اكتسيا وتىرىسىنا سەنات دەپۋتاتى نۇرتورە ءجۇسىپ توراعالىق ەتتى.
«بۇل تاڭداۋ – تاريحي جادىنى جاڭعىرتىپ, ۇلتتىق رۋحتى تەرەڭدەتۋگە باعىتتالعان ورتاق شەشىم» دەدى ول.
جيىندا ۇلتتىق اكادەميالىق كىتاپحانا باسشىسى كۇمىس سەيىتوۆا ءسوز الىپ, اكتسيانىڭ قالىپتاسۋ جولىنا كەڭىنەن توقتالدى. ونىڭ ايتۋىنشا, ء«بىر ەل – ءبىر كىتاپ» رەسپۋبليكالىق اكتسياسى مادەنيەت جانە اقپارات مينيسترلىگىنىڭ قولداۋىمەن ۇلتتىق اكادەميالىق كىتاپحانا مەن قازاقستاننىڭ كىتاپحانالار قاۋىمداستىعىنىڭ ۇيىمداستىرۋىمەن 2007 جىلدان بەرى جىل سايىن وتكىزىلىپ كەلەدى.
ء«بىر ەل – ءبىر كىتاپ» اكتسياسى: بيىل قانداي شىعارمالار داۋىس بەرۋگە ۇسىنىلدى؟
2007 جىلى اكتسيا العاش رەت ابايدىڭ قارا سوزدەرىن وقۋدان باستالدى. سول كۇننەن باستاپ قازاق ادەبيەتىنىڭ 50-دەن استام اقىن-جازۋشىسىنىڭ ۇزدىك شىعارمالارى وقىرمان قاۋىمىنا ۇسىنىلدى. اتاپ ايتار بولساق, اكتسيا اياسىندا ابايدىڭ قارا سوزدەرى (2007 جىل), مۇحتار اۋەزوۆتىڭ «قيلى زامانى» (2008 جىل), ماعجان جۇماباەۆتىڭ ولەڭدەرى (2009 جىل), جۇبان مولداعاليەۆتىڭ «مەن قازاقپىن» كىتابى (2010 جىل), جۇسىپبەك ايماۋىتوۆتىڭ «اقبىلەگى» (2011 جىل), ورالحان بوكەيدىڭ شىعارمالارى (2012 جىل), فاريزا وڭعارسىنوۆانىڭ «داۋاسى» (2013 جىل), سايىن مۇراتبەكوۆتىڭ «جۋسان ءيىسى» (2014 جىل), ءىلياس ەسەنبەرليننىڭ «كوشپەندىلەرى» (2015 جىل), دۋلات باباتاي ۇلىنىڭ «وسيەتناماسى» (2016 جىل), سۇلتانماحمۇت تورايعىروۆتىڭ شىعارمالارى (2017 جىل) وقىلدى. 2018-2025 جىلدارى شاكارىم قۇدايبەردى ۇلىنىڭ شىعارمالارى, باۋىرجان مومىش ۇلىنىڭ «ۇشقان ۇياسى», نەمات كەلىمبەتوۆتىڭ ء«ۇمىت ۇزگىم كەلمەيدى» كىتابى, ءابىش كەكىلباەۆتىڭ «اڭىزدىڭ اقىرى» رومانى, ءابدىلدا تاجىباەۆ ولەڭدەرى, ءانۋار ءالىمجانوۆتىڭ «ۇستازدىڭ ورالۋى», مۇحتار اۋەزوۆتىڭ «اباي جولى» رومان-ەپوپەياسى, سونداي-اق احمەت بايتۇرسىن ۇلىنىڭ, تولەن ابدىكتىڭ, بەردىبەك سوقپاقباەۆتىڭ, جۇمەكەن ناجىمەدەنوۆ پەن تاكەن الىمقۇلوۆتىڭ شىعارمالارى وقىلدى.
ايتا كەتەيىك, جىل كىتابىن تاڭداۋ جۇمىسى ەكى كەزەڭ بويىنشا جۇزەگە اسىرىلدى. ءبىرىنشى كەزەڭدە رەسپۋبليكالىق جانە وڭىرلىك كىتاپحانالار اراسىندا ساۋالناما جۇرگىزىلىپ, وقىرمان سۇرانىسى مەن ۇسىنىستارى نەگىزىندە الدىن الا كىتاپتار ءتىزىمى قۇرىلدى. ال ەكىنشى كەزەڭدە ۇسىنىلعان ءتىزىم ىشىنەن جىل كىتابى تاڭدالىپ, بەكىتىلدى.
