان ءوتتى», دەيدى ول.
قايراتكەر ءسوز تۇيىنىندە جاڭا كونستيتۋتسيا جوباسىنىڭ ماڭىزدى باعىتتارىنىڭ ءبىرى مەملەكەتتىڭ الەۋمەتتىك جاۋاپكەرشىلىگىن كۇشەيتۋ ەكەنىن ەسكە سالدى.
كەزدەسۋدە قورقىت اتا اتىنداعى قورقىت اتا ۋنيۆەرسيتەتىنىڭ باسقارما توراعاسى-رەكتورى ناۋرىزباي بايقاداموۆ «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن» جالپىۇلتتىق كواليتسياسىنىڭ ۇگىت-ناسيحات جۇمىستارى جايلى ايتتى. ەڭبەك ۇجىمدارىمەن, تۇرعىندارمەن كەزدەسۋلەردە كونستيتۋتسيا جوباسى جايلى ءار سالا ماماندارى تۇسىندىرمە جاسايدى.
جيىندا ءبىلىم سالاسىنىڭ ارداگەرى رايكۇل باينازاروۆا اتا زاڭ جوباسىنداعى عىلىم, يننوۆاتسيا, مادەنيەت, وبلىستاعى ۇەۇ اليانسى توراعاسى انار ىزدەن ازاماتتار بوستاندىعى مەن قۇقىعى, ال «اناعا تاعزىم» ورتالىعىنىڭ ديرەكتورى التىناي مولجانوۆا وتباسى جانە نەكە قۇندىلىعى جونىندە پايىمدى پىكىر ءبىلدىردى.
قىزىلوردا
