كەڭەس جۇمىسىنا ديپلوماتيالىق كورپۋس وكىلدەرى, سونىڭ ىشىندە اقش-تىڭ جاڭادان تاعايىندالعان ەلشىسى دجۋلي م. ستاففت, سونداي-اق حالىقارالىق كومپانيالار, بيزنەس قاۋىمداستىق جانە مەملەكەتتىك ورگانداردىڭ باسشىلارى قاتىستى.
فاريدا جولداسوۆا: كونستيتۋتسيانىڭ مازمۇنى جاڭارىپ, ەل بولاشاعىنا بەرىك قۇقىقتىق نەگىز قالانىپ جاتىر
وتىرىستا ءسوز سويلەگەن پرەمەر-مينيستر قازاقستاندا جۇرگىزىلىپ جاتقان كونستيتۋتسيالىق رەفورمانىڭ ماڭىزدىلىعىن اتاپ ءوتتى.
«قازاقستان ماڭىزدى ساياسي كەزەڭنەن وتۋدە. 15 ناۋرىزدا جالپىحالىقتىق رەفەرەندۋمدا ازاماتتار جاڭا كونستيتۋتسيا جوباسى بويىنشا داۋىس بەرەدى. بۇل ىرگەلى قۇجات پرەزيدەنت قاسىم-جومارت توقاەۆ باستاماشىلىق ەتكەن جانە ادىلەتتى ءارى قۋاتتى قازاقستان قۇرۋعا باعىتتالعان اۋقىمدى ساياسي رەفورمالاردى تولىق قامتيدى.
ءبىز ءۇشىن باستى باسىمدىق – تۇراقتى ەكونوميكالىق ءوسىمدى قامتاماسىز ەتۋ ارقىلى ازاماتتاردىڭ تابىسىن ارتتىرۋ جانە ءومىر ساپاسىن جاقسارتۋ. وسى ماقساتقا جەتۋ ءۇشىن جاڭا ينۆەستيتسيالىق تسيكلدى تولىققاندى ىسكە قوسۋعا باعىتتالعان كەشەندى شارالاردى جۇزەگە اسىرىپ جاتىرمىز», دەدى ولجاس بەكتەنوۆ.
سونىمەن قاتار 19 اقپاندا ۆاشينگتوندا وتكەن بەيبىتشىلىك كەڭەسىنىڭ العاشقى وتىرىسىنىڭ ەرەكشەلىگىنە نازار اۋدارىلدى.
«كەشە مەملەكەت باسشىسى بەيبىتشىلىك كەڭەسىنىڭ ءبىرىنشى وتىرىسىنا قاتىسىپ, اقش پرەزيدەنتى دونالد ترامپتىڭ تاياۋ شىعىستاعى جاعدايدى تۇراقتاندىرۋعا باعىتتالعان باستاماسىنا قولداۋ ءبىلدىردى. قازاقستان گازانى قالپىنا كەلتىرۋ ۇدەرىستەرىنە قاتىسۋعا مۇددەلى. امەريكا قۇراما شتاتتارىمەن قارىم-قاتىناستاردىڭ ورنىقتى دامۋى قازاقستاننىڭ سىرتقى ساياساتىنىڭ نەگىزگى باعىتتارىنىڭ ءبىرى بولىپ قالا بەرەدى», دەدى پرەمەر-مينيستر.
اقش-تىڭ قازاقستانداعى قاسىم-جومارت توقاەۆتىڭ ۆاشينگتوندا جاھاندىق ارەنادا سويلەگەن ءسوزى اسەرلى بولعانىن اتاپ ءوتتى.
ء«بىز بۇگىنگى تاڭدا جوعارى دەڭگەيدە ورنىققان ەكىجاقتى قارىم-قاتىناستارىمىزدىڭ ودان ءارى كەڭەيۋىن كۇتەمىز. كوممەرتسيالىق ىنتىماقتاستىعىمىز 2025 جىلى رەكوردتىق كورسەتكىشكە جەتتى. تەك 2025 جىلدىڭ 4-توقسانىنىڭ وزىندە قازاقستاندىق جانە امەريكالىق كومپانيالار اراسىنداعى مامىلەلەر كولەمى $17 ملرد-قا جەتتى. بۇل ناتيجەلەر ءبىزدىڭ كوزقاراسىمىزدىڭ ءبىر ەكەنىن جانە ەكى ەلدىڭ ەكونوميكالىق ءوسىمىن كورسەتەدى, ونىڭ يگىلىگىن حالقىمىز كورمەك, سونىمەن بىرگە ءوزارا قارىم-قاتىناسىمىز نىعايا تۇسەدى», دەدى اقش-تىڭ قازاقستانداعى ەلشىسى دجۋلي م. ستاففت.
جيىندا شەتەلدىك ينۆەستورلارمەن ىنتىماقتاستىقتى كەڭەيتۋ, ۇزاقمەرزىمدى كاپيتالدى, تەحنولوگيالاردى جانە ءۇزدىك حالىقارالىق تاجىريبەلەردى تارتۋ, بيزنەس ءۇشىن اشىق جانە بولجامدى ورتا قالىپتاستىرۋ ماسەلەلەرىنە نازار اۋدارىلدى.
ينۆەستور-كومپانيالاردىڭ وكىلدەرى ينۆەستيتسيالىق ءوزارا ءىس-قيمىلدىڭ وڭ ديناميكاسىن جانە سالىق رەفورماسى شەڭبەرىندە بولجاناتىن ءارى رەتتەۋگە كەلەتىن ورتا قالىپتاستىرۋدىڭ ماڭىزدىلىعىن اتاپ ءوتتى. ينفراقۇرىلىمدى دامىتۋعا, تسيفرلاندىرۋعا, ءوندىرىستى لوكاليزاتسيالاۋعا, وزىق تەحنولوگيالاردى ەنگىزۋگە جانە تۇراقتى ەكونوميكالىق وسىمگە باعىتتالعان ۇزاق مەرزىمدى ارىپتەستىكتەردى قالىپتاستىرۋعا باسا نازار اۋدارىلدى.
«سيتيبانك قازاقستان» اق باسقارما توراعاسى ساۋلە جاقاەۆا «س5+1» الاڭدارىندا قول جەتكىزىلگەن ۋاعدالاستىقتاردى جالعاستىرۋ ءۇشىن بيۋدجەتكە قوسىمشا جۇكتەمەسىز تەمىرجول, اۆياتسيالىق جانە اەروناۆيگاتسيالىق ينفراقۇرىلىمدى جاڭعىرتۋ ءۇشىن US EXIM كەپىلدىگىمەن قارجىلاندىرۋ تارتىلعانىن, بۇل ەلدىڭ تەحنولوگيالىق دەڭگەيى مەن ترانزيتتىك الەۋەتىن ارتتىراتىنىن حابارلادى.
ال Eurasia Group Kazakhstan باس وپەراتسيالىق ديرەكتورى سەرگەي گلوككە ۇكىمەتتىڭ قولداۋىمەن قازاقستاندا John Deere تەحنيكاسىن ءوندىرۋدى لوكاليزاتسيالاۋ, سەرۆيستىك ينفراقۇرىلىمدى كەڭەيتۋ جانە اوك-تە كووپەراتسيانى تەرەڭدەتۋ جوسپارلارى تۋرالى ايتتى. اتاپ ايتقاندا, تۇركىستان وبلىسىنداعى زاۋىتتا وندىرىلەتىن اۋىل شارۋاشىلىعى تەحنيكاسى مەن كوكونىس وسىرۋگە ارنالعان جابدىقتار جەلىسىن كەڭەيتۋ جوسپارلانعان. تاجىريبەسىن جەتىلدىرۋ ماقساتىندا قازاقستاندىق ماماندار اقش-تاعى John Deere كاسىپورىندارىندا بىلىكتىلىگىن ارتتىرادى. وتكەن جىلى مەملەكەت باسشىسى جاريالاعان قازاقستانداعى جۇمىسشى ماماندىقتار جىلى كاسىبي قۇزىرەتتىلىكتى دامىتۋعا جانە كادرلىق الەۋەتتى نىعايتۋعا قوسىمشا سەرپىن بەردى. كادرلاردى دايارلاۋ جانە بىلىكتىلىكتى ارتتىرۋ ەكونوميكانىڭ جەتەكشى سالالارى, سونىڭ ىشىندە اۋىل شارۋاشىلىعى ءۇشىن باسىمدىق بولىپ قالا بەرەدى.
Wabtec Corporation كومپانياسىنىڭ تمد ەلدەرى مەن موڭعولياداعى دالالىق سەرۆيستەر جانە تەحنيكالىق قىزمەت كورسەتۋ جونىندەگى ۆيتسە-پرەزيدەنتى عايني دۇيسەنوۆا كاسىپورىنداردا تسيفرلىق تەحنولوگيالاردى ەنگىزۋ ارقىلى ءوندىرىستى كەڭەيتۋ جوسپارلارى تۋرالى حابارلادى. قازاقستان امەريكالىق Wabtec Corporation حولدينگىنىڭ وڭىردەگى وندىرىستىك سەرىكتەستەرى اراسىندا كولەمى بويىنشا ەكىنشى ورىندا تۇر. ىنتىماقتاستىق جىلدارىندا قر-دا 700-دەن استام لوكوموتيۆ شىعارىلدى, كاسىپورىننىڭ وندىرىستىك قۋاتى جىلىنا 100 تەمىرجول تەحنيكاسىن قۇرايدى. قتج-مەن ارىپتەستىك شەڭبەرىندە لوكوموتيۆتەر مەن ديزەلدى قوزعالتقىشتاردى شىعارۋدى ودان ءارى ۇلعايتۋ جوسپارلانۋدا. قر-دا تەمىرجول ينفراقۇرىلىمىن دامىتۋ, «وسال تۇستاردى» جويۋ بويىنشا جۇرگىزىلىپ جاتقان اۋقىمدى جۇمىستاردى ەسكەرە وتىرىپ, لوكوموتيۆ پاركىن جاڭارتۋ جانە وندىرىستىك قۋاتتاردى كەڭەيتۋ ەلدىڭ ترانزيتتىك الەۋەتى مەن وتكىزۋ قابىلەتىنە سەرپىن بەرەدى.
Freedom Holding Corp. باس اتقارۋشى ديرەكتورى تيمۋر تۋرلوۆ «C5+1» فورۋمى شەڭبەرىندە OpenAI جانە NVIDIA-مەن قول قويىلعان كەلىسىمدەر قازاقستان ءۇشىن ءبىلىم بەرۋ جانە جاساندى ينتەللەكتىنى دامىتۋ سالاسىندا تۇبەگەيلى جاڭا مۇمكىندىكتەر اشاتىنىن اتاپ ءوتتى. ونىڭ ايتۋىنشا, بۇل باستامالاردى جۇزەگە اسىرۋ تسيفرلىق ەكونوميكا ءۇشىن كادرلاردى جۇيەلى دايارلاۋدى كوزدەيدى جانە قازىرگى زامانعى ەسەپتەۋ ينفراقۇرىلىمىن قالىپتاستىرۋعا, ونىڭ ىشىندە پاۆلودار وبلىسىنداعى «دەرەكتەردى وڭدەۋ ورتالىعى القابى» جوباسى شەڭبەرىندە نەگىزدەلۋى مۇمكىن.
Deloitte Kazakhstan كومپانياسىنىڭ سالىق پراكتيكاسى جونىندەگى سەرىكتەسى ەلدوس سىزدىقوۆ قازاقستان رەسپۋبليكاسىندا جۇرگىزىلىپ جاتقان سالىق رەفورماسى اياسىندا قابىلدانعان وزگەرىستەرگە وڭ باعا بەرىپ, ققس-تى ۋاقىتىلى قايتارماعانى ءۇشىن ءوسىمپۇلدى ۋاقىتشا الىپ تاستاۋ جانە اكىمشىلەندىرۋ راسىمدەرىن جەتىلدىرۋ تەڭگەرىمدى سيپاتقا يە, ال جاڭا نورمالار اشىقتىقتى ارتتىرۋعا جانە ىسكەرلىك ورتانى نىعايتۋعا باعىتتالعانىن اتاپ ءوتتى. جالپى, ارنايى سالىق رەجيمدەرىنىڭ پارامەترلەرىن قايتا قاراۋ, ەڭ الدىمەن, تەڭگەرىمسىزدىكتەردى جويۋعا جانە سالىق سالۋدىڭ ءادىل جۇيەسىن قالىپتاستىرۋعا باعىتتالعان.
وتىرىستا كوتەرىلگەن ماسەلەلەر بويىنشا قارجى جانە سىرتقى ىستەر مينيسترلىكتەرىنىڭ باسشىلارى پىكىر ءبىلدىردى.
پرەمەر-مينيستر ولجاس بەكتەنوۆ حالىقارالىق ارىپتەستەرمەن ىنتىماقتاستىقتى ودان ءارى نىعايتۋعا جانە قولايلى ينۆەستيتسيالىق احۋال قۇرۋعا بەيىلدى ەكەنىن اتاپ ءوتتى. جاھاندىق تەحنولوگيالىق تىزبەكتەردى قالىپتاستىرۋ شەڭبەرىندە ۇكىمەت حالىقارالىق تەحنولوگيالىق كومپانيالاردى ىنتىماقتاستىققا تارتۋعا جانە سەرپىندى تسيفرلىق جوبالاردى جۇزەگە اسىرۋ ءۇشىن ينفراقۇرىلىم قۇرۋعا دەن قويادى. جاۋاپتى مەملەكەتتىك ورگاندارعا امەريكالىق ساۋدا پالاتاسىمەن بىرلەسىپ الداعى جۇمىستاردا جيىندا ايتىلعان باستامالار مەن بيزنەس ۇسىنىمدارىن ەسكەرۋ تاپسىرىلدى.
