فوتو: دەنساۋلىق ساقتاۋ مينيسترلىگى
تىزبە ەكى باعىت بويىنشا جاساقتالادى
مينيسترلىك مەديتسينالىق ماماندىقتار بويىنشا قوسىمشا ءبىلىم بەرۋ ۇيىمدارىنىڭ تىزبەسىن قالىپتاستىرۋدىڭ جاڭا قاعيدالارىن بەكىتتى. ەندى ۋاكىلەتتى ورگان تىزبەنى ەكى بولەك باعىت بويىنشا جاساقتايدى:
− دارىگەرلەردى وقىتاتىن زاڭدى تۇلعالار;
− ورتا مەديتسينالىق پەرسونالدى دايارلايتىن ۇيىمدار.
بۇل ءتاسىل ءار ساناتتاعى مامانداردى دايارلاۋ ەرەكشەلىگىن ەسكەرۋگە مۇمكىندىك بەرەدى.
تىزبەگە ەنگىزۋدىڭ مىندەتتى شارتى – ۇيىم قىزمەتىنىڭ تۇرلەرىندە قوسىمشا مەديتسينالىق ءبىلىم بەرۋ باعدارلامالارىن ىسكە اسىرۋ كوزدەلگەنىن راستايتىن قۇقىق بەلگىلەيتىن قۇجاتتاردىڭ بولۋى.
ينفراقۇرىلىم مەن رەسۋرستارعا قويىلاتىن تالاپ ارتتى
جاڭا قاعيدالار ءبىلىم بەرۋ ورتالىقتارىنىڭ ينفراقۇرىلىمى مەن ماتەريالدىق-تەحنيكالىق بازاسىنا قاتىستى ولشەمشارتتاردى ەداۋىر قاتاڭداتادى. بۇعان دەيىن مىندەتتى اككرەديتتەۋ, بەكىتىلگەن وقۋ باعدارلامالارى جانە حالىقارالىق اقپاراتتىق دەرەكقورلارعا قول جەتكىزۋ تالاپ ەتىلسە, ەندى وعان قوسىمشا بىرقاتار شارت ەنگىزىلدى.
اتاپ ايتقاندا, ۇيىمداردا:
- ءبىلىم بەرۋ قىزمەتىنە ليتسەنزيانىڭ جانە (نەمەسە) عىلىمي ۇيىم مارتەبەسىنىڭ بولۋى;
- ءوزىنىڭ كلينيكالىق بازاسىنىڭ نەمەسە پراكتيكالىق دايارلاۋ ءۇشىن اككرەديتتەلگەن مەديتسينالىق ۇيىمدارمەن شارتتارىنىڭ بولۋى;
- زاماناۋي سيمۋلياتسيالىق جابدىقتار, زەرتحانالىق بازا جانە كومپيۋتەرلىك تەحنولوگيالارمەن تولىق قامتىلۋى;
- مەملەكەتتىك ورگانداردىڭ بىرىڭعاي كولىك ورتاسىنا قوسىلۋى قاراستىرىلعان.
بۇل تالاپتار بولاشاقتا فورمالدى وقىتۋعا جول بەرمەي, ناقتى تاجىريبەگە نەگىزدەلگەن ساپالى ءبىلىم بەرۋدى قامتاماسىز ەتۋدى كوزدەيدى.
QazMed Digital: مەديتسينالىق ۆولونتەرلىك جاڭا دەڭگەيگە شىقتى
جۇيەلى مونيتورينگ جانە كوشپەلى تەكسەرۋ
مينيسترلىك تىزبەنى تۇراقتى تۇردە جاڭارتىپ وتىرادى. ول ءۇشىن ۇيىمداردىڭ قىزمەتىنە جۇيەلى مونيتورينگ جۇرگىزىلىپ, قاجەت بولعان جاعدايدا كوشپەلى تەكسەرۋلەر ۇيىمداستىرىلادى.
ۆەدومستۆو وكىلدەرىنىڭ ايتۋىنشا, ماتەريالدىق-تەحنيكالىق بازا مەن كلينيكالىق رەسۋرستاردىڭ ناقتى جاعدايعا سايكەستىگى قاتاڭ تەكسەرىلەدى. بۇل تالاپقا ساي كەلمەيتىن ۇيىمداردىڭ تىزبەدە قالۋىنا جول بەرىلمەيدى.
اشىق ىرىكتەۋ – ساپالى كادر كەپىلى
جاڭا نورمالار ءبىلىم بەرۋ ورتالىقتارىن ىرىكتەۋدىڭ اشىق ءارى ءادىل جۇيەسىن قالىپتاستىرۋعا مۇمكىندىك بەرەدى. ناتيجەسىندە مەديتسينا قىزمەتكەرلەرى عىلىمي الەۋەتى جەتكىلىكتى, زاماناۋي جابدىقتالعان جانە تولىققاندى كلينيكالىق بازاسى بار ۇيىمداردا عانا بىلىكتىلىگىن ارتتىرا الادى.
قابىلدانعان وزگەرىستەر دەنساۋلىق ساقتاۋ جۇيەسىنىڭ كادرلىق الەۋەتىن نىعايتۋعا جانە حالىققا كورسەتىلەتىن مەديتسينالىق كومەكتىڭ ساپاسىن ارتتىرۋعا باعىتتالعان. ساپالى ءبىلىم – ساپالى قىزمەتتىڭ نەگىزى. ال بۇل قادام مەديتسينا سالاسىنداعى جاۋاپكەرشىلىكتى ودان ءارى ارتتىرا تۇسەدى.
مەديتسينا فاكۋلتەتىنىڭ ستۋدەنتتەرى جاڭا كونستيتۋتسيا جوباسىن تالقىلادى
