بىلىكتى ۇستاز اننا كولتۋنوۆانىڭ بىرنەشە جوعارى ءبىلىمى بار, جەتىستىگى دە جەتىپ ارتىلادى. تاجىريبەلى پەداگوگكە قالاداعى ءبىلىم ورىندارىنان, ءتىپتى شەتەلدەن دە شاقىرتۋ تۇسكەن. الايدا ول ءوزىنىڭ تۋىپ-وسكەن اۋىلىنداعى ساكەن سەيفۋللين اتىنداعى مەكتەپتى تاڭداعان. بار ويلاعانى – اۋىل مەكتەبىن دامىتۋ, بالالارعا تەك قالادا عانا ەمەس, اۋىلدا دا مۇمكىندىك بار ەكەنىن كورسەتۋ. ايتقانى ورىندالىپ كەلەدى. اننا ينفورماتيكا پانىنەن ەكى تىلدە ساباق بەرەدى.
ەل اۋزىنداعى مۇعالىمگە وزىق تاجىريبەسىمەن ءبولىسۋ ماقساتىندا بىرنەشە مەملەكەتتەن شاقىرتۋ جولدانعان. مينسك, ماسكەۋ, كيشينەۆ قالالارىنان تاجىريبەسى مەن اۆتورلىق ادىستەمەلەرىن تانىستىرۋعا ۇسىنىس تۇسكەن. الايدا وتباسىلىق جاعدايعا بايلانىستى الىس ساپارعا شىعا الماعان. قازىر استانادا وتەتىن حالىقارالىق عىلىمي-پراكتيكالىق كونفەرەنتسياعا شاقىرتۋ الىپ وتىر. وعان قاتىسىپ, تاجىريبەسىمەن بولىسپەكشى.
ۇلتتىق قۇندىلىقتاردى وقۋشىلاردىڭ ساناسىنا سىڭىرۋدە ۇستاز كوپتەگەن قىزىقتى ءادىس-ءتاسىل ويلاپ تاپقان. سونىڭ ءبىرى – ۇستاز بەن شاكىرتتى جاقىنداستىرىپ, بالالاردىڭ بويىنا رۋح دارىتقان «سىر ساندىق» جوباسى.
«وقىتۋ تەك ءبىلىم بەرۋمەن شەكتەلمەۋگە ءتيىس. ول جەكە تۇلعانى دامىتىپ, تۋعان تىلگە, مادەنيەتكە, ۇلتتىق قۇندىلىقتارعا قۇرمەت سەزىمىن وياتۋى قاجەت. ماعان بالالارعا جاقىن, ولارعا ەموتسيونالدىق اسەر قالدىراتىن ءارى ءوز تامىرىمەن بايلانىسىن سەزدىرەتىن فورمات كەرەك بولدى. وسىلايشا, ءداستۇرلى قازاق ساندىعىنىڭ بەينەسى – «سىر ساندىق» يدەياسى تۋدى. ءار «سىر» تەك وقۋ ماتەريالىن عانا ەمەس, سونىمەن بىرگە ۇلكەندى سىيلاۋ, وتانعا دەگەن سۇيىسپەنشىلىك, ادالدىق, ەڭبەكقورلىق, جاۋاپكەرشىلىك سەكىلدى قۇندىلىقتاردى اشادى.
جوبا اياسىندا جاساندى ينتەللەكت ارقىلى وقۋشىلارعا ۇلتتىق قۇندىلىقتاردى ويىن تۇرىندە مەڭگەرتۋگە, تاپسىرمالاردى شەشۋگە, شەشىم قابىلداۋعا, تاڭداۋ جاساۋعا مۇمكىندىك بەرەمىن. وقۋشىلار جي كومەگىمەن مۋلتفيلمدەر جاسايدى. ولار ءارى ستسەناريست, ءارى رەجيسسەر رەتىندە ءداستۇر مەن تاربيەلىك ءمانى جوعارى اڭگىمەلەردى ومىرگە اكەلەدى. بۇل ءتاسىل شىعارماشىلىق ويلاۋدى دامىتىپ قانا قويماي, ۆيزۋالدى وبرازدار ارقىلى ماتەريالدى تەرەڭىرەك قابىلداۋعا جول اشادى. سونداي-اق باستاۋىش سىنىپ وقۋشىلارىنا ارنالعان تسيفرلىق كىتاپتار دا جاسايمىز.
«سىر ساندىقتان» بولەك, جاساندى ينتەللەكتىگە نەگىزدەلگەن «AI Creator: تسيفرلىق شىعارماشىلىق الەمى» كۋرسىن, «تسيفرلىق كيىز ءۇي», ء«تىرى مۇرا», ينتەراكتيۆتى ءبىلىم بەرۋ كۆەستتەرى مەن ويىندار سەرياسىن ازىرلەيمىز. بۇل جوبالاردىڭ بارلىعى ءداستۇر مەن تەحنولوگيانى توعىستىرىپ, ۇلتتىق قۇندىلىقتاردى ناسيحاتتاۋعا باعىتتالعان», دەيدى اننا.
بىلىكتى ۇستازدىڭ ەڭبەگى مەن جاڭاشىلدىققا ۇمتىلىسى ەسكەرىلىپ, ول «ۇزدىك سىنىپ جەتەكشىسى – 2024» رەسپۋبليكالىق بايقاۋىندا توپ جارىپ, «ۇزدىك پەداگوگ» بايقاۋىندا بىرنەشە مارتە جۇلدەگەر اتاندى. ونىڭ جوبالارى عىلىمي كونفەرەنتسيالار مەن حالىقارالىق جارىستاردا جوعارى باعالاندى.
پەداگوگ تەك ساباق بەرۋمەن شەكتەلمەي, ارىپتەستەرىنە ارنالعان كاسىبي پلاتفورما قالىپتاستىرىپ, جاساندى ينتەللەكتىنى ءبىلىم بەرۋ ۇدەرىسىنە ەنگىزۋدىڭ ءتيىمدى جولدارىن ۇسىنىپ كەلەدى.
الداعى جوسپارىندا ەكىتىلدى وقىتۋدى دامىتۋ, جاساندى ينتەللەكت ارقىلى قازاق ءتىلىن مەڭگەرتۋدىڭ جاڭا فورماتتارىن ەنگىزۋ, «اقىلدى كيىز ءۇي» جوباسىن جۇزەگە اسىرۋ جانە AR, VR تەحنولوگيالارىن ءبىلىم سالاسىنا بەيىمدەۋ بار. وسىلايشا, قاراپايىم اۋىل مەكتەبىندە مەملەكەتتىك ءتىل جۇيەلى تۇردە دامىپ, زاماناۋي تسيفرلىق ءبىلىم بەرۋ كەڭىستىگى قالىپتاسىپ كەلەدى.
«وقۋشىلار وزىمەن ءبىر تىلدە, ياعني تەحنولوگيا تىلىندە تۇسىنىسەتىن, سەنىممەن سويلەسەتىن مۇعالىمگە ءۇيىر. بۇگىنگى مۇعالىم – تەك ءبىلىم بەرۋشى ەمەس. ول – شابىت بەرۋشى, ىنتالاندىرۋشى, زەرتتەۋشى ءارى جاڭاشىل تۇلعا. XXI عاسىر مۇعالىمى ءداستۇرلى قۇندىلىقتاردى زاماناۋي تاسىلدەرمەن ۇيلەستىرە ءبىلۋى كەرەك. قازىرگى وقىتۋ فورمالارى, ينتەراكتيۆتى تاپسىرمالار, جاساندى ينتەللەكتىنى قولدانۋ جانە ويىن ادىستەمەلەرى ساباقتىڭ قىزىقتى وتۋىنە ىقپال ەتەدى. بالالاردىڭ بارلىعى ساباققا بەلسەندى قاتىسىپ, ءوز پىكىرىنىڭ ماڭىزدى ەكەنىن جانە جەكە تۇلعا رەتىندە باعالاناتىنىن سەزىنەدى», دەيدى بىلىكتى ۇستاز.
قاراعاندى وبلىسى
