قۇرمەت تاقتاسى

«داڭق» وردەنىنىڭ تولىق يەگەرى فازىل ادىلباەۆقا ارنالدى شىعىس قازاقستان وبلىستىق پروكۋراتۋراسىندا ۇلى وتان سوعىسىنىڭ ارداگەرى, قازاقستان رەسپۋبليكاسى پروكۋراتۋرا جۇيەسىندەگى بىردەن-ءبىر «داڭق» وردەنىنىڭ تولىق كاۆالەرى فازىل ادىلبەۆتىڭ قۇرمەتىنە مەموريالدىق تاقتا قويىلدى. فازىل ادىلباەۆ 1925 جىلى 7 قاراشادا بۇرىنعى سەمەي وبلىسىنىڭ جارما اۋدانى, بالاجال اۋىلىندا دۇنيەگە كەلگەن. 1943 جىلى 16 جاسىندا كەڭەس ارمياسىنىڭ قاتارىنا شاقىرىلىپ, بەلارۋس مايدانىندا ۇرىسقا كىرىپ, بەرلينگە دەيىن باردى. مايدانداعى ەرلىكتەرى ءۇشىن كەڭەس وداعىنىڭ باتىرى اتاعىمەن تەڭەسەتىن «داڭق» وردەنىنىڭ بارلىق ءۇش دارەجەسىمەن, سونداي-اق, «ەرلىگى ءۇشىن», «ستالينگرادتى ازات ەتكەنى ءۇشىن», «بەرليندى العانى ءۇشىن» جانە باسقا دا كوپتەگەن مەدالدارمەن ماراپاتتالدى. سونداي-اق, ءستاليننىڭ جەكە قولى قويىلعان العىس حاتىمەن, جەڭىس مەرەكەسىندە كسرو قورعانىس مينيسترلىگىنىڭ ساعاتىمەن ماراپاتتالىپ, ماسكەۋدە وتكەن سوعىس ارداگەرلەرىنىڭ كوپتەگەن كەزدەسۋلەرىنە قاتىستى. سوعىستان كەيىن فازىل ادىلباەۆ جارما اۋدانىنىڭ تەرەنتەۆكا اۋىلىنا ورالادى. 1958 جىلدان باستاپ ءومىرىنىڭ سوڭىنا دەيىن پروكۋراتۋرا ورگاندارىندا قىزمەت ەتەدى. شىعىس ءوڭىرىنىڭ تارباعاتاي, كاتونقاراعاي, كوكپەكتى اۋداندارىندا, اياگوز قالاسىندا تەرگەۋشى بولادى. 1975 جىلى 49 جاسىندا دۇنيەدەن وتكەن ەرجۇرەك جاۋىنگەردىڭ ەسىمى جارما اۋدانىنىڭ ورتالىعى قالباتاۋ اۋىلى مەن اياگوز قالاسىنداعى كوشەلەرگە بەرىلدى. سونىمەن بىرگە, سەمەي قالاسىنداعى ۇلى وتان سوعىسى باتىرلارى اللەياسىنداعى ءمارمار مەموريالعا اتى-ءجونى ويىلىپ جازىلدى. وبلىستىق پروكۋراتۋرا عيماراتىنداعى مەموريالدىق تاقتانىڭ اشىلۋ سالتاناتىنا وسكەمەن قالاسىنىڭ اكىمى ت.قاسىمجانوۆ, وبلىستاعى ءىىد باسشىسى ج.باقتىباەۆ, ۇقك دەپارتامەنتىنىڭ باسشىسى ا.اقشاەۆ, مەملەكەتتىك كىرىس دەپارتامەنتىنىڭ جەتەكشىسى ب.اينابەكوۆ, وڭىرلىك كاسىپكەرلەر پالاتاسىنىڭ ديرەكتورى ي.شاتسكي جانە پروكۋراتۋرا ارداگەرلەرى, مەملەكەتتىك ورگاندار جەتەكشىلەرى مەن ءماسليحات دەپۋتاتتارى قاتىستى. قۇرمەت تاقتانى وبلىس پروكۋرورى باعبان تايىمبەتوۆ, وبلىستىق ءماسليحات حاتشىسى گريگوري پينچۋك جانە وسكەمەندەگى №2 سوتتىڭ توراعاسى بولىپ جۇمىس ىستەيتىن فازىل ادىلباەۆتىڭ قىزى گۇلنار ادىلباەۆا اشتى. جيىنعا سوعىس ارداگەرىنىڭ تۋعان-تۋىستارى قاتىسىپ, شارا سوڭىندا اس بەرىلدى. دۋمان اناش,«ەگەمەن قازاقستان». وسكەمەن.