بۇل تۋرالى ادۆوكات ايانحان وماروۆ ءوزىنىڭ Telegram-ارناسىندا جازدى. ونىڭ ايتۋىنشا, ءىس ستالكينگ فاكتىسى بويىنشا قوزعالعان.
«نۇرايدىڭ ءىسى بويىنشا شىمكەنت قالاسى پوليتسيا دەپارتامەنتى قىلمىستىق كودەكستىڭ 115-1-بابى (ستالكينگ) بويىنشا قىلمىستىق ءىس تىركەدى. جابىرلەنۋشىنى جۇيەلى تۇردە قۋدالاۋ فاكتىلەرىنە ءادىل قۇقىقتىق باعا بەرىلەدى دەپ ۇمىتتەنەمىن. ءىستىڭ تەرگەلۋ بارىسىن قاداعالاپ وتىرمىز. تەرگەۋدىڭ وبەكتيۆتى جانە تولىق جۇرگىزىلۋىن, كىنالى تۇلعانىڭ قاتاڭ تۇردە جازاعا تارتىلۋىن تالاپ ەتەمىز», دەپ جازدى ول.
ەسكە سالا كەتەيىك, نۇراي سەرىكباي 11 قاڭتار كۇنى شىمكەنتتە پىشاق جاراقاتتارىنان قازا تاپتى. الەۋمەتتىك جەلىدە تاراعان بەينەجازبالاردا قىزدىڭ قاشۋعا تىرىسقانى, كەيىن قارسىلىق كورسەتكەنى, ال كۇدىكتىنىڭ ونى ۇرىپ, پىشاق سۇققانى كورىنەدى. ودان كەيىن كۇدىكتى وقيعا ورنىنان قاشىپ كەتكەن.
مارقۇم نۇراي سەرىكبايدىڭ اعاسىنىڭ ايتۋىنشا, كۇدىكتى ۇزاق ۋاقىت بويى ونىڭ قارىنداسىن اڭدىپ, ستالكينگپەن اينالىسقان.
13 قاڭتار كۇنى پوليتسيا 28 جاستاعى كۇدىكتىنى قالادان 10 شاقىرىم جەردە ۇستادى. ەر ادام ۋاقىتشا ۇستاۋ يزولياتورىنا قامالدى.
كەيىن شىمكەنت قالالىق پوليتسيا دەپارتامەنتى كۇدىكتىنىڭ قاماۋعا الىنعانىن حابارلادى.
پرەزيدەنت قاسىم-جومارت توقاەۆ ۇلتتىق قۇرىلتايدىڭ V وتىرىسىندا قىزدىڭ قازاسىنا بايلانىستى شىمكەنت پوليتسيا دەپارتامەنتىندە تەكسەرۋ جۇرگىزىلەتىنىن ايتتى. سول كۇنى شىمكەنت پوليتسيا دەپارتامەنتىنىڭ باستىعى نۇرلان الماسبەكوۆ, ونىڭ ءبىرىنشى ورىنباسارى جانە بىرنەشە قىزمەتكەر لاۋازىمدارىنان بوساتىلدى. سونداي-اق ىسكە نەمقۇرايدى قاراعان پوليتسەيلەرگە قىلمىستىق ءىس قوزعالدى.
