جىل باسىنان بەرى زاڭسىز اينالىمنان ءارتۇرلى ۇلگىدەگى 580 قارۋ تاركىلەندى. ونىڭ ىشىندە 63-ءى – قىلمىستىق قارۋ, ال 49-ى قاڭتار وقيعاسى كەزىندە ۇرلانعان قارۋ. سونىمەن قاتار 2 مىڭنان استام وق-ءدارى الىنعان.
10 ناۋرىزدان باستاپ ەلىمىزدە «قۇقىقتىق ءتارتىپ» رەسپۋبليكالىق جەدەل-پروفيلاكتيكالىق ءىس-شاراسى ءوتىپ جاتىر. ونىڭ اياسىندا زاڭسىز اينالىمداعى قارۋدى انىقتاۋ جانە تاركىلەۋ جۇمىستارى بەلسەندى تۇردە جالعاسۋدا.
ءىس-شارا باستالعالى بەرى:
– زاڭسىز اينالىمنان 105 قارۋ, 260-تان استام پاترون جانە 13 جارىلعىش قۇرىلعى تاركىلەندى;
– قارۋ مەن وق-ءدارى ساقتالعان 19 جاسىرىن ورىن انىقتالدى;
– قاڭتار وقيعاسى كەزىندە ۇرلانعان 6 قارۋ, سونداي-اق پوليتسيانىڭ قىزمەتتىك جابدىقتارى تاركىلەندى. ولاردىڭ ىشىندە ءبىر تاپانشا, ەكى ويىق ۇڭعىلى كارابين, 3 تەگىس ۇڭعىلى اڭشىلىق مىلتىق, سونداي-اق وق وتكىزبەيتىن كەۋدەشەلەر بار.
ءجپىش بارىسىندا ازاماتتار 10 قارۋدى ەرىكتى تۇردە تاپسىردى.
سونىمەن قاتار 5 مىڭنان استام ازاماتتىق قارۋ يەلەرى تەكسەرىلىپ, ولاردىڭ 70-تەن استامى اكىمشىلىك جاۋاپكەرشىلىككە تارتىلدى.
سونداي-اق 6 ناۋرىز كۇنى الماتى وبلىسىندا وبلىستىق پوليتسيا دەپارتامەنتى مەن ۇقك دەپارتامەنتى قىزمەتكەرلەرى قوناەۆ قالاسىنىڭ شەتىندە جاسىرىن قويمانى انىقتادى. وندا الماتى قالاسىندا قاڭتار وقيعاسى كەزىندە ۇرلانعان كارابين تاركىلەندى.
11 ناۋرىزدا جامبىل وبلىسىنىڭ بايزاق اۋدانىنا قاراستى سارىكەمەر اۋىلىنىڭ ماڭىندا, تالاس وزەنىنىڭ جاعاسىنان كريمينالدىق پوليتسيا قىزمەتكەرلەرى تاراز قالاسىندا قاڭتار وقيعاسى كەزىندە ۇرلانعان اڭشىلىق مىلتىقتاردى تاۋىپ, تاركىلەدى.
ىشكى ىستەر مينيسترلىگى زاڭسىز ساقتالعان قارۋدى ەرىكتى تۇردە تاپسىرۋ ازاماتتاردى قىلمىستىق جانە اكىمشىلىك جاۋاپكەرشىلىكتەن بوساتاتىنىن ەسكە سالادى. سونداي-اق ازاماتتىق جاۋاپكەرشىلىك تانىتىپ, نەگىزسىز ساقتالعان قارۋ-جاراقتى تاپسىرىپ, قوعامدىق قاۋىپسىزدىكتى قامتاماسىز ەتۋگە ۇلەس قوسۋعا شاقىرادى.
