ءىسساپار بارىسىندا مۇحتار ەرمان ەقىۇ دياقب ديرەكتورى ماريا تەلاليانمەن كەزدەستى. وسك وكىلى قازاقستان پرەزيدەنتى قاسىم-جومارت توقاەۆتىڭ باستاماسىمەن جۇزەگە اسىپ جاتقان كونستيتۋتسيالىق رەفورمانىڭ نەگىزگى باعىتتارىن باياندادى. سۇحبات بارىسىندا مىناداي ماڭىزدى وزگەرىستەرگە ەرەكشە نازار اۋدارىلدى:
-
ءبىر پالاتالى قۇرىلتايدىڭ قۇرىلۋى, ونىڭ دەپۋتاتتارىنىڭ پارتيالىق تىزىمدەر بويىنشا سايلانۋى;
-
ۆيتسە-پرەزيدەنت لاۋازىمىنىڭ ەنگىزىلۋى;
-
زاڭ شىعارۋ باستاماسىنا يە حالىق كەڭەسىنىڭ قۇرىلۋى.
ماريا تەلاليان ۇسىنىلعان اقپاراتقا جوعارى باعا بەرىپ, ەقىۇ دياقب الداعى جالپىۇلتتىق رەفەرەندۋمعا بايقاۋشىلار ميسسياسىن جىبەرۋ ماسەلەسىن تالقىلاۋعا دايىن ەكەنىن مالىمدەدى.
كەزدەسۋ سوڭىندا ماريا تەلاليانعا قر ورتالىق سايلاۋ كوميسسياسىنىڭ باستاماسىمەن سايلاۋ تاقىرىبىندا جارىق كورگەن كىتاپتىڭ اعىلشىن تىلىندەگى نۇسقاسى سىيعا تارتىلدى.
مۇحتار ەرمان پولشانىڭ ۇلتتىق سايلاۋ بيۋروسىنىڭ باسشىسى پافال تكاچپەن دە كەزدەسۋ وتكىزدى. تاراپتار سايلاۋ جۇيەسىن تسيفرلاندىرۋ, كيبەرقاۋىپسىزدىكتى قامتاماسىز ەتۋ جانە سايلاۋشىلاردىڭ جەكە دەرەكتەرىن قورعاۋ ماسەلەلەرىن تالقىلادى.
پولشالىق ارىپتەستەر قازىرگى تاڭدا ءوز ەلىندە داۋىستاردى قولمەن ەسەپتەۋ ءادىسى ساقتالعانىن ايتىپ, جالعان اقپاراتپەن (فەيك) كۇرەسۋدىڭ ماڭىزدىلىعىنا توقتالدى. كەزدەسۋ سوڭىندا مۇحتار ەرمان پولشالىق ارىپتەستەرىن قازاقستاندا وتەتىن رەفەرەندۋمدى باقىلاۋعا الدىن الا شاقىردى.
