ەندى ەگەر اتقارىلاتىن جۇمىستا ەڭبەك قاتىناستارىنا ءتان كەمىندە ءبىر بەلگى بولسا, جەكە تۇلعامەن ازاماتتىق-قۇقىقتىق شارت جاساسۋعا تىيىم سالىنادى. بۇل نورما قىزمەتكەردى الەۋمەتتىك كەپىلدىكتەردەن ايىرۋ تاجىريبەسىنە توسقاۋىل قويۋدى كوزدەيدى.
قابىلدانعان تۇزەتۋلەرگە سايكەس, ۇجىمدىق شارتتاردا جالاقىنىڭ ەڭ تومەنگى جانە ەڭ جوعارى مولشەرىنە قويىلاتىن تالاپتار مىندەتتى تۇردە كورسەتىلەدى. سونداي-اق جاردەماقىلار مەن وتەماقىلاردىڭ بارلىق ءتۇرى, ونىڭ ىشىندە وندىرىستەگى جازاتايىم وقيعالارعا بايلانىستى تولەمدەر دە ناقتى جازىلۋعا ءتيىس.
وندىرىستىك جاراقاتتىڭ اۋىرلىق دەڭگەيىن ايقىنداۋ ءتارتىبى ەندى دەنساۋلىق ساقتاۋ ورگانى ارقىلى بەكىتىلەدى. بۇل شەشىم ەڭبەك داۋلارى كەزىندە مەديتسينالىق قورىتىندىلاردىڭ ءبىرىزدى ءارى وبەكتيۆتى بولۋىن قامتاماسىز ەتۋگە باعىتتالعان.
سونىمەن قاتار كەلىسۋ كوميسسياسىنىڭ جۇمىسىنا دەلدال تارتۋ ءتارتىبى ناقتىلانىپ, ەڭبەك داۋلارىن رەتتەۋ تەتىكتەرى ايقىندالدى. ال ەڭبەك قاۋىپسىزدىگى جونىندەگى ماماننىڭ تىكەلەي ۇيىم باسشىسىنا باعىنۋى تۋرالى نورما ەنگىزىلىپ, جۇمىس بەرۋشىنىڭ جاۋاپكەرشىلىگى كۇشەيتىلدى.
جالپى العاندا, قابىلدانعان تۇزەتۋلەر ەڭبەك قاتىناستارىن زاڭ اياسىندا راسىمدەۋدى تالاپ ەتىپ, جۇمىس بەرۋشى مەن قىزمەتكەر اراسىنداعى جاۋاپكەرشىلىك تەڭگەرىمىن نىعايتۋعا باعىتتالعان.
