قايعىلى وقيعا 2025 جىلدىڭ كۇزىندە سولتۇستىك قازاقستان وبلىسى تيميريازەۆ اۋدانىنداعى دوكۋچاەۆو اۋىلىندا بولعان. تەرگەۋ دەرەگىنشە, 22 جاستاعى جۇمىسشى ماس كۇيىندە «بۋربات» جشس ديرەكتورى, 52 جاستاعى ازامات باتانوۆتىڭ ۇيىنە بارىپ, ونى اتىپ ولتىرگەن.
ءىس القابيلەردىڭ قاتىسۋىمەن قارالدى. سوت الدىندا ەكى ادام جاۋاپ بەردى. ونىڭ ءبىرى كاسىپكەرگە وتقان ۆاديم ورلوۆ بولسا, ەكىنشىسى اسا اۋىر قىلمىستى جاسىرىپ قالعان ۆيكتور تورگاشوۆ.
ايىپتاۋ نۇسقاسىنا سايكەس, ورلوۆ الكوگولدىك ماساڭ كۇيدە اڭشى مىلتىعىن الىپ, اۋىل ىشىندە بۇرىن رەنجىسكەن ادامدارمەن «ەسەپ ايىرىسۋعا» شىققان. كەيىن ول بۇرىن جۇمىس ىستەگەن شارۋاشىلىق باسشىسى باتانوۆتان ەڭبەكاقىسىن تالاپ ەتۋ ءۇشىن ونىڭ ۇيىنە بارعان. كەلىسپەۋشىلىك كەزىندە ورلوۆ كاسىپكەردىڭ كەۋدە تۇسىنا, كەيىن باسىنا وق اتقان. العان جاراقاتىنان كاسىپكەر كوز جۇمعان.
سوتتا ايىپتالۋشى باستاپقىدا كىناسىن ءىشىنارا مويىنداپ, كەيىن ءوزىن-ءوزى قورعادىم دەپ مالىمدەدى. ول شارۋاشىلىقتا بەيرەسمي جۇمىس ىستەپ, 1,3 ملن تەڭگە ەڭبەكاقى الماعانىن ايتقان. الايدا مارقۇمنىڭ قىزى بۇل مالىمەتتى جوققا شىعاردى.
10 اقپاندا سولتۇستىك قازاقستان وبلىسىنىڭ مامانداندىرىلعان اۋدانارالىق قىلمىستىق ىستەر جونىندەگى سوتى ۇكىم شىعاردى. ۇكىمگە سايكەس, ۆاديم ورلوۆ 11 جىلعا ورتاشا قاۋىپسىزدىكتەگى تۇزەۋ مەكەمەسىنە, ۆيكتور تورگاشوۆ 2 جىلعا ەڭ تومەنگى قاۋىپسىزدىكتەگى مەكەمەگە سوتتالدى.
سونداي-اق سوت ورلوۆتان مارقۇمنىڭ جۇبايى, ەكى قىزى مەن اتا-اناسىنىڭ ارقايسىسىنا مورالدىق شىعىن رەتىندە 2,5 ميلليون تەڭگەدەن ءوندىرىپ الۋ تۋرالى شەشىم شىعاردى.
الايدا, جابىرلەنۋشى تاراپ ۇكىمدى جەڭىل دەپ سانايدى, اپەللياتسياعا شاعىم بەرۋ ماسەلەسى ءالى قاراستىرىلىپ جاتىر.
