اۋىل شارۋاشىلىعى ۆيتسە-ءمينيسترى ازات سۇلتانوۆتىڭ حابارلاۋىنشا, بيىل وڭىرلەر الەۋمەتتىك ماڭىزى بار كوكونىستەردىڭ, ەڭ الدىمەن, كارتوپ پەن ءسابىزدىڭ ەگىس القاپتارىن ۇلعايتۋى قاجەت. ونىڭ ايتۋىنشا, وتكەن جىلى كارتوپ ەگىسىن ارتتىرۋ بويىنشا ماقساتتى جۇمىس جۇرگىزىلىپ, ۇيىمداسقان شارۋاشىلىقتارداعى ەگىس كولەمى 12,5 مىڭ گەكتارعا ۇلعايعان.
ء«ونىم كولەمى نارىقتاعى باعا تۇراقتىلىعىنا تىكەلەي اسەر ەتەدى. وسىعان بايلانىستى وڭىرلەر تۇپكىلىكتى ەگىس قۇرىلىمىن بەكىتۋ كەزىندە ءسابىز ەگىسىن ۇلعايتۋ مىندەتىن ەسكەرۋى قاجەت», دەپ اتاپ ءوتتى ۆيتسە-مينيستر.
سونداي-اق بولجامدى ەگىس قۇرىلىمىندا قاراقۇمىق ەگىس القاپتارىن كەزەڭ-كەزەڭىمەن ۇلعايتۋ كوزدەلگەن. بيىل ونىڭ ەگىسىن 10 مىڭ گەكتارعا – 101 مىڭ گەكتارعا دەيىن كەڭەيتۋ جوسپارلانىپ وتىر (وتكەن جىلى – 91 مىڭ گەكتار). وڭىرلەرگە بەلگىلەنگەن ينديكاتورلارعا قول جەتكىزۋدى قامتاماسىز ەتۋ تاپسىرىلدى.
جۇگەرى ەگىسىن كەڭەيتۋگە دە ەرەكشە نازار اۋدارىلدى. الاڭداردىڭ ايتارلىقتاي ۇلعايۋى جامبىل وبلىسىندا جۇگەرىنى تەرەڭ وڭدەۋ بويىنشا Fufeng Group كومپانياسىنىڭ جاڭا تىك ينتەگراتسيالانعان ونەركاسىپتىك پاركىن, سونداي-اق تۇركىستان وبلىسىنداعى «قازكراحمال» جشس-نىڭ كراحمالدى سىرنە ءوندىرۋ زاۋىتىن شيكىزاتپەن قامتاماسىز ەتۋ ءۇشىن قاجەت.
جاڭا وندىرىستەردىڭ قاجەتتىلىگىن تەك وڭتۇستىك وڭىرلەر ەسەبىنەن قامتاماسىز ەتۋ مۇمكىن ەمەستىگى ايتىلدى. وسىعان بايلانىستى سولتۇستىكتەگى استىق ەگەتىن ءۇش وڭىردە جۇگەرى ەگىس القاپتارىن ارقايسىسىندا ورتا ەسەپپەن 15 مىڭ گەكتارعا ۇلعايتۋ مىندەتى قويىلدى.
اۋىل شارۋاشىلىعى مينيسترلىگى ءوز تاراپىنان ۇلتتىق اگرارلىق عىلىمي-ءبىلىم بەرۋ ورتالىعىمەن, مەملەكەتتىك سورت سىناۋ كوميسسياسىمەن بىرلەسىپ, وڭىرلەرگە ادىستەمەلىك ءارى تەحنولوگيالىق قولداۋ كورسەتۋگە دايىن ەكەنىن ءبىلدىردى. بۇل سولتۇستىك وڭىرلەردىڭ جاعدايىنا بەيىمدەلگەن ءوسىرۋ تەحنولوگيالارىن ەنگىزۋ مەن سايكەس سورتتاردى ىرىكتەۋ بولىگىندە جۇزەگە اسىرىلادى.
قوسىمشا اۋىل شارۋاشىلىعى مينيسترلىگى جۇگەرى وسىرۋدە پراكتيكالىق كومەك كورسەتۋگە دايىن ەكەنىن بىلدىرگەن قىتايلىق كومپانيامەن كەزدەسۋ وتكىزدى. قىتاي تاراپى ءوز ەلىنىڭ توپىراق-كليماتتىق جاعدايلارى ۇقساس سولتۇستىك وڭىرلەرىندە جۇگەرى ءوسىرۋ تاجىريبەسىن بولىسۋگە, سونداي-اق وسىنداي جاعدايلارعا بەيىمدەلگەن تەحنولوگيالار مەن سورتتاردى ۇسىنۋعا دايىن. وسىعان بايلانىستى وڭىرلەرگە حالىقارالىق تاجىريبەنى ەسكەرە وتىرىپ, جۇگەرى ەگىسىن كەڭەيتۋ باعىتىنداعى جۇمىستى جانداندىرۋ ۇسىنىلدى.
سونداي-اق وڭىرلەردە مينەرالدى تىڭايتقىشتاردى جونەلتۋ باستالعانى ايتىلدى. اۋىل شارۋاشىلىعى مينيسترلىگى «قازفوسفات» جشس-مەن بيىل امموفوستىڭ قوسىلعان قۇن سالىعىن ەسەپتەمەگەندەگى تونناسىنا 254 مىڭ تەڭگە دەڭگەيىندە (وتكەن جىلمەن سالىستىرعاندا 15%-عا جوعارى) بەكىتىلگەن باعا بەلگىلەۋ تۋرالى مەموراندۋمعا قول قويدى. قازىر اۋىل شارۋاشىلىعى تاۋار وندىرۋشىلەرىمەن شارتتار جاساسۋ مەن جەتكىزۋ كەستەلەرىن كەلىسۋ جۇمىستارى جۇرگىزىلىپ جاتىر.
بىلتىر كوكتەمگى ەگىس پەن جيناۋ جۇمىستارىن جۇرگىزۋگە 7 مىڭنان استام اۋىل شارۋاشىلىعى وندىرۋشىسىنە جالپى سوماسى 501,5 ملرد تەڭگە كولەمىندە كرەديت بەرىلىپ, 7 ملن گەكتاردان استام ەگىس القابى قامتىلدى. قازىر اگرارلىق كرەديت كورپوراتسياسى ارقىلى ەگىس ناۋقانىنا 126 فەرمەرگە 17 ملرد تەڭگە كولەمىندە قارجىلاندىرۋ ماقۇلداندى, تاعى 235 ءوندىرۋشىنىڭ 76 ملرد تەڭگەگە وتىنىمدەرى قارالىپ جاتىر.
