سۋرەتتەردى تۇسىرگەندەر – ا.دۇيسەنباەۆ, ە.ۇكىباەۆ
ىقپالداستىقتىڭ جاڭا كەزەڭى
كەلىسسوزدەردەن بۇرىن پاكىستان پرەمەر-ءمينيسترىنىڭ رەزيدەنتسياسىندا قاسىم-جومارت توقاەۆتى رەسمي قارسى الۋ ءراسىمى ءوتتى. مەملەكەت باسشىسىن پرەمەر-مينيستر شاحباز شاريف كۇتىپ الدى.
قازاقستان پرەزيدەنتى مەن پاكىستان پرەمەر-ءمينيسترى سۋرەتكە تۇسكەن سوڭ ەكى ەلدىڭ مەملەكەتتىك ءانۇراندارى ورىندالدى. سودان كەيىن قۇرمەت قاراۋىلىنىڭ باستىعى راپورت بەردى. قاسىم-جومارت توقاەۆ پەن شاحباز شاريف ءبىر-بىرىنە رەسمي دەلەگاتسيا مۇشەلەرىن تانىستىردى.
قارسى الۋ راسىمىنەن كەيىن قازاقستان پرەزيدەنتى پاكىستان پرەمەر-ءمينيسترىنىڭ رەزيدەنتسياسى اۋماعىندا اعاش وتىرعىزدى. بۇدان سوڭ ەكى ەل باسشىلارى كەلىسسوز زالىنا باردى.
تاراپتار كەيىنگى جىلدارى قازاقستان مەن پاكىستان اراسىندا كوپجوسپارلى ىنتىماقتاستىق قارقىندى دامىپ كەلە جاتقانىن اتاپ ءوتتى. سونداي-اق ساياسي, ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق ىقپالداستىقتى نىعايتۋدىڭ كەلەشەگى زور باعىتتارىن تالقىلادى.
كەزدەسۋ بارىسىندا ساۋدا, كولىك-لوگيستيكا, ەنەرگەتيكا, اۋىل شارۋاشىلىعى, تسيفرلاندىرۋ, عارىش جانە قارجى سالالارىنداعى قارىم-قاتىناستى تەرەڭدەتۋ ماسەلەسىنە باسا نازار اۋدارىلدى.
قاسىم-جومارت توقاەۆ پەن شاحباز شاريف وڭىرلىك جانە حالىقارالىق كۇن ءتارتىبىنىڭ وزەكتى ماسەلەلەرى جونىندە پىكىر الماستى.
سەرىكتەستىككە – تىڭ سەرپىن
بۇدان سوڭ قاسىم-جومارت توقاەۆ پەن شاحباز ءشاريفتىڭ كەلىسسوزدەرى ەكى ەل دەلەگاتسيالارىنىڭ قاتىسۋىمەن كەڭەيتىلگەن قۇرامدا جالعاستى.
پرەزيدەنت يسلامابادقا كەلىپ, پاكىستاننىڭ باي تاريحىمەن, مادەني مۇراسىمەن جانە عاسىرلار بويى قالىپتاسقان داستۇرلەرىمەن تانىسۋدى زور مارتەبە سانايتىنىن اتاپ ءوتتى.
– قازاقستان پرەزيدەنتى رەتىندە پاكىستانعا ءبىرىنشى رەت مەملەكەتتىك ساپارمەن كەلىپ وتىرمىن. بۇل ساپار تاريحي مانگە يە جانە ۋاقىت تەزىنەن وتكەن سەرىكتەستىگىمىزدىڭ ماڭىزدى كەزەڭى سانالادى. مەن بۇعان سەنىمدىمىن. حالىقتارىمىزدىڭ جىبەك جولى ارقىلى جانە كەڭ تارالعان يسلام وركەنيەتى اياسىندا عاسىرلار بويى قالىپتاسقان دوستىعىن جوعارى باعالايمىن, – دەدى قاسىم-جومارت توقاەۆ.
مەملەكەت باسشىسى اتالعان ساپار ديپلوماتيالىق قارىم-قاتىناستىڭ ورناعانىنا 34 جىل تولۋىمەن تۇسپا-تۇس كەلگەنىنە توقتالىپ, مۇنىڭ رامىزدىك مانىنە نازار اۋداردى. پرەزيدەنتتىڭ ايتۋىنشا, پاكىستان – قازاقستاننىڭ تاۋەلسىزدىك العان العاشقى جىلداردان بەرى وڭتۇستىك ازياداعى ماڭىزدى ءارى سەنىمدى سەرىكتەسى.
قاسىم-جومارت توقاەۆ بۇگىن قول قويىلاتىن ستراتەگيالىق سەرىكتەستىك ورناتۋ تۋرالى بىرلەسكەن دەكلاراتسيا ءوزارا ىقپالداستىققا جول اشاتىن ماڭىزدى تاريحي مەجەنى ايقىندايتىنىن ايتتى.
مەملەكەت باسشىسىنىڭ پىكىرىنشە, استانا مەن يسلاماباد ەكىجاقتى بايلانىستار مەن ىنتىماقتاستىققا تىڭ سەرپىن بەرەتىن مۇمكىندىككە يە.
پرەزيدەنت پاكىستانعا ۇلكەن دەلەگاتسيامەن جانە ساۋدا-ەكونوميكالىق, ينۆەستيتسيالىق ىنتىماقتاستىقتى, سونداي-اق باسقا دا باسىم سالالارداعى ىقپالداستىقتى ارتتىرۋعا باعىتتالعان ناقتى ۇسىنىستارمەن كەلگەنىن اتاپ ءوتتى.
كەزدەسۋدە كولىك باعىتتارىن ءوزارا ۇشتاستىرۋعا ەرەكشە ءمان بەرىلدى. بۇل – قازاقستاننىڭ نەگىزگى باسىمدىقتارىنىڭ ءبىرى. ەلىمىز شىعىس پەن باتىستى, سولتۇستىك پەن وڭتۇستىكتى جالعايتىن توعىز جولدىڭ تورابىندا ورنالاسقان. پرەزيدەنتتىڭ ايتۋىنشا, قازاقستان ورتالىق ازيا ەلدەرىمەن ۇيلەسىمدى قارىم-قاتىناس جاساۋ ارقىلى كولىك-لوگيستيكا سالاسىنداعى ناقتى جوبالاردى جۇزەگە اسىرۋدى جالعاستىرادى.
قاسىم-جومارت توقاەۆ پاكىستان پرەمەر-ءمينيسترىن قازاقستانعا مەملەكەتتىك ساپارمەن كەلۋگە شاقىردى. سون-
داي-اق بۇگىنگى ۋاعدالاستىقتاردىڭ جۇزەگە اسىرىلۋىن پىسىقتاۋ جانە ەكىجاقتى قارىم-قاتىناستى نىعايتۋدىڭ الداعى قادامدارىن ايقىنداۋ ءۇشىن مارتەبەلى مەيماندى بيىل قارسى الۋعا دايىن ەكەنىن جەتكىزدى.
كەزدەسۋدە اتاپ وتىلگەندەي, قازاقستان مەن پاكىستاننىڭ كوپجاقتى الاڭداردا, سونىڭ ىشىندە بۇۇ, شىۇ جانە باسقا دا ۇيىمدار اياسىندا تىعىز ىقپالداستىقتى جالعاستىرۋى ماڭىزدى.
شاحباز شاريف قازاقستان پرەزيدەنتىن يسلامابادتا ىستىق ىقىلاسپەن قارسى الدى.
– ەلىمىزگە ارنايى ۋاقىت تاۋىپ كەلگەنىڭىز ءۇشىن سىزگە العىس ايتامىز. پاكىستان حالقىمەن, ۇكىمەتىمەن بىرگە ءسىزدى قارسى العانىما قۋانىشتىمىن. قازاقستان – ءبىزدىڭ ستراتەگيالىق سەرىكتەسىمىز. دوستىعىمىزدى نىعايتىپ, ەكونوميكانىڭ ءتۇرلى باعىتتارىندا, ساياسات, قورعانىس سالالارىندا سەنىمدى سەرىكتەستىك ورناتۋ, سونداي-اق ساۋدا دالىزدەرىن قالىپتاستىرۋ ماقساتىندا قازاقستان ۇكىمەتىمەن تىعىز قارىم-قاتىناستا جۇمىس ىستەگىمىز كەلەدى. بۇعان كۇمانىڭىز بولماسىن, – دەدى پرەمەر-مينيستر.
شاحباز ءشاريفتىڭ ايتۋىنشا, پاكىستان مەن قازاقستاننىڭ ساۋدا-ەكونوميكالىق ىنتىماقتاستىقتى, سونىڭ ىشىندە ەنەرگەتيكا, ونەركاسىپ, اۋىل شارۋاشىلىعى, كولىك, تسيفرلاندىرۋ سالالارىنداعى سەرىكتەستىكتى دامىتۋدا الەۋەتى جەتكىلىكتى. پرەمەر-مينيستر ەكىجاقتى قارىم-قاتىناستىڭ بارلىق باعىتى بويىنشا ناقتى ءارى ەلەۋلى پروگرەسس قاجەت ەكەنىنە نازار اۋداردى.
كەلىسسوز سوڭىندا قاسىم-جومارت توقاەۆ پەن شاحباز شاريف ەكى ەل حالىقتارىنىڭ يگىلىگى ءۇشىن سان قىرلى ىنتىماقتاستىقتى ودان ءارى تەرەڭدەتۋگە مۇددەلى ەكەنىن راستادى.
پرەزيدەنت قاسىم-جومارت توقاەۆ پەن پرەمەر-مينيستر شاحباز شاريف قازاقستان رەسپۋبليكاسى مەن پاكىستان يسلام رەسپۋبليكاسى اراسىندا ستراتەگيالىق سەرىكتەستىك ورناتۋ تۋرالى بىرلەسكەن دەكلاراتسياعا قول قويدى. سونداي-اق مەملەكەت باسشىسى مەن پاكىستان پرەمەر-ءمينيسترىنىڭ قاتىسۋىمەن 19 قۇجاتقا قول قويىلدى.
سالتاناتتى ءىس-شارادا قاسىم-جومارت توقاەۆتىڭ پاكىستانعا مەملەكەتتىك ساپارى بارىسىندا بۇدان بولەك تاعى 18 قۇجاتقا قول قويىلعانى جونىندە حابارلاندى.
مازمۇندى ءارى ناتيجەلى كەلىسسوزدەر
مەملەكەت باسشىسى پاكىستان پرەمەر-ءمينيسترى شاحباز شاريفپەن جۇرگىزگەن كەلىسسوزدەرىنىڭ قورىتىندىسى بويىنشا باق وكىلدەرىنىڭ الدىندا ءسوز سويلەدى.
پرەزيدەنت قاسىم-جومارت توقاەۆ پاكىستانعا مەملەكەتتىك ساپارمەن كەلۋگە شاقىرعانى ءۇشىن پرەمەر-مينيستر شاحباز شاريفكە العىس ايتىپ, قازاق دەلەگاتسياسىن قوناقجايلىقپەن قارسى العان پاكىستان حالقىنا ريزاشىلىعىن ءبىلدىردى. سونداي-اق تاريحى تەرەڭ, مادەنيەتى باي, حالىقارالىق ساحناداعى بەدەلى بيىك باۋىرلاس پاكىستانعا كەلگەنىنە قۋانىشتى ەكەنىن جەتكىزدى.
– پاكىستان – قازاقستاننىڭ وڭتۇستىك ازياداعى جانە ودان تىسقارى جەرلەردەگى سەنىمدى ءارى ماڭىزدى سەرىكتەسى. حالىقتارىمىزدى ۇلى جىبەك جولىنان باستاۋ العان تاعدىرلى بايلانىس پەن مادەني-رۋحاني ساباقتاستىق جالعاپ كەلەدى. ءبىزدىڭ قۇندىلىقتارىمىز بەن داستۇرلەرىمىز ۇندەس, نيەتىمىز بەن تىلەگىمىز ورتاق, مۇراتىمىز ءبىر. ۇكىمەتتەرىمىز بەن ىسكەرلىك ورتا دەڭگەيىندە سىندارلى ساياسي ديالوگ, ورنىقتى ەكونوميكالىق قاتىناستار قالىپتاسىپ, جۇيەلى تۇردە نىعايۋدا. بۇگىن قادىرلى پرەمەر-مينيستر مىرزامەن تاريحي قۇجاتقا – قازاقستان مەن پاكىستان اراسىندا ستراتەگيالىق سەرىكتەستىك ورناتۋ تۋرالى بىرلەسكەن دەكلاراتسياعا قول قويدىق. بۇل قۇجات ءوزارا بايلانىستاردى جاڭا دەڭگەيگە كوتەرۋگە, سونداي-اق ەكىجاقتى جانە كوپجاقتى كۇن ءتارتىبىنىڭ بارلىق سپەكترى بويىنشا ىنتىماقتاستىقتى كەڭىنەن دامىتۋعا جول اشادى. ەلدەرىمىز اراسىنداعى دوستىق قاتىناستاردى جانە ءوزارا ءتيىمدى ىقپالداستىقتى تەرەڭدەتۋگە پاكىستان پرەمەر-ءمينيسترى شاحباز شاريف ايتارلىقتاي زور ۇلەس قوستى. سول ءۇشىن وعان العىس ايتامىن, – دەدى مەملەكەت باسشىسى.
قاسىم-جومارت توقاەۆ شاحباز ءشاريفتى ەلىن العا باتىل باستاعان كورەگەن كوشباسشى دەپ اتادى. ونىڭ كەلەشەككە باعدارلانعان ساليقالى ساياسات جۇرگىزۋىنىڭ ارقاسىندا يسلامابادتىڭ ايماقتاعى جانە الەمدەگى بەدەلى جىلدان-جىلعا ارتىپ كەلەدى.
– بىلتىر پاكىستان بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلاندى. ەلدىڭ سىندارلى ءارى جاۋاپتى قادامدارى ايماقتاعى بەيبىتشىلىك پەن تۇراقتىلىقتى نىعايتۋعا سەپتىگىن تيگىزدى. پاكىستاننىڭ ەكونوميكالىق الەۋەتى زور, ونەركاسىپتىك بازاسى دامىعان, كولىك-ترانزيت مۇمكىندىكتەرى مول. پاكىستاننىڭ اۋىل شارۋاشىلىعى, جەڭىل ونەركاسىبى, مەديتسينا ونىمدەرى حالىقارالىق نارىقتا كەڭىنەن تارالعان. اسكەري-ونەركاسىپتىك كەشەنىنىڭ سەرپىندى دامۋى الەمدىك دەڭگەيدە تانىلعان. دوستاس حالىقتىڭ ءتۇرلى سالالارداعى ءاربىر جەتىستىگىنە شىن جۇرەكتەن ريزامىز, سىزدەرگە ءاردايىم تىلەكشىمىز, – دەدى قازاقستان پرەزيدەنتى.
مەملەكەت باسشىسى پرەمەر-مينيستر شاحباز شاريفپەن مازمۇندى ءارى ناتيجەلى كەلىسسوزدەر وتكىزگەنىنە توقتالدى.
– ىنتىماقتاستىعىمىزدىڭ ءتۇرلى باعىتتارىنا سەرپىن بەرەتىن ماڭىزدى ۇكىمەتارالىق قۇجاتتار قابىلداندى. ساۋدا, كولىك جانە لوگيستيكا, ونەركاسىپ, ەنەرگەتيكا, اقپاراتتىق تەحنولوگيالار, مادەني-گۋمانيتارلىق ماسەلەلەر جان-جاقتى تالقىلاندى. ساۋدا-ەكونوميكا سالاسىنداعى الىس-بەرىس كۇشەيىپ كەلەدى. بىلتىر ەكىجاقتى ساۋدا كورسەتكىشتەرى الدىڭعى جىلمەن سالىستىرعاندا ەكى ەسە ارتتى. بۇل باعىتتا ەلدەرىمىز اراسىنداعى «ساۋدا-ەكونوميكالىق ىنتىماقتاستىق جونىندەگى جول كارتاسى» (2025–2027 جىلدارعا ارنالعان) ءتيىمدى ىسكە اسىرىلىپ كەلەدى. ءبىز تاۋار اينالىمىن ارتتىرۋ ءۇشىن ناقتى شارالار قابىلداۋ جونىندە ۋاعدالاستىق. الداعى جىلدارى ونىڭ كولەمىن 1 ميلليارد دوللارعا جەتكىزۋ تۋرالى وتە ءورشىل ماقسات قويدىق. كاسىپكەرلەرىمىزدىڭ اراسىنداعى ءوزارا ءىس-قيمىلدى جانداندىرۋ ءۇشىن قولايلى جاعداي قالىپتاستىرۋدىڭ ماڭىزىن اتاپ وتتىك. اسىرەسە الىس-بەرىستى كەڭەيتۋ ماقساتىندا كولىك-لوگيستيكا سالاسىنداعى جوبالارعا باسىمدىق بەرەتىن بولدىق, – دەدى قاسىم-جومارت توقاەۆ.
كەلىسسوزدەر بارىسىندا پرەمەر-مينيستر پاكىستاننىڭ ترانزيتتىك جانە لوگيستيكالىق مۇمكىندىكتەرى كەڭەيىپ كەلە جاتقانىن, بۇل قازاقستاننىڭ حالىقارالىق نارىقتارعا شىعۋىنا بالاما جول بولا الاتىنىن اتاپ وتكەن.
– بۇل تۇرعىدا, پاكىستاننىڭ كاراچي جانە گۆادار پورتتارىنىڭ الەۋەتىن تالقىلادىق. باسىم مىندەتتەردىڭ ءبىرى رەتىندە ترانسكاسپي كولىك ءدالىزىن دامىتۋدى, اۋعانستان ارقىلى وتەتىن ترانزيتتىك باعىتتى ىلگەرىلەتۋدى قاراستىردىق. وسى ورايدا قازاقستان – تۇرىكمەنستان – اۋعانستان – پاكىستان باعىتىنداعى تەمىر جول باعىتىن ىسكە اسىرۋ پەرسپەكتيۆاسىن تالقىلادىق, – دەدى مەملەكەت باسشىسى.
بۇدان بولەك, ەكى ەل اراسىنداعى تىكەلەي اۋە قاتىناسىن قايتا قوسۋ مۇمكىندىگى زەردەلەنەدى. بۇل بيزنەستى, ءتۋريزمدى دامىتۋ تۇرعىسىندا وتە وزەكتى.
– اگروونەركاسىپ كەشەنىندە ءوزارا الىس-بەرىستى ارتتىرۋعا جانە بىرلەسكەن وندىرىستەردى اشۋعا سەپتىگىن تيگىزەتىن ماڭىزدى كەلىسىمدەر جاسالدى. ەكى ەلدىڭ ونەركاسىپ سالاسىنداعى مۇمكىندىكتەرى مول. مەن پاكىستان كومپانيالارىن ەلىمىزدە تاۋارلار وندىرۋگە باعىتتالعان كاسىپورىندار اشۋعا شاقىردىم. قازىرگى ۋاقىتتا ولار اۋىل شارۋاشىلىعى, فارماتسەۆتيكا جانە قۇرىلىس ماتەريالدارى ونىمدەرىن وندىرۋگە قىزىعۋشىلىق تانىتۋدا, – دەدى قاسىم-جومارت توقاەۆ.
پرەزيدەنت قورعانىس ونەركاسىبى اياسىندا ءوزارا ءتيىمدى ىنتىماقتاستىقتىڭ باعىتتارىن دامىتۋعا كەلىسكەنىن ايتتى.
– كەيىنگى جىلدارى قاۋىپسىزدىك ورگاندارى جانە قۇقىق قورعاۋ قۇرىلىمدارى اراسىنداعى ىقپالداستىق قارقىندى دامۋدا. كەلىسسوز كەزىندە جاساندى ينتەللەكتىنى جانە تسيفرلىق تەحنولوگيانى ەكونوميكاعا جاپپاي ەنگىزۋدىڭ ستراتەگيالىق ماڭىزى اتاپ ءوتىلدى. وسى سالادا بىرلەسىپ جۇمىس ىستەۋگە دايىن ەكەنىمىزدى راستادىق. پاكىستان –يسلامدىق قارجىلاندىرۋ سالاسىندا الەمنىڭ جەتەكشى ەلدەرىنىڭ ءبىرى. استانا حالىقارالىق قارجى ورتالىعىندا ەۋرازيالىق كەڭىستىكتە حالال قارجىنى دامىتۋ ءۇشىن بارلىق جاعداي جاسالعان. وسى مۇمكىندىكتەردى پاكىستاننىڭ قارجى ينستيتۋتتارى دا ءتيىمدى پايدالانا الادى. سونىمەن قاتار ينۆەستيتسيالىق ىنتىماقتاستىققا نازار اۋداردىق. بۇل باعىتتا بۇگىن «سامۇرىق-قازىنا» قورى جانە «Fauji Foundation» اراسىندا قۇرىلعان «بىرلەسكەن ينۆەستيتسيالىق پلاتفورماسى» ناقتى جوبالاردى زەردەلەيتىن بولادى. جالپى, پاكىستاندىق كاسىپكەرلەرگە ەلىمىزدە قولايلى جاعداي جاساۋعا دايىنبىز, – دەدى قاسىم-جومارت توقاەۆ.
مەملەكەت باسشىسى قازاقستان-پاكىستان بيزنەس-فورۋمىنا قاتىساتىندارىن, جيىندا ەكى ەلدىڭ 250-دەن اسا كومپانيا جەتەكشىلەرى باس قوسىپ, بىرقاتار كوممەرتسيالىق قۇجاتقا قول قويىلاتىنىن جەتكىزدى.
– بۇل ماڭىزدى ءىس-شارا ناتيجەلەرى ءوزارا ساۋدا-ەكونوميكالىق جانە ينۆەستيتسيالىق قاتىناستارعا تىڭ سەرپىن بەرەتىنىنە سەنەمىن. سونداي-اق ەكى ەلدىڭ مادەني-گۋمانيتارلىق ىنتىماقتاستىعىن دامىتۋ ماسەلەسىن تالقىلادىق. ەلىمىزدىڭ جوعارى وقۋ ورىندارىنىڭ تانىمالدىلىعى پاكىستان جاستارى اراسىندا جىلدان جىلعا ارتىپ كەلەدى. قازىر قازاقستاندا مىڭنان اسا پاكىستاندىق ستۋدەنت ءتۇرلى ماماندىقتار بويىنشا ءبىلىم الۋدا. وسى رەتتە عىلىم جانە ءبىلىم سالاسىنداعى بايلانىستى ودان ءارى دامىتۋعا ۋاعدالاستىق. يسلاماباد ۋنيۆەرسيتەتتەرىندە بۇگىن اشىلعان ء«ال-فارابي», «ساتباەۆ» جانە «ياساۋي» ورتالىقتارى ەكى ەلدىڭ عىلىم جانە وقۋ-اعارتۋ سالالارىنداعى ىقپالداستىعىن نىعايتاتىن بولادى, – دەدى مەملەكەت باسشىسى.
قاسىم-جومارت توقاەۆ دەنساۋلىق ساقتاۋ جانە سپورت باعىتتارى بويىنشا ءوزارا ءىس-قيمىلدى كۇشەيتۋ ماڭىزدى ەكەنىنە ءمان بەردى.
– بۇگىن ءبىز قازاقستان-پاكىستان «دوستىق» سپورت كەشەنىن سالتاناتتى تۇردە اشتىق. اتالعان سپورت ورتالىعىندا قازاق كۇرەسى, توعىزقۇمالاق سياقتى قازاقتىڭ ۇلتتىق سپورت تۇرلەرى وقىتىلادى. سونداي-اق شاحمات, بوكس, ارالاس جەكپە-جەك بويىنشا دارىستەر ۇيىمداستىرىلادى. تۇراقتى تۇردە مادەني جانە سپورتتىق ءىس-شارالار وتكىزۋ باعدارلاماسىن قابىلدادىق. بۇل قادام قوس حالىقتىڭ ءبىر-ءبىرىن جاقىنىراق تانۋىنا سەپتىگىن تيگىزەدى دەپ سەنەمىن, – دەدى پرەزيدەنت.
مەملەكەت باسشىسى پرەمەر-مينيسترمەن بىرگە بەيبىتشىلىك پەن قاۋىپسىزدىكتى نىعايتۋ ماقساتىندا كۇش جۇمىلدىرۋعا دەن قويا وتىرىپ, حالىقارالىق جانە ايماقتىق ماسەلەلەردى تالقىلاعانىن ايتتى.
– ءبىز الەمنىڭ ءار تۇكپىرىندە جالعاسىپ جاتقان قاقتىعىستارعا الاڭداۋشىلىق بىلدىرەمىز. كوپتەگەن وزەكتى تاقىرىپ بويىنشا ۇستانىمدارىمىز ۇقساس. كەز كەلگەن جانجالدى ديالوگ ارقىلى ديپلوماتيالىق جولمەن شەشۋ قاجەت دەپ سانايمىز. بىرىككەن ۇلتتار ۇيىمىنىڭ جارعىسى جانە حالىقارالىق قۇقىق نورمالارى قاتاڭ ساقتالۋعا جانە ءسوزسىز باسىمدىققا يە بولۋعا ءتيىس. قازىرگى گەوساياسي جاعدايدا كوپجاقتى ۇيىمدار اياسىندا ءوزارا قولداۋ كورسەتۋ جانە كونسۋلتاتسيالار وتكىزۋ اسا ماڭىزدى. پاكىستان قازاقستاننىڭ ازياداعى ءوزارا ىقپالداستىق جانە سەنىم شارالارى كەڭەسى اياسىنداعى باستامالارىن ۇنەمى قولداپ كەلەدى. ءبىز بۇعان ريزاشىلىعىمىزدى بىلدىرەمىز. سونىمەن قاتار الەمدە بەيبىتشىلىك پەن تۇراقتىلىقتى ورناتۋ جولىندا ناقتى قادامداردى تالقىلادىق. وسى ورايدا, بۇگىن بىرىككەن ۇلتتار ۇيىمىنىڭ بىتىمگەرشىلىك ميسسيالارىنا بىرلەسىپ قاتىسۋ جونىندەگى ۇكىمەتارالىق مەموراندۋمعا قول قويىلدى. بۇل قۇجات حالىقارالىق بىتىمگەرشىلىك قىزمەتى بويىنشا ارىپتەستىگىمىزدى ودان ءارى كەڭەيتۋگە جول اشادى, – دەدى پرەزيدەنت.
مەملەكەت باسشىسىنىڭ ايتۋىنشا, بۇگىنگى ساپار ەكى ەلدىڭ ىنتىماقتاستىعىن ودان ءارى نىعايتا تۇسەتىنى انىق.
– بۇگىن ورناتىلعان ستراتەگيالىق سەرىكتەستىگىمىز بەن قول جەتكىزگەن ۋاعدالاستىقتارىمىز ەكى ەلدىڭ يگىلىگى ءۇشىن قىزمەت ەتەتىنىنە كامىل سەنەمىن. باۋىرلاس حالىقتارىمىزدىڭ دوستىعى بەرىك, باياندى بولىپ, بولاشاققا جالعاسا بەرسىن. مەنىڭ باۋىرىم, قادىرلى پاكىستان پرەمەر-ءمينيسترى شاحباز شاريف مىرزانىڭ بيىل ەلىمىزگە مەملەكەتتىك ساپارمەن كەلۋىن اسىعا كۇتەمىن, – دەدى قاسىم-جومارت توقاەۆ.
شاحباز شاريف پاكىستان قازاقستاندى ورتالىق ازياداعى ماڭىزدى سەرىكتەستەرىنىڭ ءبىرى رەتىندە قاراستىراتىنىن مالىمدەدى.
– بۇگىنگى تابىستى كەلىسسوزدەر ناقتى ناتيجەلەرگە ۇلاسىپ, قول قويىلعان قۇجاتتار ەكىجاقتى بايلانىستاردى دامىتۋعا تىڭ سەرپىن بەرەتىنىنە سەنىمدىمىن. ەكى ەل اراسىنداعى سەرىكتەستىكتى نىعايتا وتىرىپ, ساۋدا, مادەنيەت, ءبىلىم بەرۋ جانە باسقا دا كوپتەگەن سالا بويىنشا ىنتىماقتاستىقتا جاڭا مۇمكىندىكتەرگە جول اشىلادى دەپ ەسەپتەيمىن. جوعارى مارتەبەلى پرەزيدەنت مىرزا, سىزگە پاكىستان مەن قازاقستان قارىم-قاتىناسىن ودان ءارى ارتتىرۋعا قولداۋ كورسەتكەنىڭىز ءۇشىن العىس ايتامىن, – دەدى پاكىستان پرەمەر-ءمينيسترى.
يسلامابادتا «دوستىق» سپورت كەشەنى اشىلدى
پرەزيدەنت قاسىم-جومارت توقاەۆتىڭ مەملەكەتتىك ساپارى اياسىندا يسلامابادتا ءال-فارابي, قانىش ساتباەۆ جانە قوجا احمەت ياساۋي اتىنداعى مادەني-ءبىلىم بەرۋ ورتالىقتارىنىڭ, سونداي-اق «دوستىق» سپورت كەشەنىنىڭ اشىلۋ سالتاناتى ءوتتى.
ءال-فارابي ورتالىعى ءال-فارابي اتىنداعى قازاق ۇلتتىق ۋنيۆەرسيتەتى مەن «كايد-ي-ازام» ۋنيۆەرسيتەتى (Quaid-i-Azam University) اراسىنداعى ىنتىماقتاستىق شەڭبەرىندە اشىلدى. عيمارات وقۋ-ادىستەمەلىك جانە عىلىمي ادەبيەتتەرمەن, سونىمەن بىرگە زاماناۋي كومپيۋتەرلىك قۇرال-جابدىقتارمەن, جيھازبەن قامتىلعان. ورتالىق بازاسىندا قازاق ءتىلى كۋرستارى ۇيىمداستىرىلماق.
قانىش ساتباەۆ ورتالىعى ق.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى (Satbayev University) مەن پاكىستان ۇلتتىق عىلىم جانە تەحنولوگيا ۋنيۆەرسيتەتى اراسىنداعى عىلىم, ءبىلىم, سونداي-اق تەحنولوگيا سالالارىنداعى ەكىجاقتى ىنتىماقتاستىقتى دامىتۋ جونىندەگى ۋاعدالاستىقتارعا سايكەس جۇمىس ىستەيتىن بولادى.
قوجا احمەت ياساۋي ورتالىعى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى مەن يسلاماباد حالىقارالىق يسلام ۋنيۆەرسيتەتىنىڭ كەلىسىمى بويىنشا اشىلدى.
«دوستىق» سپورت ورتالىعىندا توعىزقۇمالاق جانە قازاق كۇرەسى بويىنشا پاكىستاندىق فەدەراتسيالار قۇرۋ, قازاقستان شاحمات اكادەمياسىنىڭ, Qazaq batyry ارالاس جەكپە-جەگىنىڭ فيليالدارىن اشۋ, سونداي-اق ەكى ەلدىڭ گرەپپلينگ پەن بوكس فەدەراتسيالارى اراسىنداعى ىنتىماقتاستىقتى دامىتۋ كوزدەلىپ وتىر. قوس مەملەكەت پاكىستاندىق جاتتىقتىرۋشىلار مەن سپورتشىلاردى وقىتۋ ءۇشىن بىرلەسكەن وقۋ-جاتتىعۋ جيىندارىن قولعا الماق.
قازاقستان-پاكىستان بيزنەس فورۋمى ءوتتى
پرەزيدەنت قاسىم-جومارت توقاەۆ پەن پرەمەر-مينيستر شاحباز شاريف قازاقستان-پاكىستان بيزنەس فورۋمىنا قاتىستى.
مەملەكەت باسشىسى ءوز سوزىندە وسى ماڭىزدى ءىس-شارانى ۇيىمداستىرۋعا باستاماشى بولعانى ءۇشىن پرەمەر-مينيستر شاحباز شاريفكە العىس ايتتى.
– پاكىستانعا جاساعان العاشقى مەملەكەتتىك ساپارىم ەكىجاقتى ىنتىماقتاستىقتىڭ ايتۋلى تاريحي كەزەڭىنە اينالدى. ءبىز سەرىكتەستىگىمىزدى ستراتەگيالىق دەڭگەيگە كوتەرۋگە ارنالعان بىرلەسكەن دەكلاراتسياعا قول قويدىق. بۇگىنگى بيزنەس فورۋم بارىسىندا جالپى سوماسى 200 ميلليون دوللارعا جۋىق 30-دان اسا كەلىسىم جاسالدى. بۇل باۋىرلاس حالىقتارىمىزدىڭ ساۋدا-ەكونوميكالىق جانە ينۆەستيتسيالىق ىقپالداستىعىن ودان ءارى نىعايتۋعا تىڭ سەرپىن بەرەدى. شىن مانىندە, سەرىكتەستىگىمىز ۇدايى كەڭەيىپ كەلەدى. بىلتىر ەكى ەل اراسىنداعى تاۋار اينالىمى ەكى ەسەگە جۋىق ءوستى. قازاقستاندا پاكىستان كاپيتالىنىڭ ۇلەسى بار 200-دەن اسا كومپانيا قۇرىلىس, اۋىل شارۋاشىلىعى, تاعام ونەركاسىبى, يندۋستريا جانە باسقا دا كوپتەگەن سالادا جۇمىس ىستەيدى. وسى وڭ ۇردىسكە ارقا سۇيەي وتىرىپ, ەكىجاقتى ساۋدا كولەمىن 1 ميلليارد دوللارعا دەيىن ۇلعايتۋدى كوزدەيتىن ءورشىل ماقسات قويدىق, – دەدى قاسىم-جومارت توقاەۆ.
پرەزيدەنت ۇكىمەتكە ەكى ەلدىڭ بيزنەس قۇرىلىمدارى اراسىنداعى, سونىڭ ىشىندە قازاقستان مەن پاكىستان ۇكىمەتارالىق كوميسسياسى اياسىنداعى ىقپالداستىقتى جانداندىرۋدى تاپسىرعانىن جەتكىزدى.
– قازاقستان ورتالىق ازياداعى ەكونوميكاسى ءىرى ەل رەتىندە وڭىرلىك ءوسىمدى قامتاماسىز ەتۋگە جانە تىڭ مۇمكىندىكتەرگە جول اشۋعا ۇلكەن ۇلەس قوسىپ كەلەدى. بىلتىر ەكونوميكامىز 6,5 پايىزعا ارتىپ, ناتيجەسىندە ىشكى جالپى ءونىم كولەمى 300 ميلليارد دوللار مەجەسىنەن استى. ال جان باسىنا شاققاندا ىشكى جالپى ءونىم كولەمى 15 مىڭ دوللارعا جەتتى. بۇل ءبىزدىڭ نارىقتىڭ ورنىقتى ءارى ەكونوميكالىق الەۋەتى جوعارى ەكەنىن كورسەتەدى. ءبىز ينستيتۋتسيونالدىق قۇرىلىمداردى دايەكتى تۇردە جەتىلدىرۋ ارقىلى وركەندەپ كەلەمىز.
ەكونوميكالىق ستراتەگيامىز ساۋدا مەن ينۆەستيتسيانى ارتاراپتاندىرۋعا, يننوۆاتسيالاردى ىنتالاندىرۋعا جانە بىلىمگە نەگىزدەلگەن دامۋ مودەلىن ىلگەرىلەتۋگە باعىتتالعان. مەن جەتەكشىلىك ەتەتىن شەتەلدىك ينۆەستورلار كەڭەسى قازاقستانداعى اشىقتىق, ادىلدىك قاعيداتتارىنا جانە ىسكەرلىك كليماتتى ۇدايى جاقسارتۋعا بەيىل. ء«بىر تەرەزە» قاعيداتىمەن جۇمىس ىستەيتىن ۇلتتىق تسيفرلىق ينۆەستيتسيالىق پلاتفورما ينۆەستورلار مەن بيزنەسكە ارنالعان ۇدەرىستەردى ايتارلىقتاي جەڭىلدەتەدى, – دەدى مەملەكەت باسشىسى.
قاسىم-جومارت توقاەۆ استانا حالىقارالىق قارجى ورتالىعى ينۆەستيتسيا, يننوۆاتسيا جانە كورپوراتيۆتىك قىزمەت كورسەتۋ سالالارى بويىنشا وڭىردەگى جەتەكشى ورتالىق سانالاتىنىنا توقتالدى.
– بۇگىندە 100-گە جۋىق ەلدەن 5 مىڭنان استام كومپانيا وسى پلاتفورما اياسىندا تابىستى جۇمىس ىستەپ جاتىر. ەرەكشە اتاپ وتەتىن جايت, ەكوجۇيەگە پاكىستاننىڭ 11 كومپانياسى قوسىلعان. قاتىسۋشىلار قاتارى الداعى ۋاقىتتا دا كوبەيەدى دەپ سەنەمىز. قازاقستان, سونداي-اق ءوڭىر نارىعىنا شىققىسى كەلەتىن پاكىستاندىق كاسىپكەرلەرگە سەنىمدى ءارى اشىق مۇمكىندىكتەر ۇسىنامىز. تۇراقتى ينۆەستيتسيالىق قۇرىلىمدى ۇدايى جەتىلدىرىپ وتىرامىز, – دەدى پرەزيدەنت.
مەملەكەت باسشىسىنىڭ پىكىرىنشە, قازاقستان مەن پاكىستاننىڭ گەوگرافيالىق ورنالاسۋى ستراتەگيالىق تۇرعىدان ماڭىزدى. ەكى ەل دە وڭىرلىك جانە جاھاندىق بايلانىستىڭ باستى بۋىنى بولا الادى.
– ەۋرازيا جۇرەگىندە ورنالاسقان قازاقستان قۇرلىق ارقىلى ساۋدا-ساتتىقتا ەلەۋلى ءرول اتقارادى. ەۋروپا مەن قىتاي اراسىندا قۇرلىق جولدارىمەن تاسىمالداناتىن جۇكتىڭ 85 پايىزى ءبىز ارقىلى وتەدى. قازىرگى ۋاقىتتا ترانسكاسپي حالىقارالىق كولىك باعدارىن نەمەسە ورتا ءدالىزدى دامىتۋ ەلىمىزدى ترانسكونتينەنتالدىق ساۋدانىڭ ءىرى ورتالىعىنا اينالدىراتىن نەگىزگى فاكتور رەتىندە قاراستىرامىز. سونداي-اق ترانزيت اعىنىن اناعۇرلىم ءتيىمدى ۇيلەستىرۋدى كوزدەيتىن «Smart Cargo» بىرىڭعاي تسيفرلىق باسقارۋ پلاتفورماسىن ازىرلەدىك. بۇل رەتتە «قازاقستان تەمىر جولى» ۇلتتىق وپەراتورى, «قازپوشتا» اكتسيونەرلىك قوعامى مەن پاكىستاننىڭ ۇلتتىق لوگيستيكا كورپوراتسياسى جانە «Pakistan Post» كومپانياسى اراسىندا كەلىسىمگە قول قويىلۋىن قۇپتايمىن. ولاردان مۋلتيمودالدى كولىك شەشىمدەرىن ىلگەرىلەتۋگە جانە ەلدەرىمىزدىڭ پورت ينفراقۇرىلىمىن بىرلەسە پايدالانۋعا جول اشاتىن ناقتى قادامدار كۇتەمىز, – دەدى قاسىم-جومارت توقاەۆ.
پرەزيدەنت قازاقستان مەن پاكىستان ازىق-ت ۇلىك قاۋىپسىزدىگى جونىندەگى يسلام ۇيىمىنا مۇشە ەلدەر رەتىندە مۇسىلمان مەملەكەتتەرىنە ارنالعان ورنىقتى ءارى ءادىل ازىق-ت ۇلىك جۇيەسىن قۇرۋ جولىندا ورتاق ماقساتقا جۇمىلاتىنىن اتاپ ءوتتى.
– الەمنىڭ 70-تەن اسا ەلىنە اۋىل شارۋاشىلىعى ونىمدەرىنىڭ 200-دەن استام ءتۇرىن ەكسپورتتايمىز. كەيىنگى ون جىلدا اۋىل شارۋاشىلىعى ءوندىرىسىنىڭ جالپى ىشكى كولەمى 2,5 ەسەدەن اسا كوبەيدى. 2030 جىلعا قاراي بۇل كورسەتكىشتى ەكى ەسە ارتتىرۋعا نيەتتىمىز. جوعارى ساپالى جانە ەكولوگيالىق تازا اۋىل شارۋاشىلىعى ءونىمىن شىعاراتىن سەنىمدى جەتكىزۋشى رەتىندەگى پوزيتسيامىزدى نىعايتىپ كەلەمىز. سول سەبەپتى سەرىكتەستىك بايلانىستاردى كەڭەيتىپ, وڭىرلىك ءارى جاھاندىق دەڭگەيدە جاڭا جەتكىزۋ تىزبەگىن قۇرۋ ءۇشىن جۇيەلى قادامدار جاسايمىز. وسى ورايدا پاكىستاندىق ارىپتەستەرىمىزدىڭ اتالعان سەكتورداعى تاجىريبەسىن ءبولىسىپ, كاپيتال قۇيماق نيەتىن قۇپتايمىز. جەتىسۋ وبلىسىندا قانت قىزىلشاسىن وڭدەۋ زاۋىتىن ىسكە قوسۋ تۋرالى «Almoiz Group» كومپانياسىمەن جاسالعان كەلىسىم – وسى ىنتىماقتاستىقتىڭ ماڭىزدى باستاماسى, – دەدى مەملەكەت باسشىسى.
قاسىم-جومارت توقاەۆ تسيفرلاندىرۋ ەلدەرىمىز اراسىنداعى ساۋدا جانە ينۆەستيتسيالىق ىنتىماقتاستىق سالالارى بويىنشا پروگرەستىڭ نەگىزگى فاكتورىنا اينالادى دەپ پايىمدايدى. پرەزيدەنت پاكىستان ۇكىمەتىنىڭ وزىق تسيفرلىق شەشىمدەر ەنگىزۋ جونىندەگى شارالارىنا جوعارى باعا بەردى.
– پرەمەر-مينيستر شاحباز شاريف پاكىستان ەكونوميكاسىن بولاشاقتا باسەكەگە قابىلەتتى ەتۋ ءۇشىن تسيفرلىق ترانسفورماتسيانىڭ ماڭىزدى ءرول اتقاراتىنىن ۇدايى ايتىپ كەلەدى. قازاقستان بۇل كورەگەن ۇستانىمدى قۇپتايدى ءارى ەكى ەل ءۇشىن دە تسيفرلىق يننوۆاتسيالاردىڭ الەۋەتى زور دەپ بىلەدى. ءبىز الداعى بىرنەشە جىلدا تولىق تسيفرلىق ەلگە اينالۋ جونىندە ءورشىل ماقسات قويدىق. وعان قول جەتكىزۋ ءۇشىن وڭىردەگى العاشقى جاساندى ينتەللەكت جانە تسيفرلىق دامۋ مينيسترلىگىن قۇردىق. يننوۆاتسيانىڭ, زەرتتەۋ مەن تەحنولوگيالىق پروگرەستىڭ جەتەكشى پلاتفورماسى رەتىندە قىزمەت ەتەتىن حالىقارالىق جاساندى ينتەللەكت ورتالىعىن اشتىق. «Alatau City» كەشەندى قۇقىقتىق, تسيفرلىق جانە قارجىلىق ەكوجۇيە قالىپتاستىرادى. بۇل ەلىمىزدەگى قالالاردى دامىتۋدا ماڭدايالدى جوبا بولماق. سونىمەن قاتار ەكونوميكانىڭ يننوۆاتسيالىق جانە پەرسپەكتيۆتى سەكتورلارىندا ورنىقتى دامىتۋدى ىنتالاندىرىپ, قارجى تارتادى. بىلتىر ەكى سۋپەركومپيۋتەردى ىسكە قوستىق. بۇل اۋقىمدى دەربەس تىلدىك مودەلدەردى ازىرلەۋ جانە قازاقستانداعى تەحنولوگيالىق پروگرەستى جەدەلدەتۋ ىسىندە ماڭىزدى قادامعا اينالدى. ءبىزدىڭ كۇش-جىگەرىمىز ۇلتتىق, ءتىپتى جاھاندىق دەڭگەيدەگى ءىرى IT كومپانيالاردىڭ قۇرىلۋىنا ىقپال ەتتى. مىسالى, قازاقستاندىق InDrive پلاتفورماسى پاكىستاندا كەڭىنەن پايدالانىلادى. بىلتىرعى كورسەتكىش بويىنشا, قوسىمشا پاكىستانداعى تاكسي نارىعىنىڭ 60 پايىزدان استامىن يەلەنگەن. وسىلايشا, قالا ىشىندەگى قوزعالىستا ءبىرىنشى ورىنعا شىققان. پاكىستاندىق سەرىكتەستەردى IT جانە ينۆەستيتسيا سالالارىنداعى مۇمكىندىكتەرىمىزدى پايدالانۋعا شاقىرامىن, – دەدى پرەزيدەنت.
قاسىم-جومارت توقاەۆ ەكى ەل اراسىنداعى سەرىكتەستىك جاڭا كەزەڭگە قادام باسقانىن جانە ەكونوميكادا ەكىجاقتى كۇن ءتارتىبىنىڭ بارلىق سالاسىن قامتيتىن بايلانىستى تەرەڭدەتۋگە مول مۇمكىندىك بار ەكەنىن اتاپ ءوتتى.
پاكىستان پرەمەر-ءمينيسترى ەكى ەلدىڭ ساۋدا-ەكونوميكالىق جانە ينۆەستيتسيالىق ىقپالداستىعىن تەرەڭدەتۋ تۇرعىسىنان بۇگىنگى بيزنەس فورۋمنىڭ ماڭىزدىلىعىنا نازار اۋداردى.
– بۇگىن ءبىز تاۋار اينالىمىن الداعى ەكى جىلدا 1 ميلليارد دوللارعا جەتكىزۋ ءۇشىن بارىنشا ارەكەت ەتۋگە ۋاعدالاستىق. وسى ماقساتقا تەزىرەك جەتۋ جولىندا قولدا بار مۇمكىندىكتىڭ ءبارىن پايدالانۋعا كەلىستىك. بيىل دوستاس قازاقستانعا ساپارمەن كەلۋگە شاقىرعانى ءۇشىن قادىرلى باۋىرىما ريزاشىلىعىمدى بىلدىرەمىن. بۇل شاقىرۋدى زور قۋانىشپەن جانە ەرەكشە ىقىلاسپەن قابىل الدىم. ءبىز ءوزارا جۇمىس توبىن قۇرۋ جونىندە شەشىم قابىلدادىق. بۇل توپقا ورتاق ساۋدا جانە ينۆەستيتسيالىق پورتفەلدى كەڭەيتۋ جونىندە بەسجىلدىق باعدارلامانى ازىرلەۋ تاپسىرىلادى, – دەدى شاحباز شاريف.
قازاقستان-پاكىستان بيزنەس فورۋمىنىڭ قورىتىندىسى بويىنشا جالپى سوماسى 200 ميلليون دوللارعا جۋىق 30-دان استام كوممەرتسيالىق قۇجاتقا قول قويىلدى. كەلىسىمدەردە ەكى ەلدىڭ قارجى, لوگيستيكا, ونەركاسىپ, ەنەرگەتيكا, اگروونەركاسىپ كەشەنى, تسيفرلاندىرۋ جانە ينفراقۇرىلىم سالالارىنداعى ىنتىماقتاستىعىن كەڭەيتۋ كوزدەلگەن.
ارىپتەستىكتىڭ جاڭا باعىتتارى ايقىندالدى
مەملەكەت باسشىسى پاكىستان پرەزيدەنتى اسيف الي زارداريمەن كەلىسسوز جۇرگىزدى.
قاسىم-جومارت توقاەۆ يسلاماباد قالاسىندا وزىنە جانە قازاقستان دەلەگاتسياسىنا قوناقجايلىلىق كورسەتكەنى ءۇشىن اسيف الي زارداريگە العىس ايتىپ, ساپاردىڭ جوعارى دەڭگەيدە ۇيىمداستىرىلعانىن اتاپ ءوتتى.
پرەزيدەنت وتىز جىلدان استام ۋاقىت ىشىندە قازاقستان مەن پاكىستان مازمۇندى ساياسي ديالوگ ءوربىتىپ, ءتۇرلى سالادا ەكىجاقتى ىنتىماقتاستىقتى دايەكتى تۇردە نىعايتىپ كەلە جاتقانىنا توقتالدى.
قاسىم-جومارت توقاەۆتىڭ پىكىرىنشە, قازاقستان – جەر اۋماعى مەن ەكونوميكالىق الەۋەتى تۇرعىسىنان ورتالىق ازياداعى ەڭ ءىرى ەل. ال پاكىستان وڭتۇستىك ازيا, ورتالىق ازيا, سونداي-اق تاياۋ شىعىس تۇيىسكەن تۇستا ءتيىمدى ورنالاسقان. بۇل – ۇزاقمەرزىمدى ستراتەگيالىق ماقساتتارعا قول جەتكىزۋگە ىقپال ەتەتىن ماڭىزدى گەوساياسي ارتىقشىلىق.
مەملەكەت باسشىسى پرەمەر-مينيستر شاحباز شاريفپەن جۇرگىزگەن كەلىسسوزدەر ناتيجەسىندە استانا مەن يسلاماباد اراسىنداعى قارىم-قاتىناستى جاڭا ستراتەگيالىق دەڭگەيگە كوتەرۋ جونىندەگى بىرلەسكەن دەكلاراتسياعا قول قويىلعانىن اتاپ ءوتتى. بۇل قادام باۋىرلاستىق بايلانىستاردى تولىق ايقىنداپ, ەكى ەلدىڭ بارلىق باعىت بويىنشا ىقپالداستىقتى ۇدايى كەڭەيتۋگە بەيىل ەكەنىن بايقاتادى.
اسيف الي زارداري ەكى ەل اراسىنداعى ىنتىماقتاستىقتىڭ دامۋ دەڭگەيىن جوعارى باعالاپ, پاكىستان تاراپىنىڭ ءوزارا ءتيىمدى ىقپالداستىقتى ودان ءارى نىعايتۋعا نيەتتى ەكەنىن راستادى.
تاراپتار ەكىجاقتى كۇن ءتارتىبىنىڭ وزەكتى ماسەلەلەرى جونىندە پىكىر الماسىپ, ۇزاقمەرزىمدى قارىم-قاتىناستى كەڭەيتۋدىڭ جاڭا باعىتتارىن بەلگىلەدى.
قاسىم-جومارت توقاەۆ ساپار قورىتىندىسى قوس حالىقتىڭ وركەندەۋى جولىندا قازاقستان مەن پاكىستان اراسىنداعى سەرىكتەستىككە تىڭ سەرپىن بەرەتىنىنە سەنىم ءبىلدىردى.
Nishan-e-Pakistan وردەنىمەن ماراپاتتالدى
يسلامابادتا وتكەن سالتاناتتى ءىس-شارادا پاكىستان پرەزيدەنتى اسيف الي زارداري مەن پرەمەر-ءمينيسترى شاحباز شاريف مەملەكەت باسشىسىن پاكىستاننىڭ ەڭ جوعارى مەملەكەتتىك ناگراداسى – Nishan-e-Pakistan وردەنىمەن ماراپاتتادى.
ناگرادا ەل دامۋىنا ەرەكشە ۇلەس قوسقان پاكىستان ازاماتتارىنا جانە شەتەلدىك مەملەكەت, ساياسات, سونداي-اق قوعام قايراتكەرلەرىنە بەرىلەدى.
جيىنعا پاكىستاننىڭ ۇكىمەت مۇشەلەرى, پارلامەنت دەپۋتاتتارى, قارۋلى كۇشتەرىنىڭ جوعارى باسشىلىق قۇرامى جانە ديپلوماتيالىق كورپۋس وكىلدەرى قاتىستى.
