بۇگىندە الماتى قالاسىنىڭ 8 اۋدانىندا 7-9-سىنىپ وقۋشىلارىنا ارنالعان 28 «جاس سارباز» سىنىبى جۇمىس ىستەيدى, وعان قاتىساتىن وقۋشىلار سانى – 768. الماتى قالالىق پوليتسيا دەپارتامەنتىمەن بىرلەسىپ, 5-7-سىنىپ وقۋشىلارىنا ارنالعان 15 «جاس ساقشى» سىنىبى اشىلدى. مەكتەپتەر مەن كوللەدجدەر بازاسىندا 22 اسكەري-پاتريوتتىق كلۋبقا 800-دەن استام وقۋشى قاتىسادى.
«العاشقى اسكەري جانە تەحنولوگيالىق دايىندىق» ءپانىن وقىتۋدىڭ ساپاسىن ارتتىرۋ ماقساتىندا قالادا وسى باعىت بويىنشا 224 پەداگوگ ەڭبەك ەتىپ جاتىر. بۇل اتالعان ءپاننىڭ مازمۇندىق جانە ادىستەمەلىك تۇرعىدان تۇراقتى دامىپ كەلە جاتقانىن كورسەتەدى. جاستاردى اسكەري-پاتريوتتىق ءىس-شارالارعا تارتۋعا ەرەكشە كوڭىل ءبولىنىپ جاتىر. بىلتىرعى جىلدىڭ قورىتىندىسى بويىنشا قالا مەكتەپتەرى مەن كوللەدجدەردە اسكەري جيىندار, سپارتاكيادالار, وليمپيادالار, كونكۋرستار, پاتريوتتىق فەستيۆالدەر, سونداي-اق «ايبىن», «قالقان», «ساردار», «مەرگەن-ارۋ», «سارباز» جانە وزگە دە جارىستاردى قامتىعاندا 90-نان استام ءتۇرلى ءىس-شارا ءوتتى.
مەملەكەتتىك كەڭەسشى اسكەري-پاتريوتتىق تاربيە جونىندەگى جۇمىستى كۇشەيتۋدى تاپسىردى
الماتى قالاسىنىڭ وقۋشىلارى رەسپۋبليكالىق جانە حالىقارالىق دەڭگەيدەگى جارىستاردا جوعارى ناتيجەلەرگە قول جەتكىزىپ كەلەدى. اتاپ ايتقاندا, قالانىڭ قۇراما كومانداسى اسكەري ەستافەتادا 1-ورىن يەلەنىپ, قورعانىس ءمينيسترىنىڭ كۋبوگىن جەڭىپ الدى. بىرقاتار ءىرى سپارتاكيادا مەن حالىقارالىق اسكەري-پاتريوتتىق سايىستا جۇلدەلى ورىنعا يە بولدى. بىلتىر ءبىلىم بەرۋ ۇيىمدارىندا اسكەري تاكتيكانىڭ نەگىزدەرىن تاجىريبەلىك تۇرعىدا مەڭگەرۋگە باعىتتالعان «گەوتاكتيكا» باعدارلاماسى پيلوتتىق رەجيمدە ەنگىزىلدى. «ەر بورىشى – ەل قورعاۋ» تاقىرىبىمەن ۇيىمداستىرىلعان اشىق ەسىك كۇندەرى اياسىندا 20 مىڭنان استام ءبىلىم الۋشى اسكەري بولىمدەرگە, جوعارى اسكەري وقۋ ورىندارىنا جانە اسكەري كافەدرالارعا بارىپ, اسكەري قىزمەتتىڭ ەرەكشەلىكتەرىمەن تانىستى. جۇزەگە اسىپ جاتقان شارالار جاستاردىڭ بويىندا وتانسۇيگىشتىك رۋحتى قالىپتاستىرۋعا, اسكەري قىزمەتكە دەگەن قۇرمەتتى ارتتىرۋعا جانە وتاندى قورعاۋعا جاۋاپكەرشىلىكپەن قاراۋ مادەنيەتىن نىعايتۋعا ىقپال ەتىپ كەلەدى.
