فوتو: اقتوبە وبلىسىنىڭ ەكولوگيا دەپارتامەنتى
«QazaqGaz Aimaq» كومپانياسىنىڭ اقتوبە وبلىستىق فيليالى قالاعا جەتكىزىلىپ جاتقان گازدىڭ بارلىق تالاپتار مەن ستاندارتتارعا ساي ەكەنىن مالىمدەدى. مەكەمە وكىلدەرىنىڭ ايتۋىنشا, گازدىڭ اعۋى نەمەسە جوسپاردان تىس شىعارىلۋى تىركەلمەگەن.
ماسەلەگە بايلانىستى ەكولوگيا ماماندارى دا تەكسەرۋ جۇمىستارىن جۇرگىزگەن. ەكولوگيا دەپارتامەنتىنىڭ مالىمدەۋىنشە, 27-28 قاڭتار كۇندەرى دەپارتامەنت ماماندارى قالا اۋماعىندا اتموسفەرالىق اۋانىڭ ساپاسىن انىقتاۋ ماقساتىندا رەيدتىك ءىس-شارالار وتكىزدى. جۇرگىزىلگەن ولشەۋلەردىڭ ناتيجەسىندە لاستاۋشى زاتتاردىڭ (كۇكىرتسۋتەك, ازوت ديوكسيدى, كۇكىرت ديوكسيدى, كومىرتەك وكسيدى, مەركاپتاندار) شەكتى رۇقسات ەتىلگەن كونتسەنتراتسياسىنان اسىپ كەتۋ دەرەگى انىقتالماعان.
قازىرگى ۋاقىتتا ەكولوگتار «QazaqGaz Aimaq» ماماندارىمەن بىرلەسىپ, اۋا ساپاسىنا قاتىستى قوسىمشا ولشەۋلەردى جالعاستىرىپ جاتىر. ماماندار تۇرعىندار تاراپىنان تۇسكەن ءاربىر سيگنال نازارعا الىناتىنىن ايتادى.
ايتا كەتەيىك, اقتوبە تۇرعىندارى جاعىمسىز يىسكە قاتىستى ماسەلەنى بىرنەشە جىلدان بەرى كوتەرىپ كەلەدى. اسىرەسە جاز ايلارىندا بۇل ءيىس قالانىڭ باسىم بولىگىندە سەزىلەتىنى ءجيى ايتىلادى. 2025 جىلى وبلىستىق ەكولوگيا دەپارتامەنتى ءيىستىڭ كوزى انىقتالعانىن حابارلاپ, ونىڭ اۋىل شارۋاشىلىعى ماقساتىندا ورگانيكالىق تىڭايتقىش رەتىندە پايدالانىلعان قۇس ساڭعىرىعىنان شىققانىن مالىمدەگەن ەدى. الايدا بۇل جولعى جاعدايدىڭ سەبەبى باسقا بولۋى مۇمكىن دەگەن بولجام بار.
اقتوبە وبلىسىندا ەلدى مەكەندەردى گازداندىرۋ جوباسى ارتىعىمەن ورىندالدى
