بۇرىن «وتباسى بانكتەگى» قارىزداردى ءىشىنارا وتەۋ قالاي جۇزەگە اسىرىلدى؟
بانك كليەنتى enpf-otbasy.kz پلاتفورماسىنا كىرىپ, «تۇرعىن ءۇي قۇرىلىس جيناقتارى جۇيەسى بويىنشا يپوتەكالىق قارىزدىڭ بەرەشەگىن ءىشىنارا وتەۋ» ماقساتىن تاڭدايتىن. ءوتىنىم راسىمدەلگەن سوڭ, زەينەتاقى قورىنداعى ارتىق جيناقتاردى پايدالانۋعا سۇراۋ سالىناتىن بىرىڭعاي جيناقتاۋشى زەينەتاقى قورى (بجزق) ءوتىنىمدى 5 جۇمىس كۇنى ىشىندە قاراپ, زەينەتاقى جيناقتارىنىڭ ارتىعى بولعان جاعدايدا, بىرجولعى زەينەتاقى تولەمى (بزت) سوماسىن «وتباسى بانكتەگى» ارنايى شوتقا اۋداراتىن.
قاراجات تۇسكەننەن كەيىن كليەنت ونى 20 جۇمىس كۇنى ىشىندە پايدالانۋى ءتيىس بولعان. ادەتتە, قارىزدى ءىشىنارا مەرزىمىنەن بۇرىن وتەۋ ءراسىمى كەزەكتى نەسيە تولەمى جاسالاتىن كۇنى ىسكە قوسىلاتىن. سونىڭ ناتيجەسىندە قارىز بويىنشا اي سايىنعى تولەم وتەلەتىن.
ءتىس ەمدەۋ ءۇشىن زەينەتاقى جيناقتارىن پايدالانۋعا شەكتەۋ قويىلدى
نەسيە بويىنشا اي سايىنعى تولەم بىرنەشە بولىكتەن تۇرادى:
- نەگىزگى قارىزدان – بۇل بانكتىڭ تۇرعىن ءۇي ساتىپ الۋ ءۇشىن كليەنتكە بەرگەن قاراجاتى;
- بانكتىڭ سىياقىسىنان – تۇرعىن ءۇي ساتىپ الۋعا بەرىلگەن قاراجاتتى پايدالانعانى ءۇشىن ەسەپتەلەتىن پايىزدار;
- مۇمكىن بولاتىن مەرزىمى وتكەن بەرەشەك پەن ءوسىمپۇلداردان – تولەم ۋاقىتىندا جاسالماعان جاعدايدا ەسەپتەلەدى;
- كەيىنگە قالدىرىلعان تولەمدەردەن – ەگەر قارىز قايتا قۇرىلىمدالعان بولسا;
- دەپوزيتتەگى جيناقتاردان – الدىن الا قارىز بەرىلگەن جاعدايدا.
قانداي وزگەرىستەر ەنگىزىلدى؟
تۇرعىن ءۇي جاعدايىن جاقسارتۋ ءۇشىن بىرجولعى زەينەتاقى تولەمدەرىن پايدالانۋ قاعيدالارىندا «بەرەشەك» ۇعىمى «نەگىزگى قارىز» ۇعىمىمەن الماستىرىلدى.
بۇل دەگەنىمىز, ەندى زەينەتاقى جيناقتارىنىڭ ارتىعىن پايدالانا وتىرىپ, نەسيە بويىنشا ءىشىنارا نەمەسە تولىق مەرزىمىنەن بۇرىن وتەۋ كەزىندە تەك نەگىزگى قارىزدى عانا تولەۋگە بولادى. بىرجولعى زەينەتاقى تولەمى ەسەبىنەن اي سايىنعى تولەمدى تولىق جابۋعا بولمايدى.
زەينەتاقى جيناعىن تۇرعىن ءۇي ساتىپ الۋعا پايدالانۋ ءتارتىبى وزگەرتىلدى
نەسيە بويىنشا سىياقى (پايىزدار) جانە اي سايىنعى تولەم قۇرامىنا كىرەتىن باسقا دا ىلەسپە تولەمدەردى قارىز الۋشى ءوز قاراجاتى ەسەبىنەن تولەۋى ءتيىس.
ەندى «وتباسى بانكتەگى» قارىزداردى ءىشىنارا جانە تولىق وتەۋ قالاي جۇزەگە اسىرىلادى؟
جاڭا تالاپتاردىڭ ەنگىزىلۋىنە بايلانىستى «وتباسى بانكتەگى» قارىزداردى ءىشىنارا نەمەسە تولىق وتەۋ پروتسەسىن قايتا بەيىمدەۋ قاجەت. بۇل بەلگىلى ءبىر ۋاقىتتى تالاپ ەتەدى.
الداعى ۋاقىتتا بۇل وپەراتسيا ەكى كەزەڭنەن تۇراتىن بولادى:
- الدىمەن نەسيە بويىنشا سىياقى جانە باسقا دا ىلەسپە تولەمدەر قارىز الۋشىنىڭ ءوز قاراجاتى ەسەبىنەن تولەنەدى;
- سودان كەيىن نەگىزگى قارىز زەينەتاقى جيناقتارىنىڭ ارتىعى ەسەبىنەن وتەلەدى.
وسىعان بايلانىستى «وتباسى بانكتەگى» اعىمداعى جانە ارنايى شوتتاردا قاجەتتى قاراجاتتىڭ الدىن الا بولۋىن قامتاماسىز ەتۋ قاجەت.
«قاشىقتان كورسەتىلەتىن قىزمەتتەردى,ءموبيلدى قوسىمشانى جانە otbasybank.kz سايتىنداعى جەكە كابينەتتى جاڭا تالاپتارعا بەيىمدەۋ ماقساتىندا وتباسى بانك بىرجولعى زەينەتاقى تولەمدەرىن پايدالانا وتىرىپ, قارىزداردى ءىشىنارا نەمەسە تولىق وتەۋگە ارنالعان وتىنىمدەردى قابىلداۋدى ۋاقىتشا توقتاتۋعا ءماجبۇر», دەپ ءتۇسىندىردى بانكتىڭ ءباسپاسوز قىزمەتى.
سوندىقتان enpf-otbasy.kz پلاتفورماسىندا وتىنىمدەردى قابىلداۋ 2026 جىلدىڭ 30 قاڭتارىنان 31 قاڭتارىنا قاراعان تۇننەن باستاپ 2026 جىلدىڭ 2 ناۋرىزىنا دەيىن توقتاتىلادى.
ال 2026 جىلدىڭ 30 قاڭتارىن قوسا العانعا دەيىن بەرىلگەن وتىنىمدەر بۇرىنعى ەرەجەلەرگە سايكەس قارالادى.
«جاڭا ەرەجەلەرگە سايكەس, كليەنت الدىمەن ءوز قاراجاتى ەسەبىنەن اعىمداعى شوتتا نەسيە بويىنشا سىياقىنى جانە دەپوزيتكە مىندەتتى جارنانى قامتاماسىز ەتۋى ءتيىس. تەك سودان كەيىن عانا ول 200 000 تەڭگە مولشەرىندەگى بىرجولعى زەينەتاقى تولەمى ەسەبىنەن نەگىزگى قارىزدى وتەي الادى», دەلىنگەن بانك تاراتقان حابارلامادا.
