ءىس-شارانىڭ باستى ماقساتى – ۇلتتىق ادەبيەتتى ناسيحاتتاۋ ارقىلى وقىرمان مادەنيەتىن قالىپتاستىرۋ, كىتاپقا دەگەن قىزىعۋشىلىقتى ارتتىرۋ جانە جاس ۇرپاقتىڭ رۋحاني دۇنيەتانىمىن بايىتۋ. سەبەبى «كىتاپ – اقىلدىڭ كەنى» دەگەن حالىق دانالىعى بۇگىنگى قوعام ءۇشىن دە ماڭىزىن جويعان جوق.
كورمە بارىسىندا قازاق ادەبيەتىنىڭ التىن قورىنا ەنگەن كورنەكتى قالامگەرلەردىڭ مەرەيتويلىق شىعارمالارى كوپشىلىك نازارىنا ۇسىنىلدى. اتاپ ايتقاندا, ءىلياس جانسۇگىروۆتىڭ ۇلتتىق پوەزيانىڭ اسقاق ۇلگىسىنە اينالعان «قۇلاگەر» پوەماسىنىڭ 90 جىلدىعى, عابيت مۇسىرەپوۆتىڭ تاريحي-الەۋمەتتىك مازمۇنداعى «پروبۋجدەننىي كراي» اڭگىمەسىنىڭ 65 جىلدىعى, ءىلياس ەسەنبەرليننىڭ ەل تاريحىن كوركەم تىلمەن ورنەكتەگەن «الماس قىلىش» رومانىنىڭ 55 جىلدىعى, جامبىل جاباەۆتىڭ وتتى جىرىنان تۋعان «لەنينگرادتسى, دەتي موي…» ولەڭىنىڭ 85 جىلدىعى كەڭىنەن تانىستىرىلدى.
سونداي-اق, الەمدىك دەڭگەيدە تانىلعان مۇحتار اۋەزوۆتىڭ «اباي جولى» رومان-ەپوپەياسىنىڭ 55 جىلدىعى, تاريحي-فيلوسوفيالىق ويىمەن دارالانعان ءابىش كەكىلباەۆتىڭ «پلەيادى, سوزۆەزديە نادەجدى» ەڭبەگىنىڭ 45 جىلدىعى, اعارتۋشىلىقتىڭ تەمىرقازىعىنا اينالعان ىبىراي ءالتىنساريننىڭ «قازاق حرەستوماتياسىنىڭ» 120 جىلدىعى, قوعام شىندىعىن تەرەڭ بەينەلەگەن ءابدىجامىل نۇرپەيىسوۆتىڭ «قان مەن تەر» تريلوگياسىنىڭ 65 جىلدىعى, ولجاس سۇلەيمەنوۆتىڭ «ارعىماق», «زەمليا, پوكلونيس چەلوۆەكۋ» پوەمالارىنىڭ 65 جىلدىعى جانە عابيدەن سلانوۆتىڭ «ستەپ دا ستەپ» رومانىنىڭ 85 جىلدىعى كورمە اياسىندا كەڭىنەن ناسيحاتتالدى.
«وتكەنىن بىلمەگەن ەلدىڭ بولاشاعى ب ۇلىڭعىر» دەگەن ءسوز بار. وسى ورايدا جىلجىمالى كىتاپ كورمەسى وقىرماندى تەك كوركەم دۇنيەلەرمەن تانىستىرىپ قانا قويماي, ءار شىعارمانىڭ تاريحي, رۋحاني جانە تاربيەلىك مانىنە تەرەڭ ۇڭىلۋگە مۇمكىندىك بەردى. كورمەگە كەلگەندەر قالامگەرلەردىڭ شىعارماشىلىق جولى تۋرالى تىڭ مالىمەتتەر الىپ, ۇلتتىق ادەبي مۇراعا دەگەن قۇرمەتىن ارتتىرا ءتۇستى.
تاعىلىمدى ءىس-شارا قازاق ادەبيەتىنىڭ ۇلت ساناسىنداعى ورنى ايرىقشا ەكەنىن تاعى ءبىر مارتە دالەلدەپ, كىتاپ پەن وقىرمان اراسىنداعى رۋحاني بايلانىستى بەكەمدەي ءتۇستى. ۇرپاقتان-ۇرپاققا جالعاسقان اسىل مۇرا – حالقىمىزدىڭ سارقىلماس بايلىعى ەكەنى وسى كورمە ارقىلى ايقىن سەزىلدى.
گۇلجاۋحار ەسەنتاەۆا,
قاراعاندى اۋىلدىق كىتاپحاناشىسى
باتىس قازاقستان وبلىسى
