سۋرەت جي كومەگىمەن جاسالعان
راس, سوڭعى جىلدارى تەحپاسپورتتىڭ فورماتى مەن اتاۋىنا قاتىستى وزگەرىستەر بولدى. بىراق بۇل مەنشىك يەلەرىنە قوسىمشا مىندەت جۇكتەمەيدى.
بۇعان دەيىن تەحنيكالىق پاسپورت بىرنەشە مارتە جاڭارتىلعان. اۋەلى قۇجاتتان يەسىنىڭ اتى-ءجونى الىنىپ تاستالدى. 2007 جىلدان باستاپ بالكون مەن لودجيا پاتەردىڭ جالپى اۋماعىنا ەسەپتەلە باستادى.
ال 2023 جىلدان بەرى تەحنيكالىق پاسپورت «كاداسترلىق پاسپورت» دەپ اتالادى. قازىر بۇل قۇجات جاڭا سالىنعان نىساندارعا نەمەسە تەحپاسپورت جاڭارتىلعان كەزدە بەرىلەدى. سوعان قاراماستان, بۇرىن بەرىلگەن بارلىق تەحنيكالىق پاسپورتتار زاڭدى كۇشىن ساقتايدى. ولاردى مىندەتتى تۇردە اۋىستىرۋ قاجەت ەمەس.
اتاۋى وزگەرگەنىمەن قۇجاتتىڭ ءمانى سول كۇيى قالدى. تەحپاسپورتتا تۇرعىن ءۇيدىڭ بارلىق نەگىزگى تەحنيكالىق دەرەكتەرى كورسەتىلەدى: مەكەنجايى, تىركەۋ كودى, كاداسترلىق ءنومىرى, سالىنعان جىلى, قابات سانى, جالپى جانە تۇرعىن اۋماعى, بولمەلەردىڭ سانى مەن كولەمى مەن قابىرعا ماتەريالى. بۇدان بولەك, پاتەردىڭ جوسپار-سحەماسى مەن بارلىق ءۇي-جايلار كورسەتىلگەن كەستە قوسا بەرىلەدى.
تەحپاسپورت – كەز كەلگەن مامىلە ءۇشىن قاجەت نەگىزگى قۇجات. ساتىپ الۋ-ساتۋ, يپوتەكا راسىمدەۋ نەمەسە سىيعا تارتۋ كەزىندە ونسىز كەلىسىم جاسالمايدى. سوندىقتان قۇجاتتاعى مالىمەتتەر پاتەردىڭ ناقتى جاعدايىمەن سايكەس بولۋى شارت.
قۇجاتتى جاڭارتۋ مىناداي جاعدايدا كەرەك: ەگەر قايتا جوسپارلاۋ جاسالسا, دەرەكتەردە قاتە تابىلسا, پاتەر بولىنسە نەمەسە بىرىكتىرىلسە جانە يپوتەكالىق مامىلە الدىندا بانك تالاپ قويسا. ال پاتەرگە وزگەرىس ەنگىزىلمەسە ءارى يپوتەكا جوسپارلانباسا تەحپاسپورتتى اۋىستىرۋدىڭ قاجەتى جوق.
جاڭارتۋ ءۇشىن حالىققا قىزمەت كورسەتۋ ورتالىعىنا نەمەسە eGov پورتالى ارقىلى ءوتىنىش بەرۋگە بولادى. الدىمەن نىسانعا تەحنيكالىق تەكسەرۋ جۇرگىزىلەدى. ماماندى شاقىرۋدىڭ باستاپقى قۇنى 4 617 تەڭگە, ال قالعان تولەم پاتەردىڭ كولەمى مەن كۇردەلىلىگىنە بايلانىستى ەسەپتەلەدى. دايىن قۇجاتتى حقكو-دان نەمەسە eGov-تاعى جەكە كابينەتتەن الۋعا مۇمكىندىك بار.
قىسقاسى, تەحپاسپورت جويىلعان جوق. بۇرىن بەرىلگەن قۇجاتتار جارامدى. ەڭ باستىسى – ونداعى مالىمەتتەر پاتەردىڭ ناقتى كۇيىنە ساي بولۋى كەرەك. ال جاڭارتۋ تەك ناقتى قاجەتتىلىك تۋعان جاعدايدا عانا جاسالادى.
