سەنات توراعاسى ماۋلەن اشىمباەۆ مودەراتورلىق ەتكەن پودكاستقا عىلىم جانە جوعارى ءبىلىم ءمينيسترى ساياسات نۇربەك, Narxoz Business School دەكانى گۇلنار كۇرەڭكەەۆا جانە Nazarbayev University پروفەسسورى دوربەتحان سۇراعان قاتىستى.
اتا زاڭعا ستراتەگيالىق باعدار: عىلىمي ەركىندىك كونستيتۋتسيا دەڭگەيىندە بەكىتىلۋى مۇمكىن
ماۋلەن اشىمباەۆ مەملەكەت باسشىسى عىلىم جانە جوعارى ءبىلىم سالاسىن دامىتۋ مەملەكەتتىڭ ماڭىزدى ستراتەگيالىق باسىمدىقتارىنىڭ ءبىرى رەتىندە ايقىنداپ بەرگەنىن اتاپ ءوتتى. ونىڭ ايتۋىنشا, پرەزيدەنت باستامالارى جۇيەلى رەفورمالار ارقىلى عىلىمنىڭ ساپاسىن ارتتىرۋعا, ۋنيۆەرسيتەتتەردىڭ الەۋەتىن كۇشەيتۋگە جانە عىلىمي ناتيجەلەردى ناقتى ەكونوميكالىق وسىمگە باعىتتاۋعا نەگىزدەلگەن.
«مەملەكەت باسشىسى قاسىم-جومارت توقاەۆتىڭ تاپسىرماسىمەن كەيىنگى جىلداردا عىلىم جانە جوعارى ءبىلىم سالاسىندا جۇيەلى جۇمىس اتقارىلىپ جاتىر. پرەزيدەنت جانىنان عىلىم جانە تەحنولوگيالار جونىندەگى ۇلتتىق كەڭەس قۇرىلدى. ۇلتتىق عىلىم اكادەمياسىنىڭ مارتەبەسى كۇشەيتىلدى. عىلىم تۋرالى زاڭناماعا اۋقىمدى وزگەرىستەر ەنگىزىلىپ, «عىلىم جانە تەحنولوگيالىق ساياسات تۋرالى» جاڭا زاڭ قابىلداندى. عالىمداردى قوسىمشا قولداۋ تەتىكتەرى قالىپتاسىپ, سالانى قارجىلاندىرۋ كولەمى دە ەداۋىر ارتتى. وسىنداي ناقتى قادامدار ەل عىلىمى مەن جوعارى ءبىلىمىنىڭ باسەكەگە قابىلەتتىلىگىن ارتتىرۋعا وڭ سەپتىگىن تيگىزەدى دەپ سەنەمىز», دەدى م.اشىمباەۆ.
سونىمەن قاتار قاتىسۋشىلار بولىنگەن قاراجاتتىڭ ءتيىمدى جۇمسالۋى, عىلىم ناتيجەلەرىن كوممەرتسيالاندىرۋ, قولدانبالى زەرتتەۋلەردى كۇشەيتۋ اسا ماڭىزدى ەكەنىن اتاپ ءوتتى. پودكاستتا جاساندى ينتەللەكتىنىڭ عىلىم جانە جوعارى ءبىلىم جۇيەسىنە ىقپالى, ونى زەرتتەۋ مەن وقىتۋ پروتسەسىنە ەنگىزۋ, ۋنيۆەرسيتەتتەردى يننوۆاتسيالىق ورتالىقتارعا اينالدىرۋ ماسەلەلەرى دە تالقىلاندى. م.اشىمباەۆ بۇل باعىتتا ادام كاپيتالى ايرىقشا ماڭىزعا يە ەكەنىن ايتتى.
ء«بىز تەحنولوگيالىق سەرپىلىس داۋىرىندە ءومىر ءسۇرىپ جاتىرمىز. جاساندى ينتەللەكت پەن جاڭا تەحنولوگيالاردى ءتيىمدى پايدالانۋ ءۇشىن, ەڭ الدىمەن, جۇيەلى جانە سىني ويلاي الاتىن كۇشتى كادرلار دايىنداۋىمىز قاجەت. عىلىم تەك اكادەميالىق ورتاعا عانا ەمەس, ەكونوميكانىڭ ناقتى سەكتورلارىن دامىتۋعا دا ىقپال ەتۋى كەرەك. مەملەكەت باسشىسى اتاپ وتكەندەي, عىلىمي الەۋەت ەل دامۋىنا قىزمەت ەتەتىن ناقتى ناتيجەگە باعىتتالۋعا ءتيىس», دەدى سەنات توراعاسى.
بۇدان باسقا, قاتىسۋشىلار جوعارى ءبىلىم جۇيەسىن ودان ءارى جاڭعىرتۋ, ۋنيۆەرسيتەتتەردىڭ اكادەميالىق ەركىندىگىن ارتتىرۋ, عىلىم مەن بيزنەس اراسىنداعى بايلانىستى نىعايتۋ جانە حالىقارالىق تاجىريبەگە ءمان بەرۋ باعىتىنداعى باسىمدىقتارعا توقتالدى.
ايتا كەتەيىك, Taldau Talks – اشىق ديالوگقا ارنالعان پودكاست-پلاتفورما. وندا ەل دامۋىنىڭ وزەكتى ماسەلەلەرى مەن مەملەكەت باسشىسى جۇكتەگەن مىندەتتەردى ىسكە اسىرۋ تەتىكتەرى تالقىلانادى.
پودكاستتىڭ تولىق نۇسقاسىن Taldau Talks-تىڭ رەسمي YouTube-ارناسىنان كورۋگە بولادى.
