كەندى التايدا تۋعان 33 جاستاعى سپورتشى حالىقارالىق ارەناداعى العاشقى جۇلدەسىنە 2008 جىلدىڭ اقپانىندا قول جەتكىزدى. گەرمانيانىڭ شليرزە قالاسىندا وتكەن تۋرنيردە كۇمىس مەدالدى موينىندا جارقىراتتى. ارادا بىرەر كۇن وتكەندە شۆەيتساريانىڭ ەنگەلبەرگiندە موگۋل مەن پاراللەلدى موگۋلدان توپ جاردى. جاسوسپىرىمدەر مەن جاستار اراسىنداعى جەڭىستەرى يۋليانى قاناتتاندىرعانى سونشا, ەرەسەكتەر باسەكەسىندە دە بىردەن كوزگە ءتۇستى. ۇلتتىق قۇراما باپكەرلەرى 17 جاستاعى فريستايلشىنى ۆانكۋۆەر وليمپياداسىنا قوسۋدى ءجون كوردى. «ۇيەڭكى جاپىراقتار ەلىندەگى» دودانى جەرلەسىمىز 11-ورىنمەن قورىتىندىلادى.
2014 جىلى سوچي وليمپياداسىنا اتتانعاندا ونىڭ شەبەرلىگى تولىق شىڭدالعان بولاتىن. رەسەي جەرىندە وتانداسىمىز تاماشا ونەر كورسەتكەنىمەن, تورەشىلەر ونى ۇزدىكتەر قاتارىنا قوسپادى. جەتىنشى ورىندى مىسە تۇتپاعان گالىشەۆا مەن باپكەرلەرى شاعىم تۇسىرگەنىمەن, ناتيجە وزگەرمەدى. دەسە دە, العان بەتىنەن قايتپايتىن قايسار قىز ءتورت جىلدان سوڭ دەگەنىنە جەتتى. وڭتۇستىك كورەيانىڭ پحيونچحان وليمپياداسىندا قولا مەدال يەلەنىپ, ەلىمىزدىڭ فريستايل شەبەرلەرى تاريحىنداعى تۇڭعىش جۇلدەنى ەلگە سىيلادى.
وليمپيادادان بولەك, وسكەمەندىك سپورتشى – الەم چەمپيونى (2019), كۇمىس (2017, 2021), قولا (2021) جۇلدەگەر. دۇنيەجۇزىلىك ۋنيۆەرسيادادا ءۇش مارتە (2015, 2017), ازيا ويىندارىندا ءۇش رەت (2011, 2017) توپ جارىپ, ءبىر كۇمىس (2017) مەدال ەنشىلەدى. سونداي-اق ونىڭ قورجىنىندا باسقا دا ءىرى حالىقارالىق تۋرنيرلەردىڭ جۇلدەلەرى بار.
ساڭلاق سپورتشىنىڭ ەندىگى ماقساتى – وليمپيادا ويىندارىندا تاعى ءبىر مارتە اتوي سالۋ.
