تاعىلىمدى شارانى جەزقازعان قالاسىنىڭ مادەنيەت جانە تىلدەردى دامىتۋ ءبولىمى ۇيىمداستىردى. ونتومدىق شىعارمالار جيناعى جەزقازعان قالاسىنىڭ اكىمى قايرات شايجانوۆتىڭ باستاماسىمەن, دەمەۋشىلىك قولداۋ ارقىلى الماتى قالاسىنداعى «عارىش» باسپاسىنان جارىق كوردى.
كەش بەلگىلى جازۋشىنىڭ «امانات» رومانىنان الىنعان «تورتەۋ تۇگەل بولعاندا…» اتتى ينستسەنيروۆكامەن اشىلدى. كورەرمەن شىعارماشىلىعىن ارقاۋ ەتكەن بەينەباياننان كەش يەسىنىڭ جەمىستى دە جەڭىستى جولدارىمەن تانىستى.
ۇلىتاۋ وبلىسىندا تۇڭعىش رەت جارىق كورگەن كوپتومدىق ەڭبەكتىڭ تۇساۋىن قازاقستان جازۋشىلار وداعىنىڭ باسقارما توراعاسى مەرەكە قۇلكەنوۆ كەستى.
«قۇرمەت» وردەنىنىڭ يەگەرى باتىربەك مىرزابەكوۆتىڭ وسىعان دەيىن «تاسبۇلاق», « ۇلىتاۋدىڭ ۇلىمىن», «جەتى قىز», «التى بەلدىڭ اسۋى» اتتى جىر جيناقتارى, «امانات», « ۇلىتاۋ - ۇلتتىڭ ۇياسى», «دۇزەن», «قوس باتىر», «شۋاق شاشقان شاڭىراق» سياقتى تاريحي پۋبليتسيستيكالىق كىتاپتارى جارىق كورگەن. بەرتىندە قازاقتان شىققان تۇڭعىش گەولوگ قانىش ساتباەۆتىڭ تۋعانىنا 125 جىل تولۋىنا وراي «ماڭگىلىك عۇمىر» اتتى رومان – ەسسە تارتۋ ەتكەن.
جەزقازعان قالاسىنىڭ اكىمى, ونەر جانە مادەنيەت يەلەرى, ءتىل جاناشىرلارى كەش يەسىنىڭ شىعارماشىلىعى جايىندا جىلى لەبىزىن جەتكىزدى. بەلگىلى قالامگەرلەر, قازاقستان جازۋشىلار وداعىنىڭ مۇشەلەرى عازيز ەشتاناەۆ, مۇسا تىلەۋوۆ ادەبيەتتە الاتىن ورنىنا توقتالدى.
وبلىستىڭ تاڭداۋلى انشىلەرى اننەن شاشۋ شاشىپ, كەش كورىگىن قىزدىردى.
سالتاناتتى كەش اياسىندا قازاقستان جازۋشىلار وداعىنىڭ باسقارما توراعاسى مەرەكە قۇلكەنوۆ «ۇلار» ادەبي كلۋبىنىڭ مۇشەلەرى مۇقاعالي سەيتقازى مەن جانات ابدىعوجيندى جازۋشىلار وداعى مۇشەلىگىنە قابىلداپ, كۋالىك تابىستادى.
قارىمدى قالامگەردىڭ ون تومدىق شىعارمالار جيناعى وبلىستىق, قالالىق كىتاپحانالارعا, سونداي-اق ۋنيۆەرسيتەتتەر مەن ءبىلىم بەرۋ ۇيىمدارىنىڭ كىتاپ قورىنا تاراتىلادى.
