حوككەي. «بارىس» پرەزيدەنت كۋبوگىن يەمدەندى

استانا. 13 تامىز. بۇگىن استانادا حوككەيدەن قازاقستان پرەزيدەنتىنىڭ كۋبوگى ءۇشىن وتكەن جارىس مارەسىنە جەتتى. فينالدا ۆلاديۆوستوكتىڭ «ادميرالىن» 3:2 ەسەبىمەن جەڭگەن «بارىس» كومانداسى تۋرنير جەڭىمپازى اتاندى. بۇل تۋرالى egemen.kz حابارلادى. ويىن جاڭادان اشىلعان مۇز سارايىندا وينالدى. العاشقى كەزەڭدە بىرنەشە تاماشا مۇمكىندىكتەر بولعانىمەن, ەسەپ اشىلعان جوق. ال كەزدەسۋدىڭ ەكىنشى جارتىسىندا جانكۇيەرلەر ءتورت بىردەي شايبانىڭ كۋاسى بولدى. الدىمەن ايدىن يەلەرى ەسەپ اشتى. ماتچتىڭ 21-مينۋتىندا كوماندا كاپيتانى برەندون بوچەنسكي قارسىلاستاردىڭ قاقپاسىنان ساڭىلاۋ تاۋىپ, مەرگەندىگىمەن كوزگە ءتۇستى. ارادا 4 مينۋت ۋاقىت وتكەندە قوناقتار تارازى باسىن تەڭەستىردى. ناتيجەلى سوققىنىڭ اۆتورى – ماكسيم مامين. ۇزدىكسىز شابۋىلداردىڭ ناتيجەسىندە بارىستىقتار تاعى دا ەسەپتە العا شىقتى. 36-مينۋتتا سوعىلعان شايبا ەۆگەني رىمارەۆتىڭ اتىنا جازىلدى. الايدا, بۇل جولعى باسىمدىق 35 سەكۋند قانا ساقتالدى. ءبىر مينۋت وتپەي جاتىپ «ادميرال» حوككەيشىسى كونستانتين ماكاروۆ تاعى دا ەسەپتى تەڭەستىرىپ كەتتى. ءۇشىنشى كەزەڭدە تابلوداعى ەسەپ وزگەرگەن جوق. سوعان سايكەس كوماندالار قوسىمشا تايمعا جۇگىندى. بۇل سىندا «بارىستىڭ» جولى بولدى. 63-مينۋتتا رومان ستارچەنكو جەڭىس شايباسىن سوعىپ, كومانداسىنا جەڭىس سىيلادى. وسىلايشا, ەلوردالىقتار جاڭا ماۋسىمدى جارقىن جەڭىسپەن باستادى. وسى جەڭىستىڭ «بارىستىڭ» باس جاتتىقتىرۋشىسى ەرلان ساعىمباەۆ ءۇشىن دە ماڭىزى زور ەكەنى بەلگىلى. سەبەبى, بۇل ونىڭ كوماندانىڭ باس جاتتىقتىرۋشىسى رەتىندە رەسمي تۇردە قاتىسقان العاشقى جارىسى. ويىن بارىسىندا «بارىس» قاقپاسىن يان لاتسو قورعاسا, «ادميرال» ساپىندا يگور بوبكوۆقا سەنىم ارتىلعانىن ايتا كەتەيىك. اتالعان سايىستا جۇلدەلى ءۇشىنشى ورىن رەسەيدىڭ حانتى-مانسيسك قالاسىنان كەلگەن «يۋگرا» كومانداسىنا بۇيىردى. قولا مەدال ءۇشىن بولعان ويىندا ول نوۆوكۋزنەتسكىنىڭ «مەتاللۋرگىنەن» 1:0 ەسەبىمەن باسىم ءتۇستى. ەلامان قوڭىر. دەرەك: egemen.kz. سۋرەت: vesti.kz.