سينگاپۋردىڭ ەكونوميكالىق سەرپىلىسىندە لي كۋان يۋ ۇستانعان قاعيدا ەرەكشە ورىن الادى. ول الەۋمەتتىك كومەكتى شەكسىز ۇلعايتۋ ازاماتتى ءپاسسيۆتى تۇتىنۋشىعا اينالدىراتىنىن ايتىپ, جەكە جاۋاپكەرشىلىككە سۇيەنگەن جۇيەنى تاڭدادى.
«سينگاپۋردىڭ ەكونوميكالىق تابىسىنىڭ نەگىزىندە جاتقان لي كۋان يۋ فيلوسوفياسى باتىستاعى الەۋمەتتىك قامسىزداندىرۋ مودەلىن اشىق تۇردە جوققا شىعاردى», دەيدى ەرلان كارىموۆ.
وسى ۇستانىم نەگىزىندە سينگاپۋردا ورتالىق جيناق قورى قۇرىلىپ, ءاربىر جۇمىس ىستەيتىن ادام ءوز كاپيتالىنىڭ يەسىنە اينالدى. جۇيە تۇرعىن ءۇي مەن بىلىمگە ارنالعان, زەينەتاقى جيناقتارى جانە مەديتسينالىق ساقتاندىرۋعا باعىتتالعان ءۇش جەكە شوتتان تۇرادى. ناتيجەسىندە تابيعي رەسۋرسى شەكتەۋلى ەلدە حالىقتىڭ 80 پايىزدان استامى باسپانالى بولىپ, مەملەكەتتىك شىعىندار ەڭ تومەن دەڭگەيدە ساقتالدى.
پرەزيدەنت: الەۋمەتتىك سالادا قالىپتاسقان قارجىلىق جاعدايدى رەتكە كەلتىرۋ كەرەك
قازاقستاندا الەۋمەتتىك سالاعا بولىنەتىن قارجى كولەمى از ەمەس. مەملەكەتتىك بيۋدجەتتىڭ شامامەن 60 پايىزى وسى باعىتقا جۇمسالادى. الەۋمەتتىك قورعاۋ شىعىندارى جالپى ىشكى ءونىمنىڭ 5 پايىزىنا جەتىپ, جىلىنا شامامەن 15 ملرد دوللاردى قۇرايدى. الايدا قارجىنىڭ ناقتى قايدا جانە قالاي جۇمسالىپ جاتقانى كوپ جاعدايدا تۇسىنىكسىز.
اسىرەسە دەنساۋلىق ساقتاۋ سالاسىنداعى قارجىلاندىرۋ قوعامدا ساۋال تۋدىرىپ وتىر. رەسپۋبليكالىق بيۋدجەت دەرەگىنە سايكەس, 2026 جىلى بۇل سالاعا 5,25 ملرد دوللار, 2027 جىلى 5,26 ملرد دوللار قاراستىرىلعان. وسى ەكى جىلدا 9,1 ملرد دوللاردان استام قاراجات الەۋمەتتىك مەديتسينالىق ساقتاندىرۋ قورىنا ماقساتتى جارنا رەتىندە اۋدارىلادى.
ۇكىمەتتە سولتۇستىك قازاقستان وبلىسىنىڭ الەۋمەتتىك سالاسىن دامىتۋ ماسەلەلەرى قارالدى
قازىرگى مودەلدە ازاماتتاردىڭ جارنالارى جەكە ەسەپشوتتاردا جينالماي, ورتاق اعىنعا ءسىڭىپ كەتەدى. ساراپشىلار مۇنداي جۇيە باقىلاۋدىڭ السىرەۋىنە, جالعان ەسەپ پەن قاعاز جۇزىندەگى قىزمەتتەردىڭ كوبەيۋىنە قولايلى ورتا قالىپتاستىراتىنىن ايتادى.
«ەگەر وراسان قارجى ناقتى ءبىر ادامنىڭ نەمەسە جەكە ەسەپشوتتىڭ اقشاسى رەتىندە سەزىلمەي, «ورتاق», «يەcىز» رەسۋرس كۇيىندە قالسا, ونى قاي مينيسترلىك نە قور باسقارسا دا, سول اقشاعا كوز تىگۋ, ونى ماقساتسىز جۇمساۋ قاۋپى ساقتالادى. ياعني ماسەلە باسقارۋشىدا ەمەس, اقشانىڭ ناقتى يەسى مەن ايقىن جاۋاپكەرشىلىكتىڭ جوقتىعىندا», دەيدى ەرلان كارىموۆ.
وسى تۇرعىدا ەكونوميست بىرىڭعاي الەۋمەتتىك كاپيتال قۇرۋدى ۇسىنادى. ونىڭ ءمانى – زەينەتاقى قورى, مەديتسينالىق ساقتاندىرۋ قورى جانە تۇرعىن ءۇي جۇيەسىن سينگاپۋر ۇلگىسىندەگى جەكە ەسەپشوتتار نەگىزىندە بىرىكتىرۋ. مۇنداي ءتاسىل ازاماتقا ءوز قارجىسىن باقىلاۋعا, پايدالانىلماعان قاراجاتتىڭ جوعالماۋىنا جانە مۇراگەرلىككە قالۋىنا مۇمكىندىك بەرەدى. سونىمەن قاتار رەسمي ەڭبەككە ىنتا ارتىپ, كولەڭكەلى ەكونوميكانىڭ ۇلەسى قىسقارادى.
ساراپشىنىڭ پايىمىنشا, جەكە جاۋاپكەرشىلىككە نەگىزدەلگەن مودەلگە كوشۋ الەۋمەتتىك سالانى بيۋدجەتكە سالماق سالاتىن باعىتتان ۇلتتىق ءال-اۋقاتتىڭ ناقتى تىرەگىنە اينالدىرا الادى. بۇل – قارجىنى كوبەيتۋ ەمەس, ونى ءادىل ءارى اشىق باسقارۋعا بەت بۇرۋ.
