بۇگىندە الماتى قالاسى ورتالىقتاندىرىلعان كىتاپحانا جۇيەسىنە 30 قالالىق كىتاپحانا كىرەدى. كىتاپحانالارداعى جالپى كىتاپ قورى 1 372 423 دانا. قالالىق كىتاپحانالار زاماناۋي تالاپتارعا ساي جاڭارىپ, تۇرعىندار ءۇشىن قولجەتىمدى مادەني ءارى زياتكەرلىك كەڭىستىككە اينالىپ كەلەدى. 2025 جىلى كىتاپحانالارعا كەلۋشىلەر سانى شامامەن 3,1 ميلليون بولسا, ال تۇراقتى وقىرماندار سانى 300 مىڭنان اسقان.
قازىر جامبىل اتىنداعى جاسوسپىرىمدەر كىتاپحاناسى, «Alatau Creative Hub» جانە مۇحتار اۋەزوۆ اتىنداعى كىتاپحانا تاۋلىك بويى قىزمەت كورسەتەدى. جۇمىس رەجىمى وزگەرگەننەن كەيىن بۇل ءۇش فيليالعا كەلۋشىلەر سانى 70 پايىزعا ارتقان. وسى تاجىريبەنى ەسكەرە وتىرىپ, اقپان ايىندا جازۋشىلار كىتاپحاناسى مەن روزىباكيەۆ كوشەسى, 247 مەكەنجايىندا ورنالاسقان كىتاپحانا 24/7 رەجىمىندە جۇمىس ىستەۋگە كوشەدى.
قاتار قالادا كىتاپحانا قىزمەتىنىڭ قولجەتىمدىلىگىن ارتتىرۋ ماقساتىندا ساۋدا ورتالىقتارىندا, مەترو بەكەتتەرىندە, مەكتەپتەردە, كوۆوركينگتەر مەن كوممۋنالدىق ورتالىقتاردا 32 دەربەس وزىنە-ءوزى قىزمەت كورسەتۋ كىتاپحاناسى ورناتىلعان. بۇل نۇكتەلەردى 300-گە جۋىق تۇراقتى وقىرمان پايدالانىپ, اي سايىن 500-دەن استام كىتاپ بەرىلەدى.
بيىل جىل سوڭىنا دەيىن از قامتىلعان اۋدانداردا تاعى 3 جاڭا كىتاپحانا اشۋ جوسپارلانىپ وتىر. 2025 جىلى سكانەرلەۋ تەحنيكاسىنىڭ كومەگىمەن 70 پايىز كىتاپ قورى ساندىق فورماتقا كوشىرىلگەن. ورتالىقتاندىرىلعان كىتاپحانا جۇيەسىندە سيرەك كىتاپتاردى قالپىنا كەلتىرۋ زەرتحاناسى جۇمىس ىستەيدى. بۇگىنگە دەيىن 335 كىتاپ رەستاۆراتسيادان وتسە, ونىڭ 65-ءى سيرەك باسىلىمدار قاتارىنا جاتادى.
«ينكليۋزيۆتى ورتا قالىپتاستىرۋ ماقساتىندا ورتالىقتاندىرىلعان كىتاپحانا جۇيەسىنىڭ 8 فيليالىندا كورۋ قابىلەتى تومەن ازاماتتارعا ارنالعان اۋديو دىبىس جانە برايل ديسپلەيى ارقىلى اقپارات الۋعا مۇمكىندىك بەرەتىن ارنايى جۇمىس ورىندارى جابدىقتالعان. سونداي-اق ياندەكس قازاقستان كومپانياسىمەن بىرلەسىپ, مۇمكىندىگى شەكتەۋلى جاندارعا تەگىن كىتاپ جەتكىزۋ قىزمەتى ىسكە قوسىلدى. كىتاپحانالار زاماناۋي فورماتتا دامىپ, تۇرعىنداردىڭ ءبىلىم مەن اقپاراتقا تاۋلىك بويى قول جەتكىزۋىنە قولايلى جاعداي جاسالعان», دەيدى مادەنيەت باسقارماسىنىڭ باسشىسى دانيار اليەۆ.
الماتى
