«Global Firepower» ءار مەملەكەتتىڭ 60 پارامەتر بويىنشا مۇمكىندىكتەرىن ساراپقا سالادى. نەگىزىنەن اسكەر سانى, قۇرىلىمى, قورعانىسقا بولىنەتىن قاراجات, وندىرىستىك بازاسى, لوگيستيكالىق مۇمكىندىكتەرى, جاعراپياسى, ت.ب. باعالانادى. تەك يادرولىق ارسەنال عانا ەسەپكە الىنبايدى. ويتكەنى الەمدە بۇل قارۋ تۇرىنە ساناۋلى ەل عانا يە.
ءبىزدىڭ ەلىمىزدىڭ جەكەلەگەن كورسەتكىشتەرىنە نازار سالساق, كەيبىر پارامەترلەر بويىنشا جوعارى ورىنداردان كورىنگەن ەكەنبىز. بۇلار – قارۋ-جاراق تۇرىندەگى جەتىستىكتەر بولماسا دا, سوعىس بولا قالعان جاعدايدا ماڭىزى اسا جوعارى مۇمكىندىكتەر.
ماسەلەن, «كومىر ءوندىرۋ» مەن «جەر كولەمى» پارامەترلەرى جونىنەن سايكەسىنشە 8, 9-ورىنداردا تۇرمىز. جوبادا كومىردىڭ سوعىس ۋاقىتىندا, اسىرەسە ۇزاققا سوزىلاتىن قارۋلى قاقتىعىستار كەزىندە اسا قاجەت رەسۋرس بولاتىنى ايتىلعان. ال جەر كولەمىنىڭ ۇلكەندەگى – كەز كەلگەن ەل ءۇشىن ماڭىزدى ارتىقشىلىق. ويتكەنى جەرى ۇلكەن ەلدەردى جاۋلاپ الۋ قيىنىراق بولارى تۇسىنىكتى.
سونداي-اق «كومىر كەنىنىڭ قورى» جونىنەن – 11, «مۇناي قورى» جونىنەن – 12, «مۇناي ءوندىرۋ» جونىنەن – 13, «تابيعي گاز قورى» جونىنەن 15-ورىندا تۇرعانىمىز كورسەتىلگەن. ءاربىر پارامەترگە بەرىلگەن تۇسىنىكتەمەگە سۇيەنسەك, كومىر سەكىلدى, سوعىس كەزىندە مۇناي مەن گازدىڭ دا ماڭىزى اسا وزەكتى. ويتكەنى بۇلارسىز سوعىس تەحنيكالارىنىڭ جۇمىسىن كوزگە ەلەستەتۋ مۇمكىن ەمەس.
سونىمەن قاتار «تەمىر جولمەن قامتىلۋ» پارامەترى بويىنشا 17-ورىننان كورىنگەن ەكەنبىز. «سوعىس ۋاقىتىندا تەمىر جول جاۋىنگەرلىك ەلەمەنتتەردى جۇمىلدىرۋ ءۇشىن شەشۋشى مانگە يە بولادى. ول ستراتەگيالىق ماڭىزى زور ايماقتارعا جەتۋگە, وتە اۋىر قارۋ-جاراق پەن ماتەريالداردى تاسىمالداۋعا مۇمكىندىك بەرەدى» دەلىنگەن زەرتتەۋدە.
«دۇركىندەتىپ اتاتىن رەاكتيۆتى جۇيەلەردىڭ سانى (دارج)» بويىنشا الەمدە العاشقى جيىرمالىققا ەنۋىمىز – شىن مانىندە زور جەتىستىك. ناقتىراق ايتقاندا, 145 ەلدىڭ ىشىندە 19-ورىنعا جايعاسىپپىز. تۇسىنىكتى بولۋ ءۇشىن ايتساق, دارج دەگەنىمىز – ەكىنشى دۇنيەجۇزىلىك سوعىستا كەڭەس ارمياسى قولدانعان «كاتيۋشا» جاۋىنگەرلىك كولىگى سەكىلدى تەحنيكالار. جالپى, الەمدە دارج تاريحى «كاتيۋشادان» باستالعان بولاتىن. بۇل تەحنيكالاردىڭ پايدا بولۋى سوعىس ءىس-قيمىلدارىنا تۇبەگەيلى وزگەرىس ەنگىزدى. قازىرگى تاڭدا امەريكالىق HIMARS سەكىلدى زاماناۋي جۇيەلەر قولدانىستا. ولاردىڭ اتقان زىمىرانى 300 شاقىرىمعا دەيىنگى نىسانانى قاعىپ تۇسىرۋگە قاۋقارلى.
ال ءبىزدىڭ ەلىمىز نەگىزىنەن «گراد», «ۋراگان», «سمەرچ» سەكىلدى كەڭەستىك جۇيەلەردىڭ جەتىلدىرىلگەن تۇرلەرىن قولدانادى.
جالپى, دارج سانى جاعىنان GFP رەيتينگىندە قىتاي كوش باستاپ تۇرسا, ەكىنشى ورىنعا رەسەي, ۇشىنشىگە اقش جايعاسقانىن ايتا كەتەيىك. سونداي-اق يران ءتورتىنشى, سولتۇستىك كورەيا التىنشى, ازەربايجان توعىزىنشى, ۋكراينا 18-ورىننان كورىنىپتى.
GFP رەيتينگىنە ساي تاعى ءبىر جەتىستىگىمىز – «اسكەريلەندىرىلگەن قۇرىلىمدار سانى» پارامەترى بويىنشا 145 ەلدىڭ ىشىندە 21-ورىننان كورىنگەنىمىز. بۇل قارۋلى كۇشتەرىمىز بەن ونىڭ رەزەرۆى تالاپقا ساي ەكەنىن كورسەتەدى.
دەگەنمەن كەيبىر پارامەترلەر بويىنشا جاعدايىمىز تومەن ەكەنىن دە ايتا كەتەيىك. ماسەلەن, ارنايى ماقساتتاعى ۇشاقتار سانى, شەكاراسىنىڭ ۇزىندىعى, ت.ب. جاعىنان 100-دەن تومەن ورىنداردى يەلەندىك. بۇعان قوسا, ۇشاق پەن تىكۇشاق تاسىمالدايتىن كەمەلەر, سۋبمارينالار سەكىلدى تەڭىز كۇشتەرىنە ءتان تەحنيكالار سانى جاعىنان سوڭعى ورىندامىز.
الەمدە اسكەري اۆياتسيا سانى جاعىنان – 50, تانك سانى بويىنشا – 39, تەڭىز فلوتى بويىنشا – 61-ورىندا تۇرمىز. ال GFP رەيتينگىندە ەلىمىز اسكەري بيۋدجەتى جونىنەن 145 مەملەكەتتىڭ ىشىندە 54-ورىندا تۇرعانىمىز كورسەتىلگەن.
ەندى, جالپى كورسەتكىشكە كوشسەك, الەمنىڭ ەڭ ۇزدىك ۇشتىگىندە اقش, رەسەي, قىتاي ارميالارى تۇر. بۇلارمەن بىرگە العاشقى وندىقتا رەت-رەتىمەن ءۇندىستان, وڭتۇستىك كورەيا, فرانتسيا, جاپونيا, ۇلىبريتانيا, تۇركيا, يتاليا جايعاسقان. بۇرىنعى كەڭەستىك رەسپۋبليكالار اراسىنان ۋكراينا – 20, وزبەكستان – 53, ازەربايجان – 60, بەلارۋس – 70, تۇرىكمەنستان – 78, تاجىكستان – 100, قىرعىزستان 109-ورىندا.
دەگەنمەن, بۇل پلاتفورمانىڭ دەرەكتەرى سىرتتاي تاۋەلسىز زەرتتەۋ ناتيجەلەرى عانا ەكەنىن دە ۇمىتپاۋ كەرەك. مۇندا كورسەتىلگەن كەيبىر مالىمەتتەر شىندىققا جاناسپاۋى دا عاجاپ ەمەس. كوپ ەلدەردىڭ اسكەري كۇش-قۋاتى جايىنداعى دەرەكتەر قۇپيا ۇستالاتىنى دا بەلگىلى. سوندىقتان «Global Firepower» زەرتتەۋلەرى الەم ەلدەرىنىڭ ارميالارى جايىندا جالپىلاما تۇسىنىك بەرگەنىمەن, ناقتى دەرەككوز رەتىندە اتاۋعا كەلمەيتىنىن ەسكە تۇتقان ءلازىم.
