اتالعان ءىس-شاراعا وبلىس اكىمى بەرىك ءۋالي جانە قۇقىق قورعاۋ ورگاندارىنىڭ جەتەكشىلەرى مەن سالا ارداگەرلەرى قاتىستى.
اباي وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ ۇيىمداستىرۋىمەن وتكەن سالتاناتتى جيىندا قۇتتىقتاۋ ءسوز سويلەگەن ايماق باسشىسى سالا ماماندارىنىڭ اتقارعان ەڭبەگىنە جوعارى باعا بەرىپ, قۇقىقتىق ءتارتىپ پەن ەكونوميكالىق قاۋىپسىزدىكتى قامتاماسىز ەتۋ جولىنداعى تابىستى جۇمىستارى ءۇشىن العىس ءبىلدىردى.
«مەملەكەت باسشىسى قاسىم-جومارت توقاەۆ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى قازاقستان حالقىنا جولداۋىندا «ەلىمىزدىڭ ساياسي جۇيەسى اناعۇرلىم وزىق ءارى اشىق بولا ءتۇستى. ازاماتتارىمىزدىڭ سانا-سەزىمى, بولمىسى وزگەرىپ جاتىر. سونىڭ ارقاسىندا حالقىمىزدىڭ مەملەكەتتىك ينستيتۋتتارعا, زاڭعا جانە ادىلدىك پەن تارتىپكە دەگەن سەنىمى نىعايۋدا» دەگەن بولاتىن. سوندىقتان اباي وبلىسى بويىنشا ەكونوميكالىق تەرگەپ-تەكسەرۋ دەپارتامەنتتىڭ قۇرىلۋى جاي عانا اكىمشىلىك شەشىم ەمەس, جاڭا وڭىردە ورنىقتى ەكونوميكالىق قاۋىپسىزدىك جۇيەسىن قالىپتاستىرۋ جولىنداعى ماڭىزدى قادام بولعانى ءسوزسىز. قوعامنىڭ قۇقىق قورعاۋ ورگاندارىنا قوياتىن تالابى كۇننەن-كۇنگە ارتىپ كەلەدى. سىزدەر جەرگىلىكتى اتقارۋشى ورگاندارمەن بىرلەسە وتىرىپ, قىلمىستىڭ الدىن الۋ, قوعامدىق ءتارتىپتى ساقتاۋ, ازاماتتاردىڭ قۇقىقتارى مەن قاۋىپسىزدىگىن قورعاۋ باعىتىندا ناقتى ناتيجەلەرگە قول جەتكىزەسىزدەر دەپ ۇمىتتەنەمىن. باستى ماقساتىمىز – تۇرعىندارىمىزدىڭ تىنىشتىعى مەن ءومىر ساپاسىن قامتاماسىز ەتۋ. وسى سالادا جۇمىس ىستەپ جاتقان بارشا ازاماتتاردى بەس جىلدىق بەلەسپەن شىن جۇرەكتەن قۇتىقتايمىن», دەدى وبلىس اكىمى.
2022 جىلى اباي وبلىسىنىڭ قۇرىلۋىنا بايلانىستى قازاقستان رەسپۋبليكاسىنىڭ قارجىلىق مونيتورينگ اگەنتتىگىنىڭ اۋماقتىق بولىمشەسى رەتىندە اباي وبلىسى بويىنشا ەكونوميكالىق تەرگەپ -تەكسەرۋ دەپارتامەنتى قۇرىلدى. دەپارتامەنت وڭىردە زاڭ بۇزۋشىلىقتاردىڭ الدىن الۋ, ازاماتتاردىڭ قۇقىعىن قورعاۋ باعىتىندا جۇيەلى جۇمىس جۇرگىزىپ كەلەدى.
وبلىستاعى وزەكتى ماسەلەلەردىڭ ءبىرى – زاڭ بۇزۋشىلىقپەن باستالعان كوممەرتسيالىق تۇرعىن ۇيلەردەگى ۇلەسكەرلەردىڭ ماسەلەسى. 2022-2024 جىلدار ارالىعىندا جۇرگىزىلگەن تالداۋ ناتيجەسىندە سەمەيدە جالپى 547 ۇلەسكەرى بار 17 كوپقاباتتى كوممەرتسيالىق تۇرعىن ءۇي انىقتالدى. اتالعان نىسانداردىڭ 9-ى بويىنشا سوتتىڭ ماجبۇرلەپ بۇزۋ تۋرالى شەشىمى شىققان. ماسەلەنى شەشۋ ماقساتىندا اباي وبلىستىق پروكۋراتۋراسى, ەكونوميكالىق تەرگەپ-تەكسەرۋ, ادىلەت جانە پوليتسيا دەپارتامەنتتەرى وكىلدەرىنىڭ قاتىسۋىمەن بىرلەسكەن وتىرىستار وتكىزىلدى. ناتيجەسىندە 282 ۇلەسكەردىڭ ماسەلەسى وڭ شەشىمىن تاپتى.
شارا بارىسىندا اباي وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ باسشىسى ەرجان بولەگەنوۆ بىرقاتار قىزمەتكەرلەرگە «قارجىلىق مونيتورينگ اگەنتتىگىنە 5 جىل» ەستەلىك توسبەلگىسى مەن العىس حاتتتاردى تاپسىردى.
