فوتو: اشىق دەرەككوز
زاڭداعى نەگىزگى جاڭاشىلدىقتاردىڭ ءبىرى – رەتتەۋدىڭ يكەمدى مودەلىنە كوشۋ. بۇعان دەيىن زاڭ دەڭگەيىندە شامادان تىس ەگجەي-تەگجەيلى سيپاتتالعان بىرقاتار نورمالار ۇكىمەت قاۋلىلارى دەڭگەيىنە اۋىستىرىلادى. بۇل باسقارۋ ۇدەرىستەرىنىڭ جەدەلدىگىن ارتتىرىپ, وزگەرمەلى جاعدايلارعا تەز بەيىمدەلۋگە مۇمكىندىك بەرەدى.
قارۋ اينالىمى سالاسىندا ازاماتتىق جانە قىزمەتتىك قارۋ يەلەرىنە قويىلاتىن تالاپتار كۇشەيتىلدى. اتاپ ايتقاندا, باقىلاۋ ءۇشىن مىندەتتى تۇردە وق اتۋ ءراسىمى ەنگىزىلىپ, قىزمەتى ۋاقىتشا توقتاتىلعان كۇزەت ۇيىمدارىنىڭ قارۋىن ارنايى ساقتاۋ ورىندارىنا تاپسىرۋ ءتارتىبى ناقتىلاندى. بۇل قارۋدىڭ زاڭسىز اينالىمىنىڭ الدىن الۋعا باعىتتالعان.
كۇزەت قىزمەتى سالاسىندا دا بىرقاتار جاڭا تالاپ كوزدەلگەن. ەندى جەكە كۇزەت ۇيىمدارى ءۇشىن مىندەتتى ەسەپتىلىك ەنگىزىلەدى, قىزمەتىن توقتاتۋ جانە قايتا باستاۋ حابارلاما تارتىبىمەن جۇزەگە اسادى. سونداي-اق جەكە كۇزەت قۇرىلىمدارىنىڭ باسشىلىق قۇرامىنا بىرىڭعاي تالاپتار بەلگىلەنەدى.
زاڭنامالىق دەڭگەيدە العاش رەت اسكەري قۇرامداعى تەمىرجول كۇزەتىنىڭ مارتەبەسى ايقىندالدى. ولارعا ترانزيتتىك تەمىرجول تاسىمالدارىنا تارتىلعان تەرمينالدار اۋماعىنداعى جۇك پەن نىسانداردى كۇزەتۋ قىزمەتىن كورسەتۋ قۇقىعى بەرىلىپ وتىر. بۇل ستراتەگيالىق ماڭىزى بار ينفراقۇرىلىم قاۋىپسىزدىگىن كۇشەيتۋگە باعىتتالعان.
سونىمەن بىرگە كۇشتىك قۇرىلىم قىزمەتكەرلەرىنە ارنالعان تۇرعىن ءۇي تولەمدەرىن رەتتەۋ ءتارتىبى جەتىلدىرىلدى. بۇل وكىلەتتىك ۇكىمەتكە بەرىلىپ, ال تولەم الۋشىلار ءۇشىن تۇرعىن ءۇيدى جالعا الۋ شارتتارىن مىندەتتى مەملەكەتتىك تىركەۋ تالابى الىنىپ تاستالدى. مۇنداي قادام الەۋمەتتىك قولداۋدى الۋ راسىمدەرىن جەڭىلدەتۋگە مۇمكىندىك بەرەدى.
جالپى, قابىلدانعان زاڭ قاۋىپسىزدىك سالاسىنداعى باقىلاۋدى جۇيەلەپ, قۇقىقتىق رەتتەۋدىڭ تيىمدىلىگىن ارتتىرۋعا جانە ازاماتتاردىڭ قورعالۋ دەڭگەيىن كۇشەيتۋگە باعىتتالعان.
