قىزىلوردادا مەكتەپكە دەيىنگى ءبىلىم بەرۋ ۇيىمدارىنىڭ فورۋمى ءوتتى

قىزىلوردا. 13 تامىز. قىزىلوردادا «مەكتەپكە دەيىنگى تاربيە مەن وقىتۋ جۇيەسىن جاڭارتۋ: جاڭا ساپا جانە جاڭا كوزقاراس» تاقىرىبىندا رەپۋبليكالىق فورۋم ءوتتى. بۇل تۋرالى egemen.kz ءتىلشىسى حابارلادى. فورۋمعا ءبىلىم جانە عىلىم ۆيتسە-ءمينيسترى ەسەنعازى يمانعاليەۆ, «يۋنيسەف»  بالالار  قورىنىڭ وكىلى جانە ەلىمىزدىڭ تۇكپىر-تۇكپىرىنەن كەلگەن ادىسكەر, پەداگوگ ماماندار قاتىستى. قوناقتار بۇگىنگى بالاباقشالاردىڭ جاعدايى, ولاردىڭ بالا تاربيەسىندەگى ءرولى سياقتى اۋقىمدى ماسەلەلەردى ءسوز ەتتى. شارانىڭ نەگىزگى ماقساتى – تاجىريبە الماسىپ, بىلىمدەرىن جەتىلدىرۋ. فورۋمعا ارنايى كەلىپ قاتىسقان ءبىلىم جانە عىلىم ۆيتسە-ءمينيسترى ەسەنعازى يمانعاليەۆ ايماقتىڭ مەكتەپكە دەيىنگى ءبىلىم بەرۋ ۇيىمدارىنىڭ جۇمىسىنا وڭ باعاسىن بەردى. ويتكەنى قازىردىڭ وزىندە قىزىلوردا وبلىسىنىڭ بۇلدىرشەندەردى بالاباقشامەن قامتۋ كورسەتكىشى 92,2 پايىزدى قۇرايدى. بۇل كورسەتكىش جىل سوڭىنا دەيىن 100 پايىزعا جەتكىزىلىپ, «بالاپان» مەملەكەتتىك باعدارلاماسىن ۋاقىتىنان بۇرىن اياقتاۋ جوسپارلانىپ وتىر. قىزىلوردا وبلىسى اكىمىنىڭ ورىنباسارى راۋان كەنجەحان ۇلى «بالاپان» باعدارلاماسى مەملەكەتتىك-جەكە مەنشىك سەرىكتەستىكتى جۇزەگە اسىرۋدىڭ ءتيىمدى جولى ەكەنىن ايتتى. «مەكتەپكە دەيىنگى مەكەمەلەردىڭ وقىتۋ, تاربيەلۋ ادىستەرىنە دە كوپ كوڭىل ءبولىپ كەلەمىز. ولاردىڭ ماتەريالدىق-تەحنيكالىق بازاسىن نىعايتۋ ءۇشىن دە ءبىرشاما جۇمىستار اتقارىلدى. بيىلدىڭ وزىندە 200 بالاباقشاعا «مانتەسسوري» ادىسىمەن وقىتۋعا قاجەتتى قۇرال-جابدىقتار الىپ بەرىلدى. ياعني, تاربيە مەن وقىتۋ جۇيەسىندەگى جاڭاشىلدىققا بەتبۇرىس قارقىن الۋدا», – دەدى ر.كەنجەحان ۇلى. ەرجان بايتىلەس. دەرەك: egemen.kz. سۋرەت: قازاقپارات.