ەلىمىزدىڭ استاناسىمەن بىتەقايناسىپ, ەلوردانىڭ قالىپتاسۋ, دامۋ, وركەندەۋ جولىنان سىر شەرتىپ كەلە جاتقان قوس باسىلىم بىلتىر 35 جىلدىعىن اتاپ وتكەن ەدى. قازاق جانە ورىس تىلىندەگى قوس كىتاپ – وسى مەرەيلى مەرەكەدەگى ايشىقتى ءىس-شارالاردىڭ جالعاسى ىسپەتتى.
ەلوردانىڭ ءتول باسىلىمىنىڭ وقىرماندار ءۇشىن ورنى بولەك. وسى ۋاقىت ىشىندە گازەت باس شاھاردىڭ تىنىس-تىرشىلىگى مەن جەتكەن جەتىستىكتەرىن تۇراقتى تۇردە جاريالايتىن ەلوردا ۇنىنە اينالدى.
«استانا اقشامى» گازەتى العاش رەت 1990 جىلى 13 قازاندا «اقمولا اقيقاتى» دەگەن اتاۋمەن جارىق كوردى. بۇل سول كەزەڭدە وڭىردەگى العاشقى قازاقتىلدى باسىلىمداردىڭ ءبىرى بولاتىن. كەيىن اقمولاعا استانا مارتەبەسى بەرىلگەن شاقتا گازەت اتاۋى «اقمولا اقشامى» بولىپ وزگەردى, ال 1998 جىلدان باسىلىم «استانا اقشامى» دەگەن اتاۋمەن جارىق كورە باستادى.
كىتاپتىڭ تانىستىرىلىمىندا ءسوز سويلەگەن «Elorda Aqparat» مەديا سەرىكتەستىگىنىڭ ديرەكتورى ولجاس سىدىقبەك 2025 جىل «استانا اقشامى» مەن «ۆەچەرنيايا استانا» گازەتتەرىنە تابىستى بولعانىنا توقتالا كەلىپ, بۇل باسىلىمدار ەلوردالىق قانا ەمەس, وتاندىق جۋرناليستيكانىڭ دا تەمىرقازىعىنا اينالعانىن اتاپ ءوتتى. «Astana aqshamy» گازەتى – جۋرناليستەردى تاربيەلەيتىن ناعىز ۇستاحانا. مۇندا شىڭدالعان تالاي جۋرناليست بۇگىندە مەملەكەتتىك باسىلىمداردا, ءتۇرلى اقپارات قۇرالدارىندا ابىرويلى قىزمەت اتقارىپ ءجۇر. 2015 جىلدان باستاپ قوس باسىلىم مەدياحولدينگتىڭ قۇرامىنا كىرىپ, زاماناۋي اقپاراتتىق ورتاعا بەيىمدەلىپ جۇمىس ىستەپ كەلەدى. ءبىزدىڭ باستى ميسسيامىز – ەلوردا مارتەبەسىنە لايىق جۇمىس ىستەپ, قازىرگى مەديانىڭ بارلىق تالابىنا ساي بولۋ», دەيدى و.سىدىقبەك.
ەكى باسىلىمنىڭ تاريحى قاتتالعان جيناقتا ەلوردانىڭ العاشقى قالىپتاسۋ كەزەڭىنەن باستاپ بۇگىنگە دەيىنگى ەلەڭ ەتكىزەرلىك جاڭالىقتار مەن سول كەزەڭدەردە جارىق كورگەن ماقالالار لەگى توپتاستىرىلىپتى. سونىمەن قاتار 35 جىلدىڭ ىشىندە شەجىرەگە اينالعان ايشىقتى وقيعالار, ءار كەزەڭدەگى گازەت باسشىلارى مەن كورنەكتى قالامگەرلەردىڭ, بىلىكتى اۆتورلار مەن ويلى وقىرمانداردىڭ ەستەلىكتەرى جارىق كورگەن.
گازەت بەتتەرىندە شىققان ماتەريالدار جيناقتا حرونولوگيالىق تارتىپپەن بەرىلىپتى, وقىرماندار ەلوردادا قاي جىلدارى قانداي وقيعا بولعانىن وسى دەرەكتى جىلناما ارقىلى وڭاي تاۋىپ, تاريحي وقيعالار تىزبەگىنە تەرەڭ ۇڭىلە الادى.
مادەني-رۋحاني جيىنعا مەملەكەت جانە قوعام قايراتكەرلەرى, تانىمال قالامگەرلەر مەن گازەتتىڭ ارداگەر جۋرناليستەرى قاتىسىپ, «ەلىمىزدەگى قالعىمايتىن قالانىڭ قازاعى قولىنان تاستامايتىن گازەتكە اينالسىن» دەگەن اق تىلەكتەرىن جاۋدىردى.
