ەكسپوزيتسياعا ديماش قۇدايبەرگەننىڭ جەكە قورىنان الىنعان 70 مۋزىكالىق اسپاپ قويىلدى. ولاردىڭ اراسىندا الەمنىڭ ءار قيىرىنان جانكۇيەرلەرى سىيعا تارتقان اسپاپتار بار. سونداي-اق كورمەدە ءانشىنىڭ ساحنالىق كوستيۋمدەرى ۇسىنىلعان. كورەرمەنگە ەرەكشە اسەر قالدىرعان جادىگەردىڭ ءبىرى – الەمدىك پوپ-مادەنيەت جۇلدىزى مايكل دجەكسوننىڭ جەكە ءستيليستى گوكو زالدي ارنايى تىككەن ساحنالىق كيىم.
كورمەنىڭ ءمانىن ارتتىرعان ساتتەردىڭ ءبىرى – ديماش قۇدايبەرگەننىڭ مۋزەي قورىنا ەكى دومبىراسىن تابىستاۋى. ونىڭ ءبىرى بالا كۇنىنەن قولىنان تۇسپەگەن, اتاسى سىيلاعان دومبىرا بولسا, ەكىنشىسى – ونەر يەسىنىڭ قولتاڭباسى قويىلعان اسپاپ. ءوز كەزەگىندە الماتى قالاسى مۋزەيلەر بىرلەستىگىنىڭ ديرەكتورى ءلاززات قۇدايبەرگەنقىزى مۋزەي ۇجىمى اتىنان ديماشقا اباي قۇنانباي ۇلىنىڭ دومبىراسىنىڭ ءدال كوشىرمەسىن تارتۋ ەتتى. بۇل سىي – رۋحاني ساباقتاستىق پەن ۇلتتىق قۇندىلىققا دەگەن ءوزارا قۇرمەتتىڭ بەلگىسى رەتىندە باعالاندى.
تۇركىستاندا ديماش قۇدايبەرگەننىڭ پروديۋسەرلىك «Voice Beyond Horizon» جوباسى باستالدى
ديماش قۇدايبەرگەننىڭ اكەسى, قازاقستاننىڭ مادەنيەت قايراتكەرى قانات ايتباەۆ كورمەنىڭ مازمۇندىق ماڭىزىنا توقتالىپ, ونىڭ جەكە كوللەكتسيانى تانىستىرۋمەن شەكتەلمەيتىنىن ايتتى. ونىڭ سوزىنشە, بۇل باستاما ۇلتتىق ونەردى دارىپتەپ قانا قويماي, ءتۇرلى حالىقتىڭ مۋزىكالىق مۇراسىن ءبىر كەڭىستىكتە توعىستىرعان تاعىلىمدى جوبا.
«بۇل اسپاپتاردىڭ ارقايسىسى ءبىز ءۇشىن اسا قىمبات. سەبەبى ولار الەمنىڭ ءار تۇكپىرىنەن جينالعان, ءار حالىقتىڭ ءتول مادەنيەتىن تانىتادى. ءار اسپاپتىڭ ارتىندا ءوز تاريحى بار. وسىنداي قۇندى دۇنيەلەردى تارتۋ ەتكەن بارشا ازاماتقا العىسىمىز شەكسىز», دەدى ديماش قۇدايبەرگەننىڭ اناسى, قازاقستاننىڭ ەڭبەك سىڭىرگەن قايراتكەرى سۆەتلانا ايتباەۆا.
ءىس-شاراعا الماتى قالاسى مادەنيەت باسقارماسىنىڭ باسشىسى دانيار اليەۆ, تۇركسوي ۇيىمىنداعى قازاقستاننىڭ رەسمي وكىلى نىشانكۇل قاراتاەۆا, مادەنيەت پەن ونەر قايراتكەرلەرى, زيالى قاۋىم وكىلدەرى, بۇقارالىق اقپارات قۇرالدارى جانە ءانشىنىڭ جانكۇيەرلەرى قاتىستى.
«ديماش: ءبىر داۋىس – مىڭ ەل» كورمەسى ونەردىڭ ۇلت پەن شەكاراعا باعىنبايتىنىن ايقىن كورسەتەدى. ەكسپوزيتسيا كەلۋشىلەرگە ءانشىنىڭ شىعارماشىلىق الەمىن تەرەڭىرەك تانىپ, ۇلتتىق مۋزىكالىق اسپاپتاردىڭ باي مۇراسىن سەزىنۋگە مۇمكىندىك بەرەدى.
كورمە ءبىر اي بويى الماتى قالاسى, زەنكوۆ كوشەسى, 24ا مەكەنجايىندا ورنالاسقان ىقىلاس اتىنداعى حالىق مۋزىكالىق اسپاپتار مۋزەيىندە جالعاسادى.
بۇنىڭ الدىندا ديماش قۇدايبەرگەن وليمپيادا چەمپيونى ميحايل شايدوروۆقا كولىك سىيلاپ, ەل ىقىلاسىنا بولەنگەن ەدى.
