اقيقاتىندا Almaty Museum of Arts – ەلىمىزدەگى ەڭ ماڭىزدى مادەني جوبالاردىڭ ءبىرى. تاياۋ كۇندەرى ونىڭ تاريحىن باياندايتىن «قيىلىستاعى مۇراجاي» دەرەكتى ءفيلمىنىڭ تۇساۋى كەسىلدى. كورەرمەن وندا حح عاسىرداعى قازاق ونەرىنە تيەسىلى جەكە كوللەكتسيانىڭ قالاي مۇراجاي مازمۇنىنا اينالىپ, تۋريست قابىلدايتىن ورتا رەتىندە قالىپتاسقانىنا كۋا بولادى.
كارتينانى دۇنيەگە اكەلگەن جۋرناليست ءارى پروديۋسەر اندرەي لوشاك مۋزەي ىرگەتاسى قالانعاننان باستاپ, 2025 جىلى 12 قىركۇيەكتەگى اشىلۋىنا دەيىنگى كەزەڭدى ىشتەي باقىلاپ, تاسپاعا ءتۇسىرىپ وتىرعان.
«بۇل مۇراجاي جىلدار بويعى ارمانىمنىڭ عانا ەمەس, قوعام مەن ەل الدىنداعى بەلگىلى ءبىر بورىشىمنىڭ وتەۋى ىسپەتتى. الەمدى ارالاپ, ءىرى مۇراجايلاردى كورگەن سايىن الماتى ءدال وسىنداي كەڭىستىككە, باعاسى بيىك ونەر قولجەتىمدى بولاتىن, ادامدار باس قوسىپ, مادەنيەت تۋرالى اڭگىمە قۇراتىن ورىنعا لايىق دەپ ويلايتىنمىن», – دەيدى Almaty Museum of Arts نەگىزىن قالاۋشى نۇرلان سماعۇلوۆ.
فيلم تەك ارحيتەكتۋرالىق شەشىمدەر مەن نازارباەۆ پەن ءال-فارابي داڭعىلدارىنىڭ قيىلىسىنداعى عيمارات قۇرىلىسى تۋرالى عانا ەمەس, يدەيانىڭ تۋى, ىزدەنىستەردەن باستاپ, كوپساتىلى لوگيستيكا مەن شەبەر كۋراتورلىق شەشىمدەرگە دەيىنگى ۇدەرىستى, ياعني, ونەر تۋىندىلارىنىڭ كۇردەلى ءارى كوبىنە كوزگە كورىنبەيتىن جولىنان حاباردار ەتەدى. كادرلاردا يايوي كۋساما, بيلل ۆيولا, ريچارد سەررا, انسەلم كيفەر, جاۋمە پلەنسا, ينكا شونيبارە, اليسيا كۆادە سىندى ەسىمى كۇللى الەمگە ءماشھۇر شەبەرلەر ەڭبەكتەرىنىڭ قازاق ەلىنە قانداي كەدەرگىلەرمەن جەتكىزىلگەنى قىزىقتى ءارى تارتىمدى باياندالادى.
الماتىلىقتارمەن قاۋىشقان العاشقى «قيىلىستاعى مۇراجاي» – اتالعان مۋزەي تۋرالى قوس دەرەكتى ءفيلمنىڭ العاشقىسى. كوكتەم ايلارىندا 60-جىلدارداعى وتاندىق قىلقالام شەبەرلەرىنىڭ تۋىندىلارىن اسپەتتەيتىن ەكىنشى ءفيلمنىڭ پرەمەراسى وتپەك. ەكىنشى ءبولىمى – كەڭەس زامانىندا قازاق ونەرىنىڭ قايتالانباس ءستيلىن قالىپتاستىرعان تالانتتى بۋىن وكىلدەرىنە ارنالماق.
الماتى
