ۇلتتىق اكادەميالىق كىتاپحانا مەن «امانگەلدى يمان» قوعامدىق قورى بىرلەسىپ ۇيىمداستىرعان ءىس-شارادا جازۋشىلار وداعىنىڭ مۇشەسى, قازاقستاننىڭ ەڭبەك سىڭىرگەن مادەنيەت قىزمەتكەرى, ەرەيمەنتاۋ مەن باياناۋىل اۋداندارىنىڭ قۇرمەتتى ازاماتى سايلاۋ بايبوسىن العاشقى ءسوزدى الىپ, استانا مەن الماتىدان جىراقتاعى قالامگەرلەردىڭ شىعارماشىلىعى ءجىتى باعالانا بەرمەيتىنىن, سول سەبەپتى دە وڭىردەگى جازۋشىلار نازاردان تىس قالاتىنىن تىلگە تيەك ەتتى. وسى ولقىلىقتىڭ ورنىن تولتىرۋ ماقساتىندا استانانىڭ ادەبيەتسۇيەر قاۋىمىنا «اجالىن جوعالتقان ادام» اتتى رومانىن تانىستىرۋدى كوزدەپ كەلگەنىن جەتكىزدى.
پارلامەنت سەناتىنىڭ دەپۋتاتى التىنبەك نۇح ۇلى, ءماجىلىس دەپۋتاتتارى قازىبەك يسا, نۇرجان اشىمبەتوۆ, سونداي-اق پروفەسسور سەرىك نەگيموۆ, جازۋشىلار ءمادي ايىمبەتوۆ, نۇرجان قۋانتاي ۇلى, ايگۇل كەمەلباەۆا, جۇماعالي قوعاباي جاڭا رومان تاقىرىبىنىڭ توسىندىعىن, كومپوزيتسيالىق قۇرىلىمىن, وقيعا ءوربىتۋىن, ءتىل جاتىقتىعىن, باسقادا جەتىستىكتەرىن ايتا كەلىپ, بۇگىنگى زاماناۋي پروزاعا قوسىلعان ءوز ايتارى بار شىعارما ەكەنىن اتاپ ءوتتى.
ماسەلەن, فيلولوگيا عىلىمدارىنىڭ دوكتورى سەرىك نەگيموۆ سويلەپ, اتالعان روماندى قىزىعا وقىپ شىققانىن, تۋىندىدا اۆتور ساناۋلى كەيىپكەرلەردىڭ تاعدىرى ارقىلى ادامزاتقا ورتاق ماڭگىلىك قۇندىلىقتاردى, ادالدىق پەن ساتقىندىقتى, مەيىرىم مەن قاتىگەزدىكتى, ماحاببات پەن توزىمدىلىكتى تەرەڭنەن اشقانىن اڭگىمەلەدى. «كىتاپتى وقىپ وتىرىپ, باس كەيىپكەرمەن بىرگە قينالدىق. رومانداعى وقيعالاردىڭ شىنايىلىعى سونداي, دەنەمىزدى تۇرشىكتىردى», دەدى. ال سەناتور التىنبەك نۇح ۇلى اۆتوردىڭ اقىندىعى مەن ولكەتانۋشى رەتىندەگى ەڭبەگىنە ارنايى توقتالىپ, پروزاداعى وسى ءبىر ۇلكەن تۋىندىسى بۇگىنگى وقىرماننىڭ ىزدەپ ءجۇرىپ وقيتىن دۇنيەسى بولاتىنىنا سەنىم ءبىلدىردى.
