ءىس-شاراعا عىلىم جانە جوعارى ءبىلىم ءمينيسترى ساياسات نۇربەك, قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆ, قازاقستان شاحمات فەدەراتسياسىنىڭ ۆيتسە-پرەزيدەنتى دارمەن سادۋاقاسوۆ جانە قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما توراعاسى – رەكتورى بەيبىتكۇل كارىموۆا قاتىستى.
KazChessLab – بولاشاق مۇعالىمدەردى جالپى ءبىلىم بەرەتىن مەكتەپتەردە شاحمات ءپانىن وقىتۋعا دايارلاۋعا باعىتتالعان زاماناۋي ءبىلىم بەرۋ الاڭى. زەرتحانا شاحماتتىق ءبىلىم بەرۋ ادىستەمەسىن دامىتۋ ورتالىعىنا اينالىپ, ستۋدەنتتەردىڭ پراكتيكالىق وقىتۋ داعدىلارىن قالىپتاستىرۋعا مۇمكىندىك بەرەدى. ورتالىقتا شەبەرلىك ساباقتارى, عىلىمي سەمينارلار, ستۋدەنتتەردىڭ پراكتيكالىق ساباقتارى وتكىزىلەدى.
اشىلۋ سالتاناتىندا عىلىم جانە جوعارى ءبىلىم ءمينيسترى ساياسات نۇربەك ءسوز سويلەپ, شاحماتتى ستراتەگيالىق تۇرعىدا دامىتۋ قادامدارىنا توقتالدى.
«2023 جىلى مەملەكەت باسشىسى قاسىم-جومارت توقاەۆتىڭ تاپسىرماسىمەن شاحمات ويىنىن ستراتەگيالىق تۇرعىدا دامىتۋ تۋرالى جوسپارى بەكىتىلدى. ءار بالا مەكتەپ كەزىنەن شاحماتپەن تانىس بولىپ, جەتىك مەڭگەرۋى ءتيىس. قازىرگى تاڭدا ەلىمىزدە شاحمات بويىنشا ايتارلىقتاي بيىك جەتىستىكتەرىمىز بار. وسى جەتىستىكتەرىمىزدى ارى قاراي دامىتۋ ءۇشىن ەڭ الدىمەن ۇستازدار قاجەت», دەدى مينيستر.
باعدارلاما پەداگوگيكالىق ماماندىقتار ستۋدەنتتەرىنە ارنالىپ, minor فورماتىندا جۇزەگە اسىرىلادى. كۋرستى تامامداعان بولاشاق مۇعالىمدەر مەكتەپتە شاحمات ءپانىن وقىتۋ قۇقىعىن راستايتىن سەرتيفيكات الادى. ءىس-شارا اياسىندا وسى باعىت بويىنشا دايارلىقتان وتكەن العاشقى 25 جاس مامانعا سەرتيفيكاتتار تابىستالدى.
باسقارما توراعاسى – رەكتور بەيبىتكۇل كارىموۆا شاحماتتى وقىتۋدىڭ ماڭىزدىلىعىنا ەرەكشە توقتالىپ, ستۋدەنتتەر مەن وقىتۋشىلارعا ساتتىلىك تىلەدى.
«ۋنيۆەرسيتەتىمىزدە KazChessLab يننوۆاتسيالىق زەرتحاناسىنىڭ اشىلۋى – ءبىلىم بەرۋ مازمۇنىن جاڭعىرتۋعا, بولاشاق پەداگوگتەردىڭ كاسىبي الەۋەتىن ارتتىرۋعا باعىتتالعان ماڭىزدى قادام. شاحمات – جاي عانا ويىن ەمەس. ول – ستراتەگيالىق ويلاۋ مادەنيەتى, جاۋاپكەرشىلىك پەن تاباندىلىق مەكتەبى. وسى ءپاندى كاسىبي دەڭگەيدە وقىتا الاتىن مۇعالىمدەردى دايارلاۋ – بۇگىنگى كۇننىڭ وزەكتى مىندەتى», دەدى رەكتور.
قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆ كوپجىلدىق جۇمىستىڭ قورىتىندىسىن جاساپ, لابوراتوريانىڭ اشىلۋىن تاريحي كەزەڭ رەتىندە باعالادى.
«قازاقستاندا شاحمات بىرنەشە جىل بويى وسى ماقساتقا جەتۋگە ۇمتىلدى. بۇل جاس ماماندار بالالارعا تەك ويىن ەرەجەلەرىن ۇيرەتىپ قانا قويماي, ولاردىڭ ينتەللەكتۋالدى دامۋىنا جول كورسەتەتىن ۇستازعا اينالادى. زاماناۋي ينفراقۇرىلىم, مىقتى پەداگوگيكالىق مەكتەپ جانە مەملەكەتتىك قولداۋدىڭ سينەرگياسى قازاقستانداعى شاحماتتى جانە شاحماتتىق ءبىلىمدى جاڭا دەڭگەيگە كوتەرەتىنىنە سەنىمدىمىن», دەدى ول.
