ءىس-شارا جوعارى وقۋ ورىندارىندا اسكەري دايارلاۋدى ۇيىمداستىرۋدىڭ وزەكتى ماسەلەلەرىن تالقىلاۋعا, وقۋ ۇدەرىسىن جەتىلدىرۋگە, سونداي-اق مەملەكەتتىك ورگاندار مەن جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارى اراسىنداعى ءوزارا ءىس-قيمىلدى نىعايتۋعا باعىتتالدى.
دوڭگەلەك ۇستەلگە پارلامەنت سەناتىنىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى اندرەي لۋكين, قازاتزۋ باسقارما توراعاسى – رەكتورى, ۇعا اكادەميگى, عىلىم دوكتورى قانات تىرەۋوۆ, پارلامەنت سەناتىنىڭ دەپۋتاتتارى, قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ, قازاقستان رەسپۋبليكاسى قورعانىس مينيسترلىگىنىڭ, ىشكى ىستەر مينيسترلىگىنىڭ ۇلتتىق ۇلانىنىڭ وكىلدەرى, سونداي-اق ەلدىڭ جەتەكشى جوعارى وقۋ ورىندارىنىڭ اسكەري كافەدرالارىنىڭ باسشىلارى قاتىستى.
كوشپەلى وتىرىس اياسىندا سەنات كوميتەتىنىڭ مۇشەلەرى قازاتزۋ-دىڭ اسكەري كافەدراسىندا بولىپ, وفيتسەرلەر مەن زاپاستاعى سەرجانتتاردى دايارلاۋ جاعدايىمەن, وقۋ ۇدەرىسىنىڭ ۇيىمداستىرىلۋىمەن, وقۋ-ماتەريالدىق بازامەن, ارنايى اۋديتوريالار مەن وقۋ كابينەتتەرىنىڭ جۇمىسىمەن تانىستى.
جيىن بارىسىندا قورعانىس مينيسترلىگىنىڭ اسكەري ءبىلىم جانە عىلىم دەپارتامەنتىنىڭ باستىعى, پولكوۆنيك مۇرات ولجاباەۆ, س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ اسكەري كافەدراسىنىڭ باستىعى, وتستاۆكاداعى پولكوۆنيك تولەگەن دۋلامباەۆ, سونداي-اق ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ اسكەري كافەدراسىنىڭ باستىعى, گەنەرال-مايور ەدىل ورازوۆ بايانداما جاسادى.
وتىرىستا كوميتەت توراعاسى اندرەي لۋكين كوشپەلى كەزدەسۋدىڭ ۋنيۆەرسيتەتتىڭ اسكەري كافەدراسىنىڭ قىزمەتىمەن تانىسۋعا ارنالعانىن اتاپ ءوتتى. اتالعان كافەدرا زاپاستاعى وفيتسەرلەر مەن سەرجانتتاردى ءتورت اسكەري-ەسەپتىك ماماندىق بويىنشا دايارلايدى. وقۋ ۇدەرىسىن ۇيىمداستىرۋ, ءبىلىم الۋشىلاردىڭ اسكەري-پاتريوتتىق تاربيەسى, ماتەريالدىق-تەحنيكالىق بازا دەڭگەيى مەن پروفەسسورلىق-وقىتۋشىلىق قۇرامنىڭ كادرلىق الەۋەتىنە ەرەكشە نازار اۋدارىلدى.
كوشپەلى وتىرىس قورىتىندىسى بويىنشا اسكەري دايارلاۋ ساپاسىن ارتتىرۋعا, نورماتيۆتىك-قۇقىقتىق بازانى جەتىلدىرۋگە جانە قارۋلى كۇشتەردى ساپالى ءارى سۇرانىسقا يە زاپاستاعى كادرلارمەن قامتاماسىز ەتۋگە باعىتتالعان ناقتى ۇسىنىمدار ازىرلەۋ جوسپارلانىپ وتىر.
