فوتو: apkpure.com
بۇل جاعداي ينۆەستورلاردىڭ اقش-تاعى ساياسي جانە قارجىلىق احۋالعا سەنىمىنىڭ السىرەۋىنەن تۋىنداپ وتىر. Bloomberg ەسەپتەيتىن Bloomberg Dollar Spot Index ءبىر كۇننىڭ ىشىندە 0,4% تومەندەدى. وسىلايشا دوللار قاتارىنان ءتورتىنشى كۇن قاتارىنان السىرەپ كەلەدى. اسىرەسە دوللار جاپون يەنىنە قاتىستى قاتتى ارزانداعانى بايقالدى. نارىقتا بۇل ءۇردىس كەزدەيسوق ەمەس دەگەن پىكىر باسىم.
ساراپشىلاردىڭ ايتۋىنشا, دوللاردىڭ السىرەۋىنە ەڭ الدىمەن اقش-تاعى ساياساتتىڭ تۇراقسىز كورىنۋى اسەر ەتىپ وتىر. ينۆەستورلار ءۇشىن بەلگىسىزدىك كوبەيگەن. دونالد ترامپتىڭ گرەنلاندياعا قاتىستى مالىمدەمەلەرى, فەدەرالدى رەزەرۆ جۇيەسىنىڭ تاۋەلسىزدىگىنە قاۋىپ ءتونۋى مۇمكىن دەگەن اڭگىمەلەر, بيۋدجەت تاپشىلىعىنىڭ ۇلعايۋى مەن ەل ىشىندەگى ساياسي بولىنۋشىلىك نارىققا قىسىم ءتۇسىرىپ وتىر.
سونىمەن قاتار نارىقتا اقش بيلىگى جاپون يەنىن قولداۋ ءۇشىن ۆاليۋتا نارىعىنا ارالاسۋى مۇمكىن دەگەن قاۋەسەت تارادى. بۇعان نيۋ-يورك فەدەرالدىق رەزەرۆ بانكىنىڭ قارجى ۇيىمدارىمەن دوللار مەن يەن باعامى بويىنشا بايلانىسقا شىعۋى سەبەپ بولعان. مۇنداي اڭگىمەلەردىڭ ءوزى ينۆەستورلاردىڭ دوللاردان ساقتانۋىنا جەتكىلىكتى بولدى.
دوللارعا اسەر ەتىپ وتىرعان تاعى ءبىر ماڭىزدى ماسەلە – فەدەرالدى رەزەرۆ جۇيەسى توراعاسىنىڭ اۋىسۋى. قازىرگى توراعا دجەروم پاۋەللدىڭ وكىلەتتىگى 2026 جىلدىڭ مامىرىندا اياقتالادى. نارىق قاتىسۋشىلارى كەلەسى باسشى پايىزدىق مولشەرلەمەنى تومەندەتۋگە بەيىم بولۋى مۇمكىن دەپ قاۋىپتەنىپ وتىر. بۇل دا دوللار ءۇشىن جاعىمدى بەلگى ەمەس.
بۇدان بولەك, اقش-تا ۇكىمەت جۇمىسىنىڭ ۋاقىتشا توقتاپ قالۋ قاۋپى دە ساقتالىپ تۇر. ەگەر كونگرەسس 30 قاڭتارعا دەيىن مەملەكەتتىك شىعىستارعا قاتىستى زاڭ جوباسىن قابىلداماسا, ەلدە بيۋدجەتتىك داعدارىس تۋىنداۋى مۇمكىن. مۇنداي جاعدايلار ينۆەستورلاردى ودان ءارى الاڭداتىپ وتىر.
