قازاقستاننىڭ ەڭبەك سىڭىرگەن قايراتكەرى, پۋبليتسيست-جازۋشى شارحان قازىعۇل ەسىمى كوپشىلىككە «الەم اينەگىندەگى اسەمدىك», ء«دۇبارا دۇنيە», «توعىز تاراۋ تۋىندى», «وڭاشاداعى ونلاين ويلار», «پاليتراسىز پورترەتتەر», «فۋتبول فيلوسوفياسىنىڭ فراگمەنتتەرى» سەكىلدى پۋبليتسيستيكالىق كىتاپتارىمەن, سونداي-اق «مەتسەنات» ادەبي بايقاۋىن جەڭىپ العان «كۇلپەت» اتتى رومانىمەن جاقسى تانىس. ەندى, مىنە, قالامگەر «سەگىزىنشى نوتا» اتتى كەزەكتى كىتابىمەن مازمۇندىق تۇرعىدان جاڭا بەلەسكە كوتەرىلىپ وتىر.
جيناققا بيلىك, ادەبيەت, ونەر جانە جۋرناليستيكا سالاسىنداعى تانىمال تۇلعالار تۋرالى پورترەتتىك ەسسەلەر مەن پۋبليتسيستيكالىق تولعامدار ەنىپتى. ماسەلەن, ادەبيەتىمىزدىڭ كلاسسيكتەرى اكىم تارازي مەن ءابدىجامىل نۇرپەيىسوۆتەر تۋرالى «تاسجارعان تارازي» مەن «ساناداعى سارىتاپ ساعىنىش», اباي مەن مۇقاعالي سىندى اقىنداردى ورىس تىلىنە اۋدارعان, تەلەۆيزيا مەن كوسەمسوزدىڭ مايتالمانى, مەملەكەت جانە قوعام قايراتكەرى عادىلبەك شالاحمەتوۆ تۋرالى «شالاحمەتوۆ شەڭبەرىندەگى شتريحتار», بەلگىلى كومپوزيتور تولەگەن مۇحامەدجانوۆ تۋرالى «سەگىزىنشى نوتا» سىندى بىرنەشە ەسسەسىن وقىعاندا قالامگەردىڭ بەلگىلى ءبىر تۇلعانىڭ ومىرباياندىق دەرەكتەرىن تىزبەكتەمەي, ءار كەيىپكەردىڭ بولمىس-ءبىتىمىن زاماننىڭ تىنىسىمەن استاستىرا اڭگىمەلەيتىنىن اڭعاردىق. ءبىزدىڭ پايىمداۋىمىزشا, «سەگىزىنشى نوتا» كىتابى جاتىق ءتىل, ءدال دەتال, استارلى وي ارقىلى وقىرمانعا كوزگە كورىنبەيتىن, بىراق جۇرەكپەن عانا سەزۋگە بولاتىن اۋەندى ەستىرتە العان.
سونداي-اق بۇل كىتاپتى بۇعان دەيىن جارىق كورگەن «پاليتراسىز پورترەتتەر» پۋبليتسيستيكالىق جيناعىنىڭ زاڭدى جالعاسى ىسپەتتەس جانە تۇلعاتانۋ ۇدەرىسىنە قوسىلعان قوماقتى ۇلەس دەپ ايتۋعا بولادى.
شارحان قازىعۇل جيناقتىڭ العاشقى بولىمىندەگى پورترەتتىك ەسسەلەرىندە كەيىپكەرلەرىنىڭ ىشكى الەمىنە ءۇڭىلىپ, كەزەڭنىڭ رۋحىن, ۋاقىتتىڭ مىنەزىن كوركەم سۋرەتتەسە, ەكىنشى بولىمدەگى ماقالالارىندا قوعامداعى كەيبىر كەلەلى ماسەلەلەردى وزىندىك تانىممەن تاسقا قاشاعان. قىسقارتا ايتساق, ۇلتقا قىزمەت ەتۋ دەگەن ۇستانىمداعى ۇلتىمىزدىڭ پۋبليتسيستيكا ونەرى ءبىر عاسىردان استام ۋاقىتتان بەرى تالاي كەزەڭدى باستان وتكەردى. «سەگىزىنشى نوتا» سول ونەردىڭ ءورىسىن كەڭىتەر جيناق بولارىنا ءۇمىت ەتەمىز.
