فوتو: اشىق دەرەككوز
ەكسپورت كولەمى ەسەلەپ ءوستى
2025 جىلدىڭ قورىتىندىسى بويىنشا شەتەلگە 1 477 توننا بال جونەلتىلدى. 2024 جىلى بۇل كورسەتكىش نەبارى 603 توننا بولعان ەدى.
نەگىزگى ەكسپورتتىق باعىت – وزبەكستان. بۇل ەلگە 1 264 توننا, ياعني جالپى كولەمنىڭ 85,6 %-ى تيەسىلى. سونىمەن قاتار وتاندىق بال كانادا, قىتاي, ساۋد ارابياسى, رەسەي جانە امەريكا قۇراما شتاتتارىنا ەكسپورتتالدى. بيىل العاش رەت ومانعا دا ءونىم جەتكىزىلدى.
سىرتتان بال اكەلۋ كولەمى كەرىسىنشە كۇرت ازايدى: 2024 جىلعى 1 663 توننادان 262,4 تونناعا دەيىن تومەندەدى. بۇل ىشكى ءوندىرىستىڭ ۇلعايىپ, وتاندىق وندىرۋشىلەردىڭ نارىقتاعى ورنى نىعايعانىن اڭعارتادى.
وندىرىستىك الەۋەت
قازىر شىعىس قازاقستان, پاۆلودار, الماتى, تۇركىستان, اباي جانە جەتىسۋ وبلىستارىندا 241 مىڭ ارا ۇياسى تىركەلگەن. ونىڭ 90,2 مىڭى – اسىل تۇقىمدى.
ەلىمىزدە جىل سايىن شامامەن 5 مىڭ توننا بال وندىرىلەدى. سونىڭ 46,5 %-ى (2,3 مىڭ توننا) – جەكە قوسالقى شارۋاشىلىقتاردىڭ ۇلەسىندە بولسا, 54%-ى (2,7 مىڭ توننا) – اۋىل شارۋاشىلىعى تاۋار وندىرۋشىلەرىنە تيەسىلى.
مەملەكەتتىك قولداۋ جانە زاڭنامالىق نەگىز
مەملەكەتتىك قولداۋ اياسىندا بال ءوندىرىسىنىڭ شىعىنىن ازايتۋ ماقساتىندا وتكىزىلگەن ءار كيلوگرامم ونىمگە 200 تەڭگە سۋبسيديا قاراستىرىلعان.
سالانى جۇيەلى دامىتۋ ءۇشىن 2025-2027 جىلدارعا ارنالعان جول كارتاسى بەكىتىلدى. سونىمەن قاتار «ارا شارۋاشىلىعى تۋرالى» جانە «اسىل تۇقىمدى مال شارۋاشىلىعى تۋرالى» زاڭدارعا وزگەرىستەر ازىرلەنىپ, 2025 جىلعى ساۋىردە پارلامەنت قاراۋىنا ۇسىنىلدى.
وسى جىلدىڭ 11 اقپانىندا ارا شارۋاشىلىعى ماسەلەلەرى بويىنشا زاڭ جوباسىن تالقىلايتىن جۇمىس توبىنىڭ العاشقى وتىرىسى ءوتتى.
قابىلداناتىن تۇزەتۋلەر سالاداعى ەسەپتىلىكتىڭ اشىقتىعىن ارتتىرۋعا, ءوندىرىس تيىمدىلىگىن كۇشەيتۋگە جانە وتاندىق بالدىڭ سىرتقى نارىقتاعى باسەكەگە قابىلەتتىلىگىن نىعايتۋعا باعىتتالعان. بۇل ءوز كەزەگىندە ەكسپورت كولەمىن ۇلعايتىپ, اۋىلدىق اۋماقتاردىڭ ەكونوميكالىق دامۋىنا تىڭ سەرپىن بەرمەك.
