مەگاپوليستەگى شىعارماشىلىقپەن اينالىساتىن جاستاردى قولداۋعا ارنالعان ورتالىق قالا اكىمدىگىنىڭ, اقش ەلشىلىگى مەن اقش-تىڭ الماتىداعى باس كونسۋلدىعىنىڭ, سونداي-اق جەرگىلىكتى سەرىكتەس ۇيىمداردىڭ قولداۋىمەن ەسىك اشىپ وتىر. يننوۆاتسيا مەن تاجىريبەنى ۇشتاستىرعان زاماناۋي كوپفۋنكتسيونالدى الاڭدا اقش ۋنيۆەرسيتەتتەرىندە ءبىلىم الۋعا قىزىعۋشىلىق تانىتقان جاستارعا كەڭەس بەرۋ, اعىلشىن ءتىلى كۋرستارى مەن سويلەۋ كلۋبتارى, كاسىبي جانە تسيفرلىق داعدىنى دامىتۋعا ارنالعان ۆوركشوپتار, سونداي-اق كاسىپكەرلىك, كوشباسشىلىق جانە ازاماتتىق بەلسەندىلىك باعىتىنداعى باعدارلامالار ىسكە اسىرىلادى.
مادەني ورتالىقتىڭ اشىلۋ راسىمىنە مادەنيەت باسقارماسىنىڭ باسشىسى دانيار اليەۆ, جازۋشىلار وداعىنىڭ توراعاسى مەرەكە قۇلكەنوۆ, اقش-تىڭ الماتىداعى باس كونسۋلى ميشەل ەركىن, اقش باس كونسۋلىنىڭ ءباسپاسوز, مادەنيەت جانە ءبىلىم جونىندەگى كەڭەسشىسى حيرا كاۋر كامبودج باستاعان ءبىلىم بەرۋ جانە مادەنيەت ۇيىمدارىنىڭ وكىلدەرى قاتىستى.
«جاستاردىڭ ءبىلىم الىپ, شىعارماشىلىق جانە زياتكەرلىك تۇرعىدان دامۋىنا جول اشاتىن وسىنداي زاماناۋي ورتالىق كىتاپحانادا اشىلۋى مادەنيەت سالاسىن دامىتۋدىڭ ماڭىزدى باعىتى سانالادى. بۇل باستاما ەكى ەل اراسىنداعى مادەني ىنتىماقتاستىقتى نىعايتىپ, ءوزارا تۇسىنىستىك پەن سەرىكتەستىكتى جاڭا دەڭگەيگە كوتەرەدى دەپ سەنەمىن» دەيدى دانيار اليەۆ.
اقش-تىڭ الماتىداعى باس كونسۋلى ميشەل ەركىن ءبىلىم كەڭىستىگى تۇرعىندار سۇرانىسىنا ساي اشىلعانىن, ورتالىق عىلىم-بىلىمگە ىنتالى جاستاردى ۇنەمى قولدايتىنىن جەتكىزدى.
ورتالىقتا 3D-باسىپ شىعارۋ, ديزاين, روبوتتەحنيكا, باعدارلامالاۋ, عىلىمي تاجىريبەلەر مەن قولدانبالى شىعارماشىلىققا ارنالعان زاماناۋي قۇرالداردىڭ ءبارى قاراستىرىلعان. مۇنداعى امەريكالىق ادەبيەت بۇرىشىنان الەمگە ايگىلى كلاسسيكتەردىڭ جاۋھار شىعارمالارىن دا تاباسىز.
جاڭا ورتالىقتىڭ اشىلۋىنا كىتاپحانا وقىرماندارى, اسىرەسە جاستار ءدان ريزا. بولاشاقتا اقش-تا ءبىلىم الۋدى ماقسات ەتكەن جوعارى سىنىپ وقۋشىلارى ءوز اسەرىمەن ءبولىستى.
«مەن ءۇشىن بۇل جوبا – ۇلكەن مۇمكىندىك. مۇندا اقش ۋنيۆەرسيتەتتەرىنە تۇسۋگە قاجەتتى اقپارات الىپ, اعىلشىنشامدى جەتىلدىرىپ, ءوزىمدى كاسىبي ءارى شىعارماشىلىق تۇرعىدان دامىتۋعا بولادى. وسىنداي كەڭىستىكتىڭ اشىلعانى كوپتەگەن ستۋدەنتتىڭ ارمانىن جۇزەگە اسىرۋعا جول اشادى دەپ ويلايمىن», دەيدى جامبىل كىتاپحاناسىنىڭ تۇراقتى وقىرمانى ارۋجان ماحانبەتقاليەۆا.
الماتى
