«مىسىق پەن مارۋسيانى» وقىعاندا ەسىمىزگە بىردەن اقىن الىبەك شەگەبايدىڭ «قورادا ەمەس, قاباتتى ۇيدە تۇراتىن, الماتىدا يتتەر نەتكەن باقىتتى» دەيتىن ولەڭى ءتۇستى. ءيتتى قايدام, ءزاۋلىم-ءزاۋلىم حان سارايلاردا تۇراتىن كەي مىسىقتاردىڭ جاعدايى ءۇيسىز-كۇيسىز قاڭعىرىپ جۇرگەن قاراشادان جاقسى ەكەنىن قايىرا سەزىنىپ جۇرەك قۇرعىر شىم ەتە ءتۇستى.
داۋرەن قۋاتتىڭ اڭگىمەسىنە سىرت كوزبەن قاراعاندا الدەبىر مارۋسيا اتتى قارت اجەيدىڭ مىسىعى حاقىنداعى قاراپايىم حيكاياداي كورىنەدى. الايدا ءماتىن استارىنداعى وي تولقىنى تۋلاپ, تاۋ وزەنىندەگى ءداۋ تاستاردى دومالاتىپ, جانىڭىزدى جانشىپ وتكەندە ءارى-ءسارى كۇيگە تۇسەسىز. اڭگىمەنىڭ سوڭعى نۇكتەسىنە دەمىگە جەتىپ, سۋعا كەتىپ تال قارماعان جانداي جاعادا جاۋراپ تۇرعانىڭىزدى سەزەسىز. ويتكەنى اۆتور جەكە ادامنىڭ تاعدىرىنان سىر شەرتە وتىرىپ, ءدال ومىردەگىدەي ەتىپ تۇتاس ءبىر داۋىردەگى قوعامدىق احۋالدىڭ كارتيناسىن قاشاپ شىققان.
باستى كەيىپكەر مارۋسيا اگافەۆنا پولكوۆنيك كۇيەۋى ۇلدە مەن بۇلدەگە وراپ, بۇل ومىردە كولدەنەڭ قيىندىق بار دەپ ويلاتپاعان, باسقانى بىلاي قويىپ, كورشى-قولاڭدى دا مەنسىنە قويماعان تاكاپپار – كەردەڭ ايەل. بىراق ۋاقىت ۇرشىعى شىر اينالىپ, جان جارى و دۇنيەگە اتتانعان سوڭ, دۇنيە استان-كەستەن بولىپ, اكەسىنىڭ بايلىعىنا تالاسقان بالا-شاعاسى شەشەنى كەرەك ەتپەي مارۋسيا ءتىرى جەتىمگە اينالادى.
ءيا, اعايىن-تۋىس, كورشى-قولاڭعا سىيى جوق جاندار جالعىزدىقتىڭ قۇلا تۇزىندە قالىپ, ءۇي جانۋارىن باعاتىنى, بۇل ءداستۇر قازىر باتىس ەلدەرىندە قالىپتى جاعدايعا اينالعانى بارشاعا ءمالىم. سونداي-اق وتباسىنا دا, وتانعا دا قاجەتسىز بولىپ قالعان جالعىزىلىكتى جانداردىڭ قوعامدىق بەلسەندىلىگى ارتىپ, ءوزىنىڭ «الدەكىم» ەكەنىن دالەلدەۋ ماقساتىندا اينالاسىن مازالاپ, داۋ-جانجال تۋعىزۋمەن كۇنەلتەتىنى بار. اۆتور وسى مىنەزدى ءدال باسىپ, تار قۇرساعىن كەڭىتكەن ۇل-قىزىنا قاجەت بولماي قالعان جەتىم كەمپىردىڭ مىسىعى جوعالعاندا قوعامدىق دۇربەلەڭ تۋعىزعانىن ساركازممەن ادەمى اڭگىمەلەگەن. ادامنىڭ قۇنى جوق قوعامدا ورىس كەمپىردىڭ مىسىعىن تاۋىپ بەرمەككە تىراشتانعان شەندىلەردىڭ قىلىعىنا قاراپ نە كۇلەرىڭدى, نە كۇرسىنەرىڭدى بىلمەيسىڭ. كەيىنگى وتىز جىلدىقتاعى ىققا جىعىلعىش, ىڭعايعا كونگىش ءوز بەينەمىزدى, قۇلدىق پسيحولوگيامىزدى اينادان قاراپ تۇرعانداي كۇي سىيلاعان وسى ءبىر ساركازمنىڭ سوڭى قاتاڭ رەاليزمگە ۇلاسقاندا تۇلا بويىڭ شىمىرلاپ, جانىڭ تۇرشىگەدى. وعان مىسال رەتىندە باعزىدا باي-باعلان ءومىر ءسۇرىپ, كەيىن مىسىقپەن عانا قالعان مارۋسيا كەمپىردىڭ پاتەرشىلەرىن پوليتسياعا ۇستاتىپ جىبەرەتىن تۇسىن كەلتىرۋگە بولادى.
– ء«بىز – مارۋسيا اپايدىڭ داچاسىندا تۇراتىن پاتەرشىلەرمىز. باراتىن جەرىمىز تىم الىستا بولعان سوڭ وسىندا تۇنەپ قالىپ ەدىك.
«ە-ە, الگى ەكەۋى ەكەن عوي». مارۋسيا ويىن جيعانشا, الدىنا سەرەيگەن ۇزىن بويلى, ات جاقتى پودپولكوۆنيك شەنىندەگى وفيتسەر تىكتەلىپ تۇرا قالدى:
– راحمەت, سىزگە, مارۋسيا اگافەۆنا. كوپتەن بەرى ءىزىن جاسىرىپ جۇرگەن اسا قانقۇيلى قاراقشىلاردى ۇستاۋعا كومەكتەستىڭىز. سول ءۇشىن سىزگە بولىمشە اتىنان العىس ايتامىن. سەرگەكتىگىڭىزدى, باتىلدىعىڭىزدى ەرتەڭ گازەتكە دە جازىپ, وزگە قارتتارعا ۇلگى ەتەمىز.
سىبىرلەپ اتقان تاڭنىڭ اق توزاڭى الاكەۋىمدەگەن اۋلادان پاتەرشى ەركەكتىڭ شىرىلداعان داۋىسى ەستىلدى:
– ىشكە تەپپەڭىزشى, اعاي, ىشكە تەپپەڭىز, ايەلىم عوي, جۇكتى ەدى. ىشكە تەپپەڭىز!».
پاتەر جاعالاعان جۇكتى كەلىنشەكتىڭ مارۋسيا اگافەۆنانىڭ جوعالعان مىسىعى قۇرلى قۇنى جوقتىعىن ايتقان اۋىزعا وڭاي عوي. بۇل جايىندا تارقاتا اڭگىمەلەر بولساق, ءسوز ۇزارادى. سوندىقتان وسى تۇستان شالت بۇرىلىپ, وي ءدۇربىسىن باستى كەيىپكەردىڭ قاتىگەزدىگى تاراپىنا بۇرىپ جىبەرگەندى ءجون سانايمىز. ويتكەنى قالامگەردىڭ شەبەرلىگى سول وقىرمان قانشا جەردەن كەردەڭ كەمپىر ايار بولسا دا, ونى جەك كورمەيدى. كەرىسىنشە, انا رەتىندە اياپ, بۇگىنگى قوعامدا ءدال وسىنداي تيپتەگى جانداردىڭ كوپتىگىنە يلاناسىڭ. جازۋشى وسى بەينە ارقىلى بۇگىنگى ومىردەگى ەكىجۇزدى جاناشىرلىق پەن جاساندى ۇرانشىلدىقتى استارلاي تارقاتىپ, ادام تاعدىرىنا سەلقوس قارايتىن, دابىراعا دايىن قاتىگەز قوعامنىڭ بەينەسىن سوقىرعا تاياق ۇستاتقانداي بەينەلەپ بەرگەنىن تۇيسىنەسىڭ. بويىنداعى بار انالىق مەيىرىمى مەن جان جىلۋىن اياماي, تۋعان پەرزەنتى سەكىلدى الپەشتەپ وسىرگەن سول مىسىق تۋىپ, كوپ مىسىق بولىپ, ولگەن كەمپىردىڭ ءمايىتىن تالاپ جەيتىن تۇسىنا كەلگەندە اۋىر سوققى العان جانداي ەسەڭگىرەپ قالاسىز.
ول ەسەڭگىرەۋ ءالى دە ۇزاق ۋاقىتقا سوزىلارىنا ءسوز بەرەمىن!
