«مەن – ءححى عاسىر ۇرپاقتارىنىڭ قۇرداسىمىن» تاقىرىبىمەن وتكەن كەزدەسۋگە الماتى قالاسى مادەنيەت باسقارماسىنىڭ باسشىسى دانيار اليەۆ, مۇقاعالي ماقاتاەۆتىڭ ۇلى جۇلدىز ماقاتاەۆ جانە كەلىنى باقىتكۇل ايداروۆا, اقىن, «قازاق ادەبيەتى» گازەتىنىڭ باس رەداكتورى باۋىرجان جاقىپ, ساۋلە دوسجان, جاراس سارسەك, باقىت بەدەلحان, باقىت جاعىپار سىندى بەلگىلى جازۋشىلار مەن اقىندار, پۋبليتسيستتەر, عالىم-زەرتتەۋشىلەر, جاستار, مەكتەپ وقۋشىلارى مەن پوەزياسۇيەر قاۋىم قاتىستى.
«مۇقاعالي ماقاتاەۆ دەگەن كەزدە ەسكە قازاق پوەزياسى, قازاقتىڭ قارا ولەڭى كەلەدى. ابايدا قارا اۋىل بار, ماحامبەتتىڭ قارا ويى بار, مۇقاعاليدىڭ قاراسازى بار, قازاقتىڭ قارا شاڭىراعى بار, قارا قازانى بار, قارا دومبىراسى بار. سوندىقتان دا بۇگىن قارا ولەڭنىڭ پاديشاسى, قازاقتىڭ جارىق جۇلدىزى مۇقاعاليدىڭ 95 جىلدىعى قۇتتى بولسىن!» دەدى دانيار اليەۆ.
جيىنعا ارنايى كەلگەن قازاقستان جازۋشىلار وداعىنىڭ مۇشەسى, مۇقاعالي اقىننىڭ تۋىس ءىنىسى مۇحتارحان قالي ۇلى اقىنعا ارناعان ولەڭ جولدارىن وقىپ, كىتاپحانا قورىنا كىتاپتار سىيعا تارتتى. ءداستۇرلى ءانشى, مادەنيەت قايراتكەرى ەركىن شۇكىمان جانە ءانشى, دومبىراشى نۇرجان جانپەيىسوۆتىڭ ورىنداۋىندا اقىن سوزىنە جازىلعان اندەر شىرقالدى.
ج. ەلەبەكوۆ اتىنداعى رەسپۋبليكالىق ەسترادا-تسيرك كوللەدجىنىڭ ستۋدەنتتەرى اقيىق اقىننىڭ شىعارمالارى نەگىزىندە «جاس ءومىر, ساعان وكپەم جوق» اتتى ساحنالىق قويىلىمىن ۇسىندى.
اقىننىڭ ۇلى جۇلدىز مۇقاعالي ۇلى جانە كەلىنى باقىتكۇل ايداروۆا ۇيىمداستىرۋشىلارعا اۋلەت اتىنان العىس ءبىلدىرىپ,
«بارشا اۋلەتىمىزدىڭ اتىنان وسىنداي ىستىق ىقىلاس پەن شىنايى قۇرمەت كورسەتكەندەرى ءۇشىن العىس ايتامىن. قازاق حالقى باردا, جەرىمىز گۇلدەنىپ, ەلىمىز امان تۇرعاندا مۇقاعاليدىڭ رۋحى مەن پوەزياسى حالىقتىڭ رۋحىن كوتەرىپ, ارقاشان جاساي بەرمەك. قالا باسشىلىعىنىڭ باستاماسىمەن جۇزەگە اسقان بۇل ءىس-شارا اقىن رۋحىنا كورسەتىلگەن زور قۇرمەتتىڭ بەلگىسى بولىپ, بولاشاقتا اقىن مۇراسىن دارىپتەۋ جالعاسىن تاباتىنى ءسوزسىز», دەپ اتاپ ءوتتى.
قاراساز اۋىلى البان اسان اتىنداعى ورتا مەكتەپ-گيمنازياسى مەن م. ماقاتاەۆ اتىنداعى №140 مەكتەپ وقۋشىلارى اقىن ولەڭدەرىن جاتقا وقىپ, ادەبي شارانىڭ شىرايىن اشا ءتۇستى.
ءىس-شارادا اقىن شىعارماشىلىعىنا ارنالعان «مۇقاعالي – ماڭگىلىك جىردىڭ جۇلدىزى» كىتاپ كورمەسى ۇيىمداستىرىلىپ, ارنايى تۇسىرىلگەن بەينەروليك كورسەتىلدى.
مەكتەپ وقۋشىلارىنا الماتى قالاسى مادەنيەت باسقارماسىنىڭ اتىنان دانيار اليەۆ العىس حاتتار تابىس ەتتى.
