سونىڭ ءبىرى – قۇرعاق كيىز باسۋ تەحنيكاسىنا نەگىزدەلگەن كوركەم جۇمىس. جوباعا قاتىسقان وقۋشىلار تابيعي جۇنمەن جۇمىس ىستەۋ ارقىلى تەك قولونەر تاسىلدەرىن مەڭگەرىپ قانا قويماي, شىدامدىلىق پەن ۇقىپتىلىقتى, ەستەتيكالىق تالعامدى دامىتتى. ۇلتتىق مادەنيەتكە سۇيەنگەن كومپوزيتسيادا قازاقستاننىڭ ساۋلەتتىك نىشاندارى, ۇلتتىق رامىزدەر مەن تابيعات ەلەمەنتتەرى ۇيلەسىم تاپقان.
جوبا بارىسىندا وقۋشىلار قۇرعاق كيىز باسۋ تەحنيكاسىنىڭ قىر-سىرىن يگەرىپ, قولونەر ارقىلى ۇلتتىق قۇندىلىقتاردى تەرەڭىرەك تانىدى. سونىمەن قاتار شىعارماشىلىق ويلاۋ قابىلەتىن دامىتىپ, ۇجىممەن بىرلەسە جۇمىس ىستەۋدىڭ ماڭىزىن سەزىندى. ءاربىر جۇمىس – وقۋشىنىڭ ىشكى الەمى مەن جەكە كوزقاراسىنىڭ كورىنىسى رەتىندە قالىپتاستى.
قولونەر ساباقتارى بالالار ءۇشىن تەك اسەم بۇيىم جاساۋ ۇدەرىسىمەن شەكتەلمەيدى. ول ەڭبەككە, ونەرگە دەگەن قۇرمەتتى ارتتىرىپ, ءوز ويىن ەركىن جەتكىزۋگە, ناتيجەگە جاۋاپكەرشىلىكپەن قاراۋعا ۇيرەتەدى. وسىنداي ورتادا ءار وقۋشى ءوز يدەياسىن جۇزەگە اسىرىپ, شىعارماشىلىق ەركىندىككە يە بولادى.
جوبانى ۇيىمداستىرىپ, باعىت-باعدار بەرگەن جوبا جەتەكشىسى, تەحنولوگيا ءپانىنىڭ مۇعالىمى پەرنەگۇل دەمەۋوۆا وقۋشىلاردىڭ ۇلتتىق ونەرگە قىزىعۋشىلىعىن ارتتىرۋدى باستى ماقسات ەتكەنىن اتاپ ءوتتى.
