استانا قالاسىندا تجد باستىعىنىڭ ورىنباسارى ءومىرجان تۇقىشەۆ اكىمدىك وكىلدەرىمەن بىرگە سۋ تاسقىنى قاۋپى بار ايماقتاردى ارالاپ, تەكسەرۋ جۇمىستارىن جۇرگىزدى. ماقسات – سۋ تاسقىنى جاعدايىن باعالاۋ, قار جامىلعىسىنىڭ جاي-كۇيىن جانە ونىڭ ەرۋ بارىسىن باقىلاۋ, ەرىگەن سۋدىڭ جينالۋى مۇمكىن ورىندار مەن قاۋىپتى ۋچاسكەلەردى انىقتاۋ. قازىرگى ۋاقىتتا ەلورداداعى جاعداي تولىق باقىلاۋدا, بارلىق قىزمەت كۇشەيتىلگەن رەجىمدە جۇمىس ىستەپ جاتىر.
اقمولا وبلىسىندا تجم توتەنشە جاعدايلاردى جويۋ دەپارتامەنتى باسقارماسىنىڭ باسشىسى ماگومەت احريەۆ تە سۋ تاسقىنىنا قارسى ءىس-شارالاردىڭ ورىندالۋ بارىسىمەن تانىستى. جۇمىس ساپارى بارىسىندا جاعالاۋلاردى بەكىتۋ, وزەن ارنالارىن تەرەڭدەتۋ, بوگەتتەردى قايتا جاڭارتۋ, قورعانىش بىلەكتەرىن سالۋ جانە سۋ بۇرۋ ارنالارىن تازالاۋ جۇمىستارى جۇرگىزىلىپ جاتقان قاۋىپتى ۋچاسكەلەر تەكسەرىلدى. سونىمەن قاتار ينجەنەرلىك جانە سۋ سورۋ تەحنيكاسىنىڭ دايىندىعىن كوردى. تەكسەرۋ قورىتىندىسىندا سۋ تاسقىنىنا قارسى شارالاردى كۇشەيتۋ جانە قىزمەتتەردىڭ ءوزارا ءىس-قيمىلىن ۇيلەستىرۋ جونىندە ۇسىنىستار بەرىلدى.
اقتوبە وبلىسىندا تجد مەن «قازگيدرومەت» رمك فيليالى بىرلەسىپ ەلەك, قارعالى, ەمبى, تەمىر, ويىل, ۇلكەن قوبدا وزەندەرىنىڭ جوعارعى اعىسىندا مارشرۋتتىق زەرتتەۋلەر جۇرگىزدى. تەكسەرۋ بارىسىندا قار جامىلعىسىنىڭ قالىڭدىعى مەن تىعىزدىعى ولشەنىپ, وزەن ارنالارىنىڭ جاي-كۇيى, مۇزدىڭ ءتۇزىلۋى جانە سۋ وتكىزۋ قابىلەتى باعالاندى. الىنعان دەرەكتەر سۋ تاسقىنى جاعدايىنا قاتىستى بولجامدى ناقتىلاۋعا جانە قاۋىپ ايماقتارىن الدىن الا انىقتاۋعا مۇمكىندىك بەرەدى.
قاراعاندى وبلىسىندا سۋ تاسقىنىنا دايىندىق ەرەكشە باقىلاۋدا. تجم توتەنشە جاعدايلاردىڭ الدىن الۋ كوميتەتى توراعاسىنىڭ ورىنباسارى اسەت جىلقايداروۆ وڭىردەگى سۋ تاسقىنى قاۋپى بار ەلدى مەكەندەردى ارالادى. تەكسەرۋ بارىسىندا قورعانىش بىلەكتەرىنىڭ, سۋ بۇرۋ ارنالارىنىڭ جانە گيدروتەحنيكالىق قۇرىلىستاردىڭ جاي-كۇيىن باعالاپ, انىقتالعان ماسەلەلەر بويىنشا جەدەل شەشىمدەر قابىلدانىپ جاتىر.
قوستاناي وبلىسىندا كوكتەمگى سۋ تاسقىنىنا دايىندىق جۇمىستارى جۇيەلى تۇردە جۇرگىزىلىپ جاتىر. بۇل جۇمىستار سۋ تاسقىنى قاۋپى بار اۋماقتاردى تەكسەرۋ, قورعانىش بىلىكتەرى مەن بوگەندەردىڭ, سۋ بۇرۋ ارنالارى مەن گيدروتەحنيكالىق قۇرىلىستاردىڭ جاي-كۇيىن باعالاۋ, سونداي-اق وزەن ارنالارىن تازالاۋ جانە تەرەڭدەتۋ جۇمىستارىن قامتيدى. تجم ازاماتتىق قورعانىس جانە اسكەري بولىمدەر كوميتەتى توراعاسىنىڭ ورىنباسارى الەكسەي سوۆەتوۆ جەرگىلىكتى اتقارۋشى ورگاندارمەن بىرلەسىپ, بىرقاتار اۋدان مەن ەلدى مەكەندەگى قاۋىپ دەڭگەيىن باعالادى.
تەكسەرۋ بارىسىندا تۇرعىن ۇيلەردى, اۆتوموبيل جولدارىن جانە ينجەنەرلىك ينفراقۇرىلىمدى قورعاۋ ماسەلەسىنە ەرەكشە نازار اۋدارىلدى. ناتيجەسىندە, سۋ تاسقىنىنا قارسى شارالاردى كۇشەيتۋ, قورعانىش قۇرىلىستارىنىڭ جارامدى جاي-كۇيىن قامتاماسىز ەتۋ جانە كوكتەمگى سۋ تاسۋ كەزەڭىندە جەدەل ارەكەت ەتۋگە قىزمەتتەردىڭ دايىندىعىن ارتتىرۋ بويىنشا ۇسىنىم بەرىلدى.
تۇركىستان وبلىسىندا تجد باستىعى باعدات شايزادا سۋقويمالارى مەن گيدروتەحنيكالىق نىسانداردىڭ جاعدايىن تەكسەردى. سالالىق مامانداردىڭ قاتىسۋىمەن مونيتورينگ جۇرگىزىلىپ, سۋ دەڭگەيى, قورعانىش بوگەندەرىنىڭ بەرىكتىگى جانە سۋ وتكىزۋ قۇرىلعىلارىنىڭ جۇمىسقا جارامدىلىعى زەردەلەندى. سۋ تاسقىنى كەزەڭىنىڭ قاۋىپسىز ءوتۋىن قامتاماسىز ەتۋگە جانە گيدروتەحنيكالىق نىسانداردى تۇراقتى باقىلاۋدا ۇستاۋعا ەرەكشە ءمان بەرىلدى.
جالپى العاندا, رەسپۋبليكادا كوكتەمگى سۋ تاسقىنىنىڭ الدىن الۋعا باعىتتالعان كەشەندى ءىس-شارالار جوسپارلى تۇردە جۇرگىزىلىپ, جاعدايدىڭ ۋشىعۋىنا جول بەرمەۋ ءۇشىن بارلىق قاجەتتى رەسۋرس جۇمىلدىرىلعان. ءارى جاۋاپتىلاردىڭ قاتاڭ باقىلاۋىندا.
