فوتو: istockphoto.com
ۇلتتىق جوسپارداعى بولجامدارعا سۇيەنسەك, ينۆەستيتسيالاردىڭ جالپى ىشكى ونىمدەگى ۇلەسى قازىرگى 14-15%-دان 2029 جىلى 23%-عا دەيىن ۇلعايادى. ناتيجەسىندە, نەگىزگى كاپيتالعا سالىناتىن قارجى اعىنى 2024 جىلعى دەڭگەيمەن سالىستىرعاندا 2029 جىلى 2,5 ەسەگە ارتادى دەپ كۇتىلەدى. بۇل رەتتە مەتاللۋرگيا, مۇناي حيمياسى, گاز ءوندىرىسى مەن فارماتسەۆتيكا سالالارىن ىلگەرىلەتۋگە باسىمدىق بەرىلمەك.
بۇگىندە مەملەكەت ينۆەستور شاقىرۋمەن عانا شەكتەلمەي, ەكونوميكالىق ءوسۋدىڭ پرواكتيۆتى ساياساتىن ەنگىزۋگە كوشتى. ەندىگى كەزەكتە ۇكىمەت جەرگىلىكتى بيزنەستىڭ سۇرانىسىنا ساي «ينۆەستيتسياعا تاپسىرىس» قالىپتاستىرىپ, جاڭا وندىرىستەردى ورىستەتۋ ءۇشىن دايىن تەحنولوگيالارى بار شەتەلدىك سەرىكتەستەردى تارتۋدى قولعا الادى.
«بۇل ساياساتتىڭ ءمانى – مەملەكەتتىڭ تەك ينۆەستورلاردى شاقىرۋىمەن عانا شەكتەلەتىن مودەلدەن ناقتى ينۆەستيتسيالىق جوبالاردى قالىپتاستىرۋ مەن ىسكە قوسۋعا مەملەكەتتىڭ بەلسەندى قاتىسۋى مودەلىنە كوشۋ. ينۆەستيتسيا تارتۋدىڭ بۇل ءتاسىلى ەكونوميكا سالالارىنىڭ ناقتى قاجەتتىلىكتەرىنە باعىتتالعان. اتالعان جوبالاردى جۇزەگە اسىرۋ ەلدەگى ەڭبەك ونىمدىلىگىنىڭ ورتاشا دەڭگەيىن ارتتىرادى, بۇل «ورتا تابىس تۇزاعىن» ەڭسەرۋ جانە جان باسىنا شاققانداعى جالپى ىشكى ءونىمنىڭ ودان ءارى ءوسۋ ءۇشىن قاجەت نەگىزگى شارتتاردىڭ ءبىرى», دەدى سەرىك جۇمانعارين.
