سىر ءوڭىرىنىڭ پوليتسەيلەرى ءىرى ەسىرتكى القابىن جويدى

قىزىلوردا. 13 تامىز. قىزىلوردالىق پوليتسەيلەر جەدەل-پروفيلاكتيكالىق رەيد جۇمىستارى بارىسىندا شيەلى اۋدانى №15 بەكەتتەن وڭتۇستىككە قاراي 5 شاقىرىم جەردە ەسىرتكى زاتىنا ۇقساس وسىمدىك ءوسىپ تۇرعان القاپتى انىقتادى. بۇل تۋرالى egemen.kz ءتىلشىسى حابارلادى. شيەلى اۋداندىق ىشكى ىستەر ءبولىمىنىڭ پوليتسيا قىزمەتكەرلەرى جەدەل-ىزدەستىرۋ جۇمىستارىن جۇرگىزۋ بارىسىندا جولسىز قۇمداردىڭ اراسىندا ەسىرتكى زاتىنا ۇقساس وسىمدىك ەگىپ جاتقان بەلگىسىز ازاماتتى بايقاپ قالادى. جەدەل-تەرگەۋ توبى شاقىرىلىپ, شۇعىل تۇردە قىزىلوردا قالاسىنىڭ 1978 جىلى تۋعان ازاماتى قۇرىقتالدى. تەكسەرۋ بارىسىندا 3364 ءتۇپ جاسىل ءتۇستى ەرەكشە ءيىسى بار وسىمدىك جانە ەگۋ بارىسىندا قولدانىلعان قۇرال-سايماندارى ايعاق زات رەتىندە الىندى. انىقتالعان 3364 ءتۇپ سورا وسىمدىگىنىڭ 3306 ءتۇبى ورتەۋ جولىمەن جويىلسا, 58 ءتۇبى سوت-ساراپتامالىق تەكسەرىسكە جولداندى. پسيحوتروپتىق زاتتار مەن پرەكۋرسورلاردى زەرتتەۋ سوت-ساراپتاماسى قورىتىندىسى بويىنشا انىقتالعان وسىمدىك سورا وسىمدىگىنە جاتاتىندىعى بەلگىلى بولدى. قازىرگى تاڭدا قىلمىستىق كودەكسىنىڭ 300-بابى, 1-بولىگى بويىنشا قىلمىستىق ءىس قوزعالىپ, سەزىكتى ازامات اۋداندىق ىشكى ىستەر ءبولىمىنىڭ ۋاقىتشا ۇستاۋ اباقتىسىنا قاماققا الىندى. ەرجان بايتىلەس. دەرەك: egemen.kz. سۋرەت: elarna.com.